Wednesday, July 25, 2007

الاحساس نعمة

لما ست مصرية عادية خاااالص شكلا وموضوعا تبقى قاعده في شقتها المتواضعة جدا في حي متواضع جدا واقفة قدام البوتاجاز بتعمل اكلة اكيد برضه متواضعه لعيالها وتلاقي الامين والا الشاويش والا قوة جاية تقبض عليها انت فلانة الفلانية

ايوة

اتفضلي قدامنا يا...

وممكن الحوار يكون محلى بشوية كلمات من اياها

وتتجرجر قدام جيرانها والاحياء الشعبية دي ما تتوصاش في حركات المصمصمة والتصعيب وشوف يا اختي الولية السهتانة .. تلاقيها عاملة عاملة .. يبقى الحال ايه؟

ولما جوزها يجيله الخبر مراتك اتقبض عليها روحلها الاسم .. هو هيفتكر ايه.. وشكله قدام للي معاه ايه؟

ولما يوصل الخبر مكان شغلها وضعها هيكون ايه؟

ولما تفضل الست دي مرمية في الحبس الاحتياطي 33 يوم هيتاكد الناس ويصدقوا فيها ايه؟

وشكلهم قدام ولادها وفي الحتة وفي وسط الجيران

بلاش الناس هي حالتها هتكون ايه؟

لما تبقى مقضية يومها وراضية بعيشتها وبتشتغل عشان تساعد بالقرش مع جوزها عشان يربوا العيال بالحلال وتلاقي نفسها 33 يوم في زنزانة قذرة مع النشالات والحرامية واللهم احفظنا يبقى احساسها ايه؟

لما اولادها يعايرهم ولاد الجيران اللي بيلعبوا معاهم في الشارع بامهم يبقى احساسهم ايه؟

وكل ده بسبب ايه؟

تشابه اسماء

تشابه اسماء في عصر الحكومة الاكترونية والدكتور احمد نظيف

طب لو هي مواطنه مش حاسة بالنعمة اللي بلدها موفرهالها وماراحتش وقفت في طابور السجل المدني عشان تطلع الرقم القومي

قاللك فيه حاجة اسمها اسم الام تفرق بينها وبين المشتبه بها

طب هي فين؟ ده شهادة الميلاد لو مش ممكن نطلعها بالكمبيوتر ممكن نطلعها بمستخرج من اللي قد ورقة الجرنان من العباسية .. من دار المحفوظات بالقلعة

ولو ما فيش شهادة ميلاد خالص

مش فيه حاجة لسة لحد النهاردة اسمها شيخ حارة؟ شهود؟ حاجة اسمها تحريات؟ حاجة اسمها نظر؟

هي خرجت دلوقت بس بضمان وظيفتها .. لسه الحكاية ما خلصتش .. لسة فيها نظر

ايوة لسه فيه ناس فيكي يا مصر بياكلو لقمتهم بالحلال ويمكن يكملوا عشاهم نوم .. ومهم عندهم قوي شرفهم وسمعتهم

لسه فيه ناس ما بتسرقش وما بتنهبش وما بتقتلش بالالفات وبعدين تحط صباعها في عين التخين

لسه فيه ناس ماشية جوة الحيطة ومالهاش دعوة باي حاجة بس يتسابوا في حالهم وبرضه ما بيتسابوش في حالهم

دول اول ناس بييجوا عليهم

انا ما استحملتش حتى اتخيل نفسي مكانها

ربنا يقويها على محنتها

طب قول دي حالة فردية

طب والالفات من الغلابة في قراهم المتواضعة - هم كمان - اللي مش لاقيين نقطة المية

وتعرض منى الشاذلي فيلما تسجيليا اخرجته عطيات الابنودي من سنة 1981 في نفس المكان – برج البرلس – من 26 سنة وكاننا النهارده بنفس منظر الناس اللي شايلين الجراكن وبيدوروا عالمية مش لاقيينها

طب من 26 سنة ما كانش فيه بنية تحتية

دلوقتي فية وكله تمام

يبقى العيب فيهم

هم اللي ما بيصونوش النعمة .. اتعودو المية تجيلهم ببلاش وابو بلاش كتر منه زي ما وصفهم معالى السيد رئيس الوزراء

ولذلك المية خدت تحويلة من عندهم للفلل في الكمبوندات الشيك بتاعة علية القوم اللي يقدروا يدفعوا تمنها

وبدل ما تروح المية للفلاحين عشان يسقوا الرز وجدوا ان ملاعب الجولف اولى بالمية منهم

وقال بيقولوا المية ما بتجريش في العالي

لا دي بتجري قوي

والبنت .. العيلة الصغيرة اللي عندها 11 سنة وعلى ايدها رضيعة

لما شفتها في التليفزيون ما قدرتش امنع نفسي من البكاء .. سواق توكتوك

شاف فيها ايه دي؟ ده حجمها ما يجيبش 7 سنين؟

لا حول ولا قوة الا ابالله

انا قلت البنت ادمرت

لكن شفتها امبارح في 90 دقيقة – في بيتها المتواضع قوي برضه - بتتكلم وبتزعق وبتجادل ولا هند الحناوي لما عرفت ان الولد واهله بشككو في نسب الرضيعة عشان ينفوا التهمة عن ابنهم

ببتقول بكل جرأة وثقة طب يروحوا يحللوا بره .. انا عايزاهم يحللوا برة

بصراحة حمدت ربنا انها ما ادمرتش نفسيا

هو صحيح الاحساس نعمة زي ما سواقين الميكروباص بيكتبوا على عربياتهم ده على اساس انهم حساسين جدا

لكن في الحالات دي يبقى نقمة كبيرة قوي

لان واضح ان الواحد عشان يعرف يعيش في وطننا الغالي

لازم يكون ما بيحسش

ربنا يرحمنا برحمته

ويرفع عننا ظلمنا في بعض

12 comments:

أبو عمر - الصارم الحاسم said...

مش لاقي قوالة بعد آخر عبارتين قلتيهم

لا اله الا الله

عصفور المدينة said...

عندهم إحساس ولكنه نفس إحساس سائقي الميكروباص بالركاب

إيمان الحسيني said...

وجعتي قلبي يا لحظة :(
أنا بانزل كل يوم الصبح للشغل وأنا عمالة أذكر ربنا على قد ما أقدر علشان يحفظني
وماما تفضل تدعيلي من أول ما أنزل لحد ما أرجع علشان مايحصليش حاجة وأنا برة

الله المستعان

ftataljanna said...

لا حول ولا قوة الا بالله

انا بس في حاجة واحدة مصبرانى

ان فى ناس خرجت من الحيطة

الناس زهقت من الدفن بالحياة جوه الحيطان ابتدوا يخرجوا وابتدينا نسمع لهم صوت

لحظة said...

الصارم الحاسم
ما فيش في ايدينا حاجة نقولها او نعملها
لا اله الا الله
ربنا يحيينا عليها ويميتنا عليها ويبعثنا عليها

************

عصفور المدينة

هو زي ما حضرتك قلت بالضبط

*************

طعمة

الحافظ هو الله
عجبني قوي تحليلك في موضوع الارزاق
هو كده
فمن رضي فله الرضا ومن سخط فله السخط

*************

فتاة الجنة

مش مهم الصوت
ان كان عالصوت ما احنا بنصوت من زمان
المهم الفعل والنتيجة
************

ftataljanna said...

لا ما نا قصدي كده ان الناس ابتدت تنطق وتعبر

بجد

فى حاجات كتير اتغيرت

يعني شوفى مثلا ما شاء الله عند صاحب البوابة فى موضوع حملة على المخدرات

وشوفى مثلا عند الطائر الحزين على المثلية

شوفي مثلا عند عصفور المدينة الايجابية

وما شاء الله

بجد فيه تغيير والناس ابتدت تتحسن

الحمد لله

La RoSe said...

لا حول ولا قوة إلا بالله العلي العظيم

ربنا يزيح عن الجميع وبرفع عنهم الهم والحزن ، آمين يارب

يمكن يكون في ناس بتحاول تنطق وتعبر ، لكن أشعر دائماً أن التغيير سيظل مسجوناً بين كلماتنا هنا ، لا يخطو نحوه سوانا ولا يشعر به غيرنا ...
أرقب الناس من حولي في كل مكان وسائل المواصلات .. الطريق .. الجيران ...الكل لا يتحدث سوى لغة واحدة فقط "ياللا نفسي" لو أردت التغيير وشرعت فيه ستشعر أنك الأحمق الوحيد بين كل هذه الجموع ، وستجد نفسك تعود مرغماً للسير بذات الطريق السابق

ربنا يرحمنا جميعاً

الباحث عن الحقيقة said...

ايه القهر ده

اضحكى يا شيخه وزغرطى ياللى مانتيش غرمانه

ماهو لما يبقى الحكومة إلكترونية ..يبقى الاحساس ضرورى يبقى نعمة

انما منين إلكترونية واحساس يجتمعوا مع بعض

ولا مؤاخذه ..بطلى تحلمى

وعجبى

BinO said...

أول ما ابتديت التدوين أو قبلها بشوية
كان فيه عبارة ملازماني جداً
"ناس ومش ناس "
يعني في بني أدميين
وفيه مش حاسين
ولا يعني لهم الأحساس شيئاً
موضوع الظلم التعسفي الأمني الجاهلي ده أعرف قصة لناس قريبة مني اتعرضت له وربنا ستر الحمد لله
==================================
بالنسبة لموضوع البنت الصغيرة
موضوع مؤلم وغريب وفيه فوائد برضه
مؤلم
لأن قصة الأغتصاب تؤلم الي معندهومش أحساس

وغريب لأنه بيدلل كل يوم علي حالة الأنفلات الأخلاقي اللي وصل ليها الشباب
ونلاقي وزارة الصحة والسكان بقيادة علي باب عاملة حملة عظيمة لمكافحة الختان ؟؟؟؟؟؟؟؟؟؟؟؟؟؟؟؟؟؟؟؟؟
وبأسم الدين اللي هو برئ منهم

الفائدة اللي جاءت علي بال احد الأصدقاء هو أثبات أن الأنثي يمكن أن تتزوج و تنجب في هذا السن
بمعني ان من كانوا من المستشرقين والملحدين الذين ينكرون علي الرسول صلي الله عليه وسلم دخوله بالسيدة عائشة في هذا السن , رغم أن التكوين الجسدي لنساء العرب في هذا الوقت وربما الان في الجزيرة العربية ينمو بسرعة أكبر من الرجل

Fedaa AL Eslam said...

لا اله الا الله

بجد حاجه كويسه جدا انك تلفتى انتباهنا لموضوع زى ده انا كنت بسمع ان فى ناس بتتظلم بالشكل ده بس بصراحه عمرى ما شفتها فى الحقيقه
مجرد افلام كنت بتفرج عليها لكن ديه اول مرة اسمع فيها بقصه زى ديه حقيقية

ربنا يجزيكى خير يا رب

Future_Preacher said...

السلام عليكم
ذكرتيني بأحد القصص اللي تعرض لها احد أقاربي لكن الحمد لله ربنا سلم
الامل في الله وحده ان تنقشع كل هذه الغمامات
و ربنا يورينا في حكومتنا الرشيدة -معزة بكار- يوم غير يسير ان شاء الله
حقول ايه
يكفي انك تدخل قسم شرظة و انت المجني عليك علشان تقدم بلاغ ...شوف حيحصلك ايه
و يا سلام ع البلد اللي بتتباع حتة حتة ...اللي عمله اياه و اياه بيبيعه ابن الايه دلوقتي بالجملة و بالقطاعي
أما عن البنت الضحية دي فماما اللي دايما حريصة انها تمارس امومتها حقة بجد شالتها ف عنيها و عطيت لأهلها معونة ألف جنيه بحالهم و جابتلهم شقة بس الايجار عليهم
و لا العامل الغلبان اللي وقع عليه عمود نور بسبب خطيء غبي من عامل في الحي و صرفولوه 75 جنيه بحالهم تعويض عن راسه اللي تهتكت
و سلملي علي قضية الختان
و ارضاع الكبير
و اللي لو كفر ماعليهوش عقوبة في الدين
والباقية تأتي
و المصري حيفضل مصري النيل رواه و الحكومة طحنااه
و لا حول و لا قوة الابالله

الفقيرة إلى الله أم البنات said...

هو فى دعاء دايما ااقوله
عندما اترك بناتى وبيتى
اللهم انى استودعتك بيتى فأنت خير حافظا"
وبرضه اللهم انى استودعتك بناتى فانت خير حافظا"
ولما يذهبوا الى مدارسهم ااقول كده برضه وربنا يحفظنا ويبعد عنا شرار الخلق
العمر لحظة البوست بتاعك مؤلم
ولكنها هى الحياه فى مصر مؤلمه

عن أبي ذر الغفاري رضي الله عنه عن النبي - صلى الله عليه وسلم - فيما يرويه عن ربه عز وجل أنه قال : ( يا عبادي إني حرمت الظلم على نفسي وجعلته بينكم محرما فلا تظالموا ، يا عبادي ، كلكم ضال إلا من هديته ، فاستهدوني أهدكم ، يا عبادي كلكم جائع إلا من أطعمته ، فاستطعموني أطعمكم ، يا عبادي كلكم عار إلا من كسوته ، فاستكسوني أكسكم ، يا عبادي ، إنكم تخطئون بالليل والنهار ، وأنا أغفر الذنوب جميعا ، فاستغفروني أغفر لكم ، يا عبادي ، إنكم لن تبلغوا ضري فتضروني ، ولن تبلغوا نفعي فتنفعوني ، يا عبادي ، لو أن أولكم وآخركم وإنسكم وجنكم كانوا على أتقى قلب رجل واحد منكم ما زاد ذلك في ملكي شيئا ، يا عبادي لو أن أولكم وآخركم وإنسكم وجنكم كانوا على أفجر قلب رجل واحد ما نقص ذلك من ملكي شيئا ، يا عبادي لو أن أولكم وآخركم وإنسكم وجنكم قاموا في صعيد واحد فسألوني فأعطيت كل إنسان مسألته ما نقص ذلك مما عندي إلا كما ينقص المخيط إذا أدخل البحر ، يا عبادي إنما هي أعمالكم أحصيها لكم ثم أوفيكم إياها ، فمن وجد خيرا فليحمد الله ، ومن وجد غير ذلك فلا يلومن إلا نفسه ) . تخريج الحديث أخرجه مسلم ولم يخرجه غيره من أصحاب الكتب الستة.