انا جيت ولقيت تاج

المدونه وحشتني جدا
ووحشوني كل الناس الحلوين اللي عرفتهم من خلالها
الاخوة والاخوات في الله
اللي تبادلنا مع بعض كلمه طيبه
كنت مشغوله معلش
واول ما رحت رحت عند الاستاذ عصفور لقيت تاج خدته علىطول وهو سامح

ماهى سورتك فى القران(اى احب سوره اليك تقرأها فى فرحك وفى حزنك)؟

سورة الفرقان والسجدة وغافر والزمر

ماهى احب ايه اليك الايه التى دائما تتمناها؟

"ان تجتنبوا كبائر ما تنهون عنه نكفر عنكم سيئاتكم وندخلكم مدخلا كريما"
اية 31 من سورة النساء

ما هى اكثر ايه تخاف منها وتدعوا الله الا تكون من اصحابها؟

فمن يرد الله ان يهديه يشرح صدره للاسلام ومن يرد ان يضله يجعل صدره ضيقا حرجا كانما يصعد في السماء كذلك يجعل الله الرجس على الذين لا يؤمنون
سورة الانعام اية 125

ما هى الايه التى تشعر بانها تتحدث عنك؟

واتل عليهم نبأ الذي آتيناه آياتنا فانسلخ منها فأتبغه الشيطان فكان من الغاوين * ولو شئنا لرفعناه بها ولكنه أخلد الى الأرض واتبع هواه
الاعراف ايه 175 -176

من احب صحابى واحب صحابيه اليك؟

صهيب الرومي - ربح البيع يا ابا يحيى .. ربح البيع
فاطمة رضي الله عنها

من احب نبى اليك بعد الحبيب صلى الله عليه وسلم؟

يوسف عليه السلام وعيسى عليه السلام

اذا كنت على عهد النبى صلى الله عليه وسلم فمن كنت تحب ان تكون ولماذا؟

بلال رضي الله عنه - ماذا كان قبل الاسلام : عبد حبشي وماذا صار بعده : مؤذن الرسول صلى الله عليه وسلم يصدح صوته الندي بالاذان

ما هو منتداك وموقعك المفضل؟

مااعرفش منتديات وباحب موقع جوجل

ما هى احب الاسماء التى تحب ان تنادى بها؟

ماعرفش غير اسمي الحقيقة وهو غير مذكور

من هو كاتبك المفضل؟

ماحدش معين اي حد بيكتب بصدق وكلامه يفيدني او يسعدني

مدون له عليك فضل او استفدت منه؟

نحسبهم كذلك ولا نزكي على الله احدا
عصفور المدينه
ضاكتور خالد
استراحة المحارب

من هو قارىء القران المفضل اليك؟

مشاري العفاسي وابو بكر الشاطري
والحصري عشان باتعلم منه القراءة الصحيحة

من هو منشدك المفضل؟

للاسف ماليش خبرة في موضوع الانشاد حاليا ومش متابعاه
حتى لو سمعت انشوده وعجبتني مش باعرف مين قالها زي راية بيضا مثلا

ما هو نشيدك المفضل؟

زي الاستاذ عصفور
هل ترانا نلتقي
لانها مرتبطة باخواتي اللي انفصلت عنهم من 16 سنه
وده كان التوقيت اللي كنت باسمع فيه انشاد
و الانشوده دي كانت في شريط اسمه اناشيد الدمام 2

اذا كان لك دعوه واحده تدعوها وستتحقق فبماذا ستدعو؟؟

اللهم اني اسألك حسن الخاتمه

من هو الداعيه المفضل اليك او شيخك المفضل؟؟؟؟

محمد حسان
هادئ واسلوبه علمي بسيط

ما هى اكثر عباده تشعر انها تجعلك قريب جدا من الله؟

قيام الليل .. ان قمت

من احب افراد عائلتك اليك؟؟

ابنائي

ما هو املك فى الحياه؟؟

ان لا يذلني الله لاحد من خلقه مهما كان السبب

هتمرر التاج
اللي عايزة يتفضل

نفسي اصحى وانا صاحية

يا جماعه حد يساعدني
ظروفي بتخلي نومي متقطع بشكل عام .. يعني انام ساعتين واصحى.. 3 ساعات واصحى ..
كرهت صوت منبه الموبايل اللي على طول زابطاه
ممكن اسرق نص ساعة نوم وازبط المنبه
حتى الايام اللي بقدر انام فيها 5 ساعات متواصل وبعدين انام 4 ساعات متواصل بعدهم برضه بيحصل فيهم نفس المشكلة
اللي هي
اني بنام على نفسي في اي مكان وفي اي وقت من اليوم وانا قاعده مع الناس وبيكلموني
انا باشرب القهوة وانام ما بيحوقش معايا حاجة
راسي تتقل كاني شاربة حاجة وعيني تحرقني لو قاومت وما غمضمضطهاش
باحاول اصحى الفجر عشان احفظ واراجع الاقيني من الساعة 4 لحد 5 ونص بافقر على المصحف وما حفظتش آيه
فيه ناس قالولي يمكن عندك حالة مرضية او الضغط منخفض
انا اسمع ان فيه ناس بيكفيهم النوم القليل
نفسي ابقى زيهم
اعمل ايه

امتحان

النهاردة كان عندي امتحان
من سورة البقرة حتى سورة الانعام
زميلاتي بقلهم اسبوعين بيراجعوا في الحلقة
وعشان انا ماكنتش مراجعه كويس كنت بخاف اروح لشكلي يبقى وحش او المعلمة تديني كلمتين
ولما رحت الامتحان طبعا ما كنتش مذاكرة كويس ولا مراجعه معاهم
كويس قوي لو جبت 10 من 25
بس خدت بالي من الحاجات اللي غلطت فيها
وبيتهيالي ان شاء الله مش هانساها تاني

لو حد بيحفظ زيي خدوا بالكم من قوله تعالى
"و الذين كفروا وكذبوا باياتنا " وردت مرة في سورة البقرة ومرتين في سورة المائده
"يا اهل الكتاب " وردت مرة في سورة النساء ومرتين في سورة المائدة
"والذين امنوا وعملوا الصالحات فيوفيهم " مرة في سورة ال عمران ومرة في سورة النساء ولكن بدلا من الواو فاء

واجب
مواضع " قل يا اهل الكتاب" في سورتي ال عمران والمائده وعدد المرات
مواضع " يا اهل الكتاب" في سورتي ال عمران والمائده وعدد المرات

ارجو الدعاء بالتثبيت والاخلاص وحسن الحفظ والاداء والعلم والعمل

هاموت من القرف

ليه
ناس تخصص مدونه كاملة للشتيمة بس
وتعمل نفسها محترمة لما حد يرد عليها شتيمتها
انا لا مع ده ولا مع ده
الاتنين اثاروا فيا حالة قرف وغثيان مش قادرة اتخلص منها من الصبح
حسبي الله ونعم الوكيل
مخصص مدونه كاملة لشتيمة الحجاب والنقاب
طيب
انا عن نفسي كشخص واحد فرد واحد مش بالبس النقاب
لكن مش ممكن اشتم اللي لابسينه
مش من منطلق كل واحد حر لان الحرية تنتهي عند حرية الاخرين
والا كنا قلنا زي ما هو نفسه بيقول انه مش معقول يقلع ملط في الشارع ونقول كل واحد حر
من منطلق حب لاخيك ما تحب لنفسك
وعامل الناس بمثل ما تحب ان يعاملوك به
ليه يبقى مستوى الحوار وعرض الاراء بالشكل ده
حسبي الله ونعم الوكيل
انا كنت هاعلق لكن قلت لا
مش هاسيب اسمي هناك
ده غير ان ما اعتقدش ان فيه اي كلام هيخليه يرجع عن اراؤه
قلت اجي انفس عن غضبي وحرقة دمي هنا
معلش استحملوني
انا ايه بس اللي وداني هناك؟

دايما متاخرة

كل سنه وانتم طيبين
قديمة
عارفة
الجهاز كان بايظ
ولسة جاي من يومين

ربنا يعين ونعرف نكتب كلمتين بعد ما نعرف نزيل كل الصدا اللي على دماغنا ده

العشر الأواخر

وبقينا 21 رمضان
الشهر جري
وبقينا في العشر الأواخر
ما احلى منظر الآلاف مصطفين في ساعات الليل الاخيرة يتهجدون في بيت الله الحرام

زمان في التوقيت ده كانت فيه اغنية بيعيدوا ويزيدوا فيها في التليفزيون
والله لسه بدري والله يا شهر الصيام
كنا نسمعها وندمع
اللهم اجعلنا من الذين رحمتهم وغفرت لهم واعتقتهم في رمضان
على ضعف قوتنا
وفتور همتنا
وقلة حيلتنا
اللهم تقبل من كل من صام يوما .. وسجد سجدة .. وقرأ آية .. وأحسن عملا .. ابتغاء وجهك الكريم
اللهم بلغنا جميعا ليلة القدر
ولا تحرمنا الأجر
آمين

رمضان جانا .. وانا اتاخرت

كل عام والمسلمين جميعا بخير

فاتتني بدايات الشهر الكريم

مدارس بقى وهنفطر اول يوم عند مين وتاني يوم عند مين ومين هيفطر عندنا رابع وخامس يوم

الحمد لله استقريت في البيت وعندي وقت مع نفسي
يارب اغتنمه وما اضيعوش
يارب ابني يعرف حكمة الصوم ويحبه ويحب الشهر وما يشوفش فيه مجرد حرمان
يارب وكل المسلمين نخرج من الشهر فرحانين بالقيام والصيام وختم كتابك الكريم
مش ندمانين على اللي ضيعناه في العزومات والمسلسلات والريحات والجيات
يا رب

ليه؟

قالت لنا معلمة القرءان امس – وكانت آخر حلقة لنا قبل رمضان – في معرض الحديث عن الاستعداد لرمضان انه يجب علينا :

ترك الاشتغال بخلق الله والاشتغال بالله

بذكره ومراعاته في كل لحظة وكل تصرف ومراعاة النية في كل عمل

وان ذلك يؤنس الانسان حين لا يكون له مؤنس عندما تصل الرحلة الى القبور

انا عن نفسي اشعر ببعض التيه

الف حوالين نفسي في البيت

تدمرني نفسيا اي نزاعات او خلافات على مستوى اسرتي الكبيرة

اتدخل لحاول تلطيف الموقف وحله

لاني الاخت الكبيرة

احاول اقرب وجهات النظر وارضي جميع الاطراف

بالذات الوالدين

ومحاولتي هذه قد تصيب وقد تخطئ لدرجة انهم في النهاية قد يحملوني الخطا

واسمع الكلمة القاتلة : انت السبب

مع ان الله يعلم ان قصدي لم يكن كل خير

آخر مرة ارتفع فعلا ضغط دمي حتى احسست بصداع قاتل وان راسي ستنفجر

واصبحت ابكي لدرجة اهتزاز كل خلايا جسدي من حرقة البكاء

تتكرر الزوابع الان وقمتها ستكون في رمضان

فهل استطيع ترك الاشتغال بخلق الله واشتغل وآنس فقط بالله ؟

اتمنى

*****************

امر يشغلني

اريد ان اعود لدراستي

واتعلم شيئا يفيدني

اريد ان اعود للعمل

اريد ان اخالط الناس واصبر على اذاهم

اريد ان التمس رزق الله

اشعر انني عالة

وطاقة معطلة

امكانياتي الان لا تسمح بالعمل

ربما اذا درست شيئا

ربما اذا راجعت خبرتي القديمة

اريد ان اساعد

وانا لا املك الان الا المساعدة بالدعاء

فهل يكفي

كيف احقق المعادلة الصعبة

بين بيتي واولادي وزوجي ونفسي وربي وحفظي وعملي

لا استطيع حتى ان ادرس او انظر في اي شئ رغم ان الموارد متوفرة

لم اعد اطيق او اصبر

صليت استخارة اكثر من مرة

كل الشواهد والعلامات تدفعني فقط في طريق الحفظ والتحفيظ

وانا لا اريد ان اتكسب بالقرآن

مع انه حلال اذا راعينا النية والالتزام والعمل به

لم اعد ادري ماذا افعل

المشكله انني فعلا لم اعد اطيق الخروج من المنزل

لم اعد اطيق ان امسك كتابا

لم اعد اطيق ان افتح الجهاز على برنامج لاتعلمه او اراجعه او امارسه

نسيت كل ما تعلمت

وافتقد القدرة والرغبة على اعادة تعلمه او تعلم الجديد

ولسه بالف حوالين نفسي

************

هو ده اكتئاب

طب ينفع اعالجه فقط بالقرب من الله والصلاة والقران والذكر والتزام واجباتي تجاه البيت والاولاد لان هذه هي مهمتي الحالية الوحيدة

وان ماكانش ده اكتئاب

ليه مش طايقة اقرا حاجة او امسك كتاب مع ان عشقي كان القراءة؟

ليه مش عارفة اكتب كلمتين عدلين مع اني كنت باملا كشاكيل؟

ليه مش قادرة اكلم حد ولا اشارك في اي حوار وشايفة الموضوع كلة عبث؟

ليه مش شايفة في الدنيا حواليا حاجة شاداني؟

ليه ما بقاش فيه شئ بيثير دهشتي او انتباهي؟

ليه لما باسمع الاخبار ما باستغربش من اي حاجة؟

ليه شايفة ان كل شئ امر واقع ومسلم بيه ولا يمكن تغييره؟

ليه شعار المرحلة الحالية : ليس في الامكان ابدع مما كان؟

ليه ما بقاش فيه شئ بيضحكني؟

لدرجة اني ضحكت على تدوينة عند الاستاذ جعان لميت البيت علي وكانوا عايزين يصوروني؟

ليه ما بقاش فيه شئ بيفرحني؟

ليه ؟

ليه؟

ايكم زادته هذه ايمانا؟

اشكركم جميعا على سؤالكم عني

بصراحة لم اقل انني ساسافر او ساغيب لانني لم اتخيل ا ن احدا سيفتقدني ولكنني سعدت جدا بسؤالكم واهتمامكم فجزاكم الله خيرا

انا والاسرة متعودين نسافر كل سنه في نفس الميعاد والى نفس المكان .. مدينه صغيرة هادئة بحرها جميل وليس بها صخب المصايف المعتاد ولا زحامها الفظيع .. يتاح لي فيها ان امارس عبادة التامل في ملكوت الله سبحانه كما تفعل داعية المستقبل مع البحر والغروب والسماء والنجوم التي لا اراها هنا في القاهرة .. والسنه دي كمان كان القمر بدر وحضرنا النصف من شعبان هناك..

عادة نقابل في المصيف ناس زينا زبطوا اجازتهم في نفس المكان ونفس الميعاد .. جمعنا حبنا للهدوء وخصوصية المكان

السنه اللي فاتت وانا قاعدة على البحر مع الولاد قرب الغروب حاطة رجلي في المية وبالعب بالرمل والناس بتتمشى على البحر لفت نظري بنتين عدوا من قدامي لابسين ملابس طويلة وشرابات وماشيين على الرمل والموج يجيلهم !! رفعت عيني لقيت واحده منتقبه والتانيه محجبه حجاب سابغ وطويل.. كنت ساعتها بقالي سنه في مشوار حفظ وتجويد القران الذي لم يضف لي وقتها شيئا بل زاد من حيرتي وتخبطي وقلقي بخصوص مفاهيم العلم والعمل والالتزام والثبات ..

وكنت دائما اقول لنفسي ما احنا حلوين اهه هو احنا بنعمل حاجه وحشة يعني لازم نزنقها على نفسنا .. الدين يسر.. وحاجات كده

فلما شفت منظر الشرابات اللي مليانه رمل والهدوم الطويلة اللي اكيد تقلت من المية وانا قاعدة مشمرة بنطلوني استغربت قوي

هم مستحملين كدة ازاي

استجمعت شجاعتي وهم راجعين وقفتهم وسلمت عليهم وتعرفت عليهم ولقيتهم لسه ما اتخرجوش من الجامعه وفي كليات قمه كمان وسالتهم السؤال ده

وبدا حوار طويل

لهم سنين مش بيتغيروا

بيطيعوا ربنا وبس

مش هاممهم الناس والحاجات الحلوة الكتير اللي حارمين نفسهم منها .. صابرين على الطاعة.. متحملين المكاره

ردوا على برد عمري ما كنت اتوقعه

قالولي احنا مش شايفين الا الجنه قدامنا .. اليها نعمل .. هي هدفنا .. مش بنبص لا يمين ولا شمال..

بنذاكر وبنتفوق وبنعمل كل اللي علينا في الدنيا

لكن الاخرة ليها عمل تاني .. لاننا في لحظة هنموت ومش هيبقالنا غير عملنا .. فزي ما بنعمل للدنيا لازم كمان نعمل للاخرة ..

واحنا ما طلعناش لقينا نفسنا كده.. احنا كنا زي كل ملايين البشر مش في دماغنا حاجة غير دنيتنا وبس لحد ما اتعلمنا صح وعرفنا ربنا عايز مننا ايه

واحنا مش دافنين نفسنا ولا حاجة الصبح بدري بنلعب راكت وبننزل البحر وساعة الغروب بنتمشى على البحر ونقول اذكار المساء

حبيتهم قوي وافترقنا لان ده كان اخر يوم لنا في المصيف

وفضلوا معلقين معايا طول السنه وحكيت لكل اصحابي عنهم بس انا فضلت زي ما انا .. مازادش علي حاجة بل بالعكس

بس كنت دايما فاكراهم واسال نفسي انا ليه مش باعمل زيهم .. ناقصني ايه ؟

وزاد حفظي للقران وزادت حيرتي وقلقي

والسنه دي .. لما سافرت المصيف في نفس الميعاد ولنفس المكان .. كنت باتمنى اقابلهم تاني

عدوا اول اربع ايام منغير ما اشوفهم ..

وفي يوم وانا قاعده على الرمل وقت الغروب مع الولاد .. مشمرة بنطلوني.. وبعمل على الرمل عروسة البحر وظهري للشمس وهي بتغيب.. عدت من ورايا شرابات وملابس طويلة رفعت راسي بعد ما عدوا .. وفرحت قوي هما ايوه هما .. هما زي ما هما وانا زي ما انا.. ولا كإن عدت سنه طويله.. واتكسفت قوي من نفسي .. ايه اللي انا حققته وزاد علي في سنه.. على الاقل هم لسه على التزامهم وصبرهم على الطاعة .. هديت تمثال عروسة البحر.. وقمت نزلت بنطلوني .. وقعدت استناهم وهم راجعين.. واول ما قربوا جريت عليهم .. لقيتهم فاكرني بالاسم وسلموا على بشوق وحضنوني.. وانا اللي كنت نسيت اساميهم.. واتكلمنا

واتفقنا نتقابل كل يوم الصبح بدري وساعة الغروب.. حكيت لهم كتير عن تخبطي وافكاري وسمعولي بصبر وحاوروني.. وقللوا كتير من شان التزامهم وقالولي ان كلامي بين لهم قد ايه هم مقصرين ..

وسالوني طب والقران اللي انت بتحفظيه؟

قلت لهم مش معلق معايا غير ايه سورة النساء " ان تجتنبوا كبائر ما تنهون عنه نكفر عنكم سيئاتكم وندخلكم مدخلا كريما"

المرة اللي بعدها ادوني كتاب اسمه " 10 مفاتيح لتدبر القران " بيتكلم عن القراءة والحفظ والفهم والتدبر للقران وبيقول ان اهدافنا لقراءة القران هي الثواب والعلم والعمل والشفاء ومناجاة الله تعالى

وان كل ايه كان الصحابة والتابعين يقفون عندها يفهمونها ويتدبرون ماذا يريد الله منهم فيها فيعملون به

وان ايات القران لابد ان تكون حية في اذهاننا نراها في كل مواقف الحياه فنكون على صلة دائمه بالله

وان الحسن البصري رضي الله عنه قال " اقرأ القران ما نهاك فان لم ينهك فلست بقارئ"

ولقيت في الكتاب اية كاني اراها لاول مرة .. " ام حسب الذين اجترحوا السيئات ان نجعلهم كالذين امنوا وعملوا الصالحات سواء محياهم ومماتهم ساء ما يحكمون" الجاثية 21

وهنا حسيت باحساس تاني

ولقيت اية تانية " واذا ما انزلت سورة فمنهم من يقول ايكم زادته هذه ايمانا فاما الذين آمنوا فزادتهم ايمانا وهم يستبشرون" التوبة 124

ساعتها شفت حياتي والدنيا كلها بعين تانية

واتعلمت حاجة مهمة

مش بالتمني ولا بالكلام

بالعمل والمجاهده والصبر زي اللي بيتعب وهو بيادي تمارينه في الجيش عشان القائد بتاعه ما يعاقبهوش ولا اللي بينقص وزنه عشان يبقى رشيق والا اللي بيسهر عشان يطلع من الاوائل كل واحد بيتعب عشان يحقق هدفه .. طب انا ايه هدفي؟

ولله المثل الاعلى

قرات في هذا الكتاب : قال ثابت البناني " كابدت هذا القرآن عشرين سنه ثم تنعمت به عشرين سنه" فقف عند الباب حتى يفتح لك

المرة دي خدت تليفونات البنتين وايميلاتهم

المرة دي رحت حلقة تحفيظ القران باحساس تاني ونية تانية " اقرا وارتق فان منزلتك في الجنه عند آخر آية تقرؤها " او كما قال النبي صلى الله عليه وسلم

ادعولي اتقدم لقدام وما ابصش تاني ورايا

ادعولي بالثبات

ادعولي بالاخلاص

واسألوا الله من فضله

الموضوع ده كان شاغلني

جات اختي رفقه وشجعتني اكتب فيه بالتدوينه الاخيره بتاعتها عن الدعاء

وكمان طعمه تناولت نفس الموضوع في تدوينه سابقة عن عدل الله سبحانه في تقسيم الارزاق بين العباد

ايه في سورة النساء

"ولا تتمنوا ما فضل الله به بعضكم على بعض للرجال نصيب مما اكتسبوا وللنساء نصيب مما اكتسبن واسالوا الله من فضله ان الله كان بكل شئ عليما"

النساء آية 32

اللهم سامحني على ما تمنيت ونظرت الى ما اعطيت لغيري

اللهم اغفر لي ان كنت حسدت او سخطت

اللهم ارزقني الرضا بما قسمت لي

اللهم اجعل غايتي الجنه اليها اعمل

اللهم لا تجعل الدنيا اكبر همنا ومبلغ علمنا

وارزقنا منها ما يكفينا ويكرمنا ولا يذلنا لاحد من خلقك وما يعيننا على طاعتك

اللهم اني اسالك من فضلك

تاني تاج

ده تاني تاج يجيلي
جالي من الحبيبه رفقة عمر

اسم مدونتك؟

العمر لحظة

لماذا اخترته ..وماهي نيتك من وراء اختياره؟

عشان لحظة واحدة
بتاثر في حياة انسان
كلمة قالها فكرة فكرها تصرف عمله موقف شافه قرار خده معلومه عرفها
في لحظة
ممكن تغير حياته في اتجاه مختلف
وتاثر فيه لآخر لحظة
شايفة ان حاجة زي كده تستاهل تتكتب وتتسجل وماتتنساش وما تعديش بدون تسجيل

هل فكرت في إغلاق مدونتك؟ والسبب؟

فكرت كتيير خصوصا اني كتير مش بالاقي حاجة اكتبها والقريحة جفت والحبر نشف وماليش خط معين للتدوين امشي عليه وكتير احس اني مش بالاقي حاجة اضيفها لحد .. لكن باستمر لمجرد التواصل والحاجة الى المشاركه

واول مرة لما حسيت اني اسأت بكتابتي لاحد المدونين وحسيت اني زعلته وضايقته وهو لا يستحق الا كل خير احسبه كذلك ووجدت ان صراحتي وصدقي في التعبير عن مشاعري ووجهة نظري في الامور قد نؤذي غيري وهو لا يستحق الاذية

صورتك في المدونة ورمزيتها ؟؟

غروب الشمس على البحر اكتر منظر باحبه وباتنح قدامه وباسافرله مدينه معينه استنى معاد سفري ليها من السنه للسنه هاديه وفاضيه عشان اشوفه براحتي كل يوم وعلى رواقه
منظر اشعر امامه بالراحة والسعاده والهدوء

لماذا دخلت عالم التدوين من الاساس؟

اولا سمعت عن المدونين وقضاياهم في الاخبار والصحف وبعدين جات لي رسالة في الميل منقوله من مدونة وشوشات دخلت المدونه وقريت وعجبتني وزرت المدونات الصديقة فقلت وانا كمان
زمان كنت باكتب عن اي حاجة او موقف يقابلني او شعور باحس بيه ويحركني وعندي كشاكيل مليانه وبعدين لاسباب كتيره توقفت قلت ارجع لحبي القديم بس المرة دي بدل القلم يبقى كي بورد وبدل الكشكول يبقى مدونه
ولندرة الاصدقاء اليومين دول ولانشغال كل واحد بحاله وكل واحد عنده اللي مكفيه وبيحكموا عليك من خلفيتهم عنك وحسب نوعية علاقتهم بيك
يعني بدون ادعاء انا باكتب لاحتياجي للكتابة والمشاركة الصادقة المجرده من أي غرض
على فكره ما حدش يعرف اني عندي مدونه

جمله قيلت لك فى وصف مدونتك؟

جمله قالها بينو ربنا يكرمه في تعليق على تدوينه رب اشرح لي صدري كنت هاعيط لما قريتها:

من أحد الأسباب اللي بتخليني أن أقول أن التدوين نعمة
هو تلك الكلمات التي تقطر صدقاً
والتي تعبر عني
وأراها تتساقط من غيري
بل واري الحل خلفها يصدمني في وجهي
ويقول لي فوووووووووووق
عايز أيه تاني

التعليقات بالنسبه لك ,اهميتها؟

التعليقات بالنسبه لي مشاركه انا باكتب هنا عشان حد يشاركني ويقوللي رأيه على اللي بقوله بشكل مجرد منغير ما يحكم علي كفلانه، فلما الاقي تعليق نور لي حته كانت مضلمه وتايهه عني بافرح زي الطفل الصغير وكمان بتعبر عن اهتمام اصحابها بالمدونه وصاحبها وان اللي بيعلق كتب تعليق لان المكتوب حركه .. عجبه او ما عجبوش.. لكن شاف انه يستحق يكتب حاجة في الموضوع خصوصا لما يكونوا زائرين دائمين ده بيخلق علاقة ورابطة وتفاعل انساني رائع خصوصا اننا ما نعرفش بعض

احلى بوست كتبته ...ضع اللينك , ثم اذكر لماذا؟

بيحلم يجيب جون

رب اشرح لي صدري

لاني كنت في حالة انفجار وغليان والتدوينتين دول بالذات طلعوا شويه من البخار المكتوم
لكن للاسف على مستوى الواقع العملي مافيش حاجة اتغيرت

أفضل بوست قرأته؟ وضع لينكه؟

ثائر بلا قضية عند ماعلينا

وكل تدوينه تؤثر في وتحرك الانسان جوايا بعيد عن روتين الحياة اليومي اللي بننسى معاه احنا مين وتخليني اقف قدامها وافكر ازاي النقطه دي ما لفتتش نظري قبل كده ودول الحمد لله كتير عند ناس كتير

أفضل مدونة قرأتها؟

استراحة المحارب للعلم الذي يريد نشره وتبسيطه ليفهمه اللي على قدهم امثالي
جعله الله في ميزان حسناته بالرغم اني من زمن مش بادخل مدونته لاني باحس اني لازم اذاكر تدويناته مش بس اقراها وللاسف ده عايز مني حاله استقرار عقلي ومنزلي وهدوء الجو اللي حواليا وده مش متوفر من فترة بس هاوفره قريبا ان شاء الله

حد قل أدبه فى التعليق إيه رد فعلك؟

قلة ادب ما حصلش لحد دلوقتي الحمد لله بس نادرا لما اجد تعليق مستفز فمش بارد على طول بستنى وافكر وبعدين ارجع افتح المدونه تاني وارد بهدوء
لكن لو حصل قلة ادب هامسح التعليق ومش هارد عليه

أسوأ مدونة؟

لما باشم ان المدونه سيئة من كلامها او صورها ما بكملش فراءة واسيبها بسرعة لاني اكرمكم الله بابقى عايزة اتقيأ فبالتالي لا اذكر حتى اسمها

أسوأ بوست أسوأ مدون

كما سبق

هيحصل ايه لإيميلك لما تموت ؟؟

معرفش لاني هكون مت
وبعدين الميل مش بيتحط في اعلام الورائة

اديت الباسوورد لحد قبل كده؟

لا

كانت إيه طبيعة علاقتك بيه؟

ما قلنا ما اديتوش لحد

اسمك؟

مش عايزة اقوله
يهمك في ايه اسمي ده اهلي اللي اختاروهولي يعني مالوش اي دلاله عندي كانسان مجرد اداة تعريف عشان يندهولي بيها ويكتبوها في الورق الرسمي والشهادات وروشتات الدكتور

المشهور بيه وسط اصحابك؟

هو اسمي وساعات بيقولولي يا حزينة

شخصيتك نوعها إيه؟

شخصيتي ضعيفة وباتاثر باي حاجة
ماعنديش اي ثقة في نفسي
ما ابصش لابعد من مناخيري
حساسه لدرجة زهقتني شخصيا وضايقتني
عصبيه لدرجة ان الضغط بيعلى وباسخن ونافوخي بيضرب
جبانه مووووت
صادقة جدا ومابعرفش اللوع وده عامللي مشاكل ياما
يا اقول بصراحه يا اسكت بس بيبان على وشي
لدرجة بيقولولي ده هبل
لازم يكون عندك ذكاء اجتماعي
وانا عندي تخلف وغباء اجتماعي
بس انا متاكده ان ربنا مش هيضيعني

السفر بالنسبة لك؟

باحبه جدااااااااااااااااا لو كان لمكان باحبه
ويا سلام لو اسافر لوحدي وده طبعا ما بيحصلش
ونفسي الف العالم وده طبعا مش هيحصل

وقت فراغك بتعمل فيه إيه؟

زمان كنت باقضيه في القراءة واغيب عن الدنيا مع الكتاب
ماعرفش ايه اللي حصللي ما بقيتش استحمل الكتاب في ايدي ربع ساعه
الا لو الكتاب حلو بجد زي كتاب حياتي لاحمد امين وده اخر كتاب قريته
دلوقتي وقت الفراغ نادرجدا وغالبا بيكون على النت او اتفرج على فيلم جيد

المود بتاعك؟

مكتئبة ومحبطة

الاكلة المفضلة؟

محشي بكل انواعه وملوخية
رقاق وبطة وملوخية
رز بالخلطة والمكسرات مع المشويات
والحلو صوابع زينب ورموش الست وميلفيه وكنافة بالكريمه والمكسرات
وبامووت في الشيكولاته الجيدة الصنع
والعصاير الفريش وقمر الدين
دلوقتي تقولوا عليا طفسة

الصفات اللي أخدتها من بابا؟

العصبيه والقلق والحذر الزياده عن اللزوم

الصفات التي أخدتها من ماما ؟

الشبه الشكلي لدرجة ممكن يلخبطوا بيننا

اكتر ست حاجات بكرهها؟

الأذى والكدب و عدم الاحساس والزحمة بتخنقني والصوت العالي والمطبخ

اكتر ست حاجات بحبها؟

البحر والهدوء والفضا والافلام المعموله صح من كل النواحي والاطفال تحت سن سنه واني اتعلم معلومه جديدة

الشغل بالنسبة لك؟

كان وما زال حاجة مهمه قوي .. استقلال مادي وادبي ومعنوي .. كان نفسي قوي يبقى لي career محترم ومستقر ابذل فيه كل جهدي وتفكيري وأؤدي واجبي فيه على اكمل وجه وارتقي فيه باستمرار
مكتب بتاعي في مكان محترم عليه صور احبابي و يبقى عندي لاب توب وكارت عليه المسمى الوظيفي وتليفوناتي وايميلي
مجرد حلم وصورة ما اتحققتش مع اني حاولت وكنت بابذل كل جهدي بضمير وامانه

لكن الشغل اللي مش هاقدر اديه حقه واكون متفوقه فيه لسبب او لآخر ويكون في اجواء غير مناسبة او محترمة او مع زملاء يحترفون الزنب ونقل الكلام وتحويره وما عندهمش احترام لزملاءهم وضمير في شغلهم ورؤساء لا يتقون الله في مناصبهم ومرؤوسيهم للاسف ما قدرتش عليه وألوم نفسي ولا القي باللوم على احد

لذلك ولاسباب اخرى انا حاليا ربة منزل أؤدي شغل البيت من كنس ومسح وطبيخ وغسيل بكل ضمير وامانه برضه

الانترنت بالنسبه لك؟

ازال حالة العزلة بدون اتصال مباشر بالاشخاص
معلومات تحت ايدي في اي وقت وتحت اي بند
بحبه جدا
يوم ما دخلت الدي اس ال كان فرح
ولو اتفصل لاي سبب بابقى هتجنن وعايزة اضرب حد
ولو بعدت عن البيت كام يوم منغير ما ادخل عالنت بابقى متضايقه جدا وباحس ان فيه حاجة مهمة ناقصاني

امرره
للحبيبه طعمه
وفتاة الجنة لما جهازها يتصلح

مشهدين ومشهدين

اضطررت الى السفر الى الاسكندرية لمدة ثلاثة ايام

لانني لو باختياري لا ادخلها في هذا التوقيت ابدا

وذلك لانني لا اطيق الزحام ولا استطيع استيعاب ان الاجازة هي ان احرق نفسي على البحر طول النهار ثم اسهر الليل في شراء اشياء لا احتاجها باضعاف ثمنها وان ادور في الشوارع آكلا وشاربا باكثر مما يطيق البطن استمع واسمع من حولي فارضا عليهم ذوقي في الاستماع وان اجلس في اقتراب يكاد يكون التصاقا بمن حولي من الناس على الشاطئ او في مقهى ليكون حديثنا مشاعا وخصوصيتنا كلأ مستباحا بهذا الشكل الموجود في كل مصايفنا وليس في الاسكندرية وحدها

لذلك اروي عشقى لها بزيارتها في عز البرد والنوات

لكي اتمتع بسحرها الشتوي وبحرها الذي يكون في اجمل حالاته وما اسعدني حين امطرت على في شارع خالد بن الوليد في شهر 1 وهو خالي من البشر والمحلات لا تجد من يدخلها فاقول سبحان مغير الاحوال

ركبت الميكروباص " المشروع " هربا من المطقة المكتظة بالمصيفين المتلاحمين في حميمية لم اجد لها مثيلا في اي مكان

ونزلت بعد الجدارية بمسافة معقولة

هناك الكورنيش فاااضي والناس ممكن تتمشى مش تمشي بقوة الدفع ممن خلفهم

هناك ممكن نقعد على سور الكورنيش في هدوء ونشوف البحر ونعد امواجه ونتطلع الى الافق اللا متناهي ونستمتع برؤية الشمس اثناء المغيب

بدلا من ان نرى رؤؤسا قد اينعت ... احم اقصد رؤوسا تستحم في البحر حتى لم تعد ترى المياه من كثرة الرؤوس بجوار بعضها

وانا في لحظة التجلي تلك احاول اكمال اذكار المساء امام هذا المنظر المهيب لفت نظري مشهدين ومشهدين

المشهد الاول: رجل وزوجته يتمشيان وهو يحمل على كتفه طفلا رضيعا صغيرا جدا من حجمه يبدو انه لم يتعد شهرين ومغطى تماما بالكوفرته وال" زعبوط" مغطي راسه لدرجة مش باين غير عنيه وامه بتزبط الكوفرته حواليه عشان الهوا

الله

المشهد الثاني: رجل عادي جدا ذهب معظم شعره وشاب الباقي يرتدي نظارة وتيشيرت عادي جدا في حوالي الخمسينات من عمره يسير وبجواره شابه جمبله صغيره تبدو في اوائل العشرينات ويتحدث معها باهتمام وجدية ويشير بيديه ويستعمل لغة جسده في الحديث وهي تسمعه في اهتمام واحترام وتفكير .. صور لي خيالي انه والدها او عمها او خالها يبتعد بها عن العائلة ويتباحثان في امر يهمها

الله

المشهد الثالث: بنتين تحت العشرين تتمشيان ومن خلفهما ولدين تحت العشرين يقفان اذا وقفتا ويسيران ورائهما اذا سارتا ثم جلس احدهما بجواري لحظات رافضا اكمال المشي والثاني يقول له ياللا يا عم واضح من المشهد انه بدايات معاكسة وتعارف تقليدي او هكذا صور لي خيالي

لا حول ولا قوة الا بالله

المشهد الرابع: ام وولدها وابنتها تحت العشرين جلسوا على السور واخرجو السندوتشات والولد يبتعد عنهما وفي يده الطعام تناديه امه فيشيح لها بيديه ويشيح عنها بوجهه ولا يرد عليها

لا حول ولا قوة الا بالله

وما الدنيا الا مسرح كبير

=========

تحديث :

لفت نظري بينو والطائر الحزين جزاهم الله خيرا ان ادنيا ليست مسرحا كبيرا وانما:

"وما الحياة الدنيا الا لعب ولهو"

شيماء كمان .. توفيت

قرات الان فقط في مدونة انسانه ان المدونه شيماء صاحبة مدونة
shiko online
والتي اعتقد ان بعض المدونين تساءل عن غيابها الطويل
قد توفيت الى رحمة الله تعالى في النصف من رجب
وقد اوصت اخاها ان يكتب ويبلغ زملائها من المدونين ويسالهم الدعاء لها
فقد كانت مريضة رحمها الله
وتوفيت بعد انتهاء علاجها
عمرها 28 سنه
انا لم اعرف شيماء
ولم ادخل مدونتها الا بعد ان قرات عن وفاتها
وانا اسال الله سبحانه ان يرحمها ويدخلها فسيح جناته ويغفر لها
انه تعالى اهل المغفرة
وانني انما اشفق على نفسي وعلى غيري
في الفترة الاخيرة كثرت المرثيات
وعدد كبير نقرا عنهم ونسمع
توفاهم الله
ومعظمهم صغير السن
فجاة
حادثة
مرض
تعددت الاسباب
والموت قريب
قريب
وماذا فعلنا
ماذا اعددنا
لاشيء
مازلت اركض
واجري
واتحسر على مافات
واسعى لما هو آت
واتزود لكل شئ
الا للحظة الفاصلة
وللرحلة الاخيرة
رحمك الله يا شيماء
وافاقنا من غفلتنا

خزعبلات .. جايز

انا مش هنا
موجوده اه
باكل وباشرب وباقوم بواجباتي العادية
بكلم الناس وبيكلموني
لكن انا ساعات باحس انه حلم
وان كل اللي حواليا ده مش حقيقي
وانه لازم الحلم هيخلص في يوم ما
وهاصحى و
ومش عارفه هلاقي ايه
احسن من اللي موجود والا اوحش
المهم اني مصدقة انه حلم
وان هييجي يوم وهاصحى
وان دي مش انا
انا هناك
مستنياني لما اصحى
والاقيني
ياترى ده تفسيره ايه؟

الاحساس نعمة

لما ست مصرية عادية خاااالص شكلا وموضوعا تبقى قاعده في شقتها المتواضعة جدا في حي متواضع جدا واقفة قدام البوتاجاز بتعمل اكلة اكيد برضه متواضعه لعيالها وتلاقي الامين والا الشاويش والا قوة جاية تقبض عليها انت فلانة الفلانية

ايوة

اتفضلي قدامنا يا...

وممكن الحوار يكون محلى بشوية كلمات من اياها

وتتجرجر قدام جيرانها والاحياء الشعبية دي ما تتوصاش في حركات المصمصمة والتصعيب وشوف يا اختي الولية السهتانة .. تلاقيها عاملة عاملة .. يبقى الحال ايه؟

ولما جوزها يجيله الخبر مراتك اتقبض عليها روحلها الاسم .. هو هيفتكر ايه.. وشكله قدام للي معاه ايه؟

ولما يوصل الخبر مكان شغلها وضعها هيكون ايه؟

ولما تفضل الست دي مرمية في الحبس الاحتياطي 33 يوم هيتاكد الناس ويصدقوا فيها ايه؟

وشكلهم قدام ولادها وفي الحتة وفي وسط الجيران

بلاش الناس هي حالتها هتكون ايه؟

لما تبقى مقضية يومها وراضية بعيشتها وبتشتغل عشان تساعد بالقرش مع جوزها عشان يربوا العيال بالحلال وتلاقي نفسها 33 يوم في زنزانة قذرة مع النشالات والحرامية واللهم احفظنا يبقى احساسها ايه؟

لما اولادها يعايرهم ولاد الجيران اللي بيلعبوا معاهم في الشارع بامهم يبقى احساسهم ايه؟

وكل ده بسبب ايه؟

تشابه اسماء

تشابه اسماء في عصر الحكومة الاكترونية والدكتور احمد نظيف

طب لو هي مواطنه مش حاسة بالنعمة اللي بلدها موفرهالها وماراحتش وقفت في طابور السجل المدني عشان تطلع الرقم القومي

قاللك فيه حاجة اسمها اسم الام تفرق بينها وبين المشتبه بها

طب هي فين؟ ده شهادة الميلاد لو مش ممكن نطلعها بالكمبيوتر ممكن نطلعها بمستخرج من اللي قد ورقة الجرنان من العباسية .. من دار المحفوظات بالقلعة

ولو ما فيش شهادة ميلاد خالص

مش فيه حاجة لسة لحد النهاردة اسمها شيخ حارة؟ شهود؟ حاجة اسمها تحريات؟ حاجة اسمها نظر؟

هي خرجت دلوقت بس بضمان وظيفتها .. لسه الحكاية ما خلصتش .. لسة فيها نظر

ايوة لسه فيه ناس فيكي يا مصر بياكلو لقمتهم بالحلال ويمكن يكملوا عشاهم نوم .. ومهم عندهم قوي شرفهم وسمعتهم

لسه فيه ناس ما بتسرقش وما بتنهبش وما بتقتلش بالالفات وبعدين تحط صباعها في عين التخين

لسه فيه ناس ماشية جوة الحيطة ومالهاش دعوة باي حاجة بس يتسابوا في حالهم وبرضه ما بيتسابوش في حالهم

دول اول ناس بييجوا عليهم

انا ما استحملتش حتى اتخيل نفسي مكانها

ربنا يقويها على محنتها

طب قول دي حالة فردية

طب والالفات من الغلابة في قراهم المتواضعة - هم كمان - اللي مش لاقيين نقطة المية

وتعرض منى الشاذلي فيلما تسجيليا اخرجته عطيات الابنودي من سنة 1981 في نفس المكان – برج البرلس – من 26 سنة وكاننا النهارده بنفس منظر الناس اللي شايلين الجراكن وبيدوروا عالمية مش لاقيينها

طب من 26 سنة ما كانش فيه بنية تحتية

دلوقتي فية وكله تمام

يبقى العيب فيهم

هم اللي ما بيصونوش النعمة .. اتعودو المية تجيلهم ببلاش وابو بلاش كتر منه زي ما وصفهم معالى السيد رئيس الوزراء

ولذلك المية خدت تحويلة من عندهم للفلل في الكمبوندات الشيك بتاعة علية القوم اللي يقدروا يدفعوا تمنها

وبدل ما تروح المية للفلاحين عشان يسقوا الرز وجدوا ان ملاعب الجولف اولى بالمية منهم

وقال بيقولوا المية ما بتجريش في العالي

لا دي بتجري قوي

والبنت .. العيلة الصغيرة اللي عندها 11 سنة وعلى ايدها رضيعة

لما شفتها في التليفزيون ما قدرتش امنع نفسي من البكاء .. سواق توكتوك

شاف فيها ايه دي؟ ده حجمها ما يجيبش 7 سنين؟

لا حول ولا قوة الا ابالله

انا قلت البنت ادمرت

لكن شفتها امبارح في 90 دقيقة – في بيتها المتواضع قوي برضه - بتتكلم وبتزعق وبتجادل ولا هند الحناوي لما عرفت ان الولد واهله بشككو في نسب الرضيعة عشان ينفوا التهمة عن ابنهم

ببتقول بكل جرأة وثقة طب يروحوا يحللوا بره .. انا عايزاهم يحللوا برة

بصراحة حمدت ربنا انها ما ادمرتش نفسيا

هو صحيح الاحساس نعمة زي ما سواقين الميكروباص بيكتبوا على عربياتهم ده على اساس انهم حساسين جدا

لكن في الحالات دي يبقى نقمة كبيرة قوي

لان واضح ان الواحد عشان يعرف يعيش في وطننا الغالي

لازم يكون ما بيحسش

ربنا يرحمنا برحمته

ويرفع عننا ظلمنا في بعض

رب اشرح لي صدري

انا باعترف اني قربت من ربنا قوي الفترة اللي فاتت بسبب مشكله او يمكن اطلق عليها بلاء وقع لي

امر ابتليت به والمفروض اصبر

شيئ غالي فقدته والمفروض ارضى

طريق عايزة امشي فيه ومش سالك ومعاكسني وقدامي كل الدلائل اللي بتقول ان ربنا راسملي وممهدلي طريق تاني

برغم كل الآيات التي استدللت بها في التدوينه السابقة الا انني اعود كثيرا الى حالة القلق والتمني ولو التي تفتح عمل الشيطان

لدرجة انني خفت على نفسي ان اكون من الذين يقولون مالا يفعلون

انا خايفة

انا قلقة ومتردده

ارى قوله تعالى " مذبذبين بين ذلك لا الى هؤلاء ولا الى هؤلاء ومن يضلل الله فلن تجد له سبيلا" يكاد ينطبق علي

مازلت انظر الى ما كنت اتمناه واريده في يد غيري وتنطبق علي الايه "وكذلك فتنا بعضهم ببعض ليقولوا اهؤلاء من الله عليهم من بيننا أليس الله بأعلم بالشاكرين"

احتاج الى المزيد من العلم؟ من العمل؟ من اجبار نفسي على عدم التفكير؟

الصحبة الصالحة؟ لدي الكثير بارك الله فيهم واحتاروا معي

القرآن؟ اعترف انني ادرس تجويد القرآن وحفظه منذ عامين وصلت في الحفظ الى نهاية سورة الأنعام ودائما ما ادعو الله ان يتم علي حفظ كتابه ويثبته في قلبي

ولكني مازلت قلقة

اقرأ الاية واحفظها فاخاف خوفا عظيما من عدم تطبيقها وان اكون مثل الحمار يحمل اسفارا

اقرأ الحكم في المسألة الشرعية فاخاف واحاول العمل به فاعمل مرة واعصي مرات

مثال: البحث الطويل الذي اورده bino في حكم الغناء نعم لا انكر ايا مما جاء به ولا اجادله

امتنع ان امد يدي الى فولدر ال mp3 واشغل اي من الكم الهائل الذي حملته من النت واقول عيب عليك انت حامله او ستكونين حامله لكتاب الله فكيف تعارضي ايات مفسرة واحاديث صحيحة

خافي من الله اتقي الله

فاطيع مرة واعصي مرة

والغريب انني لا استمتع ابدا بها ان شغلتها وسمعتها

ارتدي ملابسي الواسعه مرة " يدنين عليهن من جلاببهن" مرة واختنق مرات

فاعود لملابسي العادية ساترة ايضا ولكن ليست مثل الجلباب

ليست كما احب ان يراني رسول الله وانا البسها

ولكنني البسها لانها اسهل في الحركة واقل تكلفا وأكثر عصرية الى غيره من المبررات التي لم تعد تقنعني انا نفسي

وفي كل خطوة احس بالذنب

امد يدي بالسلام لمن مد يده ليصافحني وكل مرة اتذكر تحريم ذلك بحديث وراي العلماء ولكنني لا اسحب يدي ولا اقول انني لا اسلم ولا حتى البس جوانتي لاعفي نفسي ومن امامي من الحرج

يرى علماء اخرون تخفيف الكثير من هذه الاحكام مثل ابن حزم والغزالى ولكن علماء اخرون يعتبرونها زلة لهؤلاء العلماء وسقطة منهم

ويقولون اتقو الشبهات

واقرأ قوله تعالى " ان تجتنبوا كبائر ما تنهون عنه نكفر عنكم سيئاتكم وندخاكم مدخلا كريما" النساء (31)

فيقولون لا تحقرن صغيرة ان الجبال من الحصى

سامحني با رب

واهديني

وساعدني ان اجمع بين الخوف والرجاء

اجعلني اعبدك يارب خوفا وطمعا

اجعل الجنه نصب عيني اعمل لها

لاني موقنة ان " وما الحياة الدنيا الا لعب ولهو وللدار الآخرة خير للذين يتقون أفلا تعقلون" الانعام (32)

هل اقتربت من الله فقط في الضراء وابتعدت ثانية عندما هدأت الامور؟

ام ان هذا هو السجال الممتد بيننا وبين الشيطان الى يوم الدين؟

الخلاصة

ان انا دلوقتي

مش عارفة اعيش

يا رب

انت عالم بحالي

يا رب

" فمن يرد الله ان يهديه يشرح صدره للاسلام ومن يرد ان يضله يجعل صدره ضيقا حرجا كأنما يصعد في السماء كذلك يجعل الله الرجس على الذين لا يؤمنون" الانعام (125)

رب اشرح لي صدري

آمين