Thursday, January 17, 2008

اول يوم في دورة المعلمات

في شهر سبتمبر 2005.. بدات دراسة التجويد وفي شهر ابريل 2006 بدات في حفظ القرآن الكريم من اول جزء مع التوسع في دراسة التجويد .. وكانت قراءتي ولله الحمد طيبة
رشحتني معلمتي مع اخريات للقراءة عند الدكتورة عميدة االمعهد لدخول دورة معلمات القرآن التي ينظمها المعهد ويشترط لدخولها حفظ 15 جزءا وان يكون المتقدمات اصلا معلمات في مساجد او دور تحفيظ اخرى

وبما اننا مازلنا في الجزء الحادي عشر ومن طالبات المعهد فالدكتورة عملت استثناء بشرط حسن الاداء يعني حسن التلاوة وصحة المخارج والاحكام .. يعني تعمل لنا ختبار ونقرا امامها .. والدكتورة ما شاء الله عليها ما بتعديش غلطة وبتطلع غلطات فنية لا يعرفها الا مهرة القراء زي ما بيقولوا .. يعني باختصار مش أي حد يعدي من تحت ايديها

كنت محتارة اروح والا لأ.. معلمة قرآن دي مش لعبة .. ده الواحد بيحفظ بتعدي عليه الآية وهو ما بينفذهاش او بيعصيها كمان وبيبقى مرعوب من حساب ربنا.. امال لما اقعد واعلمها واحفظها يبقى ايه " كبر مقتا عند الله ان تقولوا مالا تفعلون" .. وبعدين موضوع شغلي السابق والحيرة اللي كنت فيها .. لقيتني معلمتي متردده قالت لي صلي استخارة

صليت .. انا عمري ما صليت استخارة الا وربنا يسر لي مافيه الخير
ودخلت وبدات القراءة لكن ماكنتش خايفة ولا متردده وكان عندي هدوء وثبات غريب وما طلعتليش فعلا غير غلطات فنية وقليله جدا وسالتني عن اسمي وقالت لي خلاص احضري معاهم

خرجت من عندها وانا مزأططه من الفرحة .. وأنا نادرا جدا لما حاجة بتخليني أزأطط من الفرحة
وكلمت معلمتي وانا فرحانه زي العيال الصغيرين وباقوللها الدكتورة قبلتني .. دعيتلي كتير وكل زميلاتي فرحوا جدا

والنهارده كان أول يوم احضر

وغصب عني رجعت بذاكرتي لما كنت عليه وازاي اني رحت معهد القرآن بعد ما شغلي وقف بحجة اني فاضية وماوراييش حاجة وعندي وقت كتير على مالاقي شغل تاني .. ماكانش عندي اصلا نية الحفظ فما بالك بالتحفيظ والتعليم .. وكنت حزينة جدا على الشغل اللي سبته لاسباب قهرية مش بارادتي بل بارادة الزملاء والرؤساء وطبيعة الشغل نفسها .. وعلى نمط الحياه اللي كان الشغل موفرهولي .. وعلى احلامي اني اكون استاذه جامعية في مجال شغلي واخد دكتوراه عشان ارتقي فيه اكتر واللي برضه ماكملتهاش لاسباب قهرية

وكان جوايا غضب وسخط .. واحتقار وتقليل من نفسي واني بعد ماخسرت شغلي ودراستي بقيت ولاحاجة

وما ابتديش اقرب من ربنا الا بعد كام موقف حصلوا في حياتي خلوني اؤمن ان احنا مانعرفش الخير فين وان الدنيا دي مش مفروض تكون هي اهتمامنا الاول والاوحد "اعمل لدنياك كانك تعيش ابدا واعمل لآخرتك كانك تموت غدا " و الموت قريب والمرض قريب وماحدش كبير على ربنا

لقيتني النهارده ربنا بيرفعني درجات اعلى من اللي كنت عايزة ارفع نفسي ليها "
اقرأوارتق ورتل كما كنت ترتل في الدنيا فإن منزلتك عند آخر آية تقرؤها" .. لقيتني النهارده مرشحة اشتغل شغل احسن من اللي كنت باشتغله " خَيْرُكُمْ مَنْ تَعَلَّمَ الْقُرْآنَ وَعَلَّمَهُ " ..
لقيتني بعد يوم مالدكتورة قبلتني في الدورة باخد بالي من كل كلمة وكل حركة وكل تصرف باعمله حتى في ابسط الحاجات.. حتى لما جيت ازعق لولادي على حاجة عملوها سكت وافتكرت
" والكاظمين الغيظ" ..

وافتكرت رسولنا صلى الله عليه وسلم
" كان خلقه القرآن " وقلت ازاي نبقى مسلمين وبيقولوا علينا متدينين وما يبقاش خلقنا القرآن في كل حاجة في حياتنا ؟ .. ليهم حق يوجعوا دماغنا بالكلمة اللي طلعوا فيها اليومين دول في برامج التليفزيون ومقالات الجرايد .. التدين القشري .. التدين المظهري .. التدين الظاهري

يارب زي ما بنحرص على المظهر كلنا نحرص على الجوهر

ياارب زي ما بنطهر اجسامنا وهدومنا نطهر قلوبنا

ياارب زي ما بنصلي ونصوم ونروح العمرة نعامل كل خلقك بالحسنى وبما نحب ان يعاملونا به و نأدي حقوق الناس اللي علينا ونقوم بمسؤلياتنا بالشكل اللي يرضيك عننا

يارب زي بنقرا القرآن صح نعمل بكل مافيه صح

اللهم اصلح فمي ولساني لأقيم حروف كتابك

وأصلح قلبي وجوارحي لأقيم حدود كتابك



8 comments:

محمد عبد الغفار said...

ربنا يقدرك ويوفقك ويهديكى ويهدى بك

Ahmed Al-Sabbagh said...

ربنا يكرمك يارب

ربما ده يكون أول تعليق ليا هنا

بس انا جيت قبل كدة

والسمة الغالبة على كل موضوعاتك رغم تنوع أفكارها .. هى حب الحب الخير ..والحماس البناء

جزاكم الله خيرا

وربنا يكرمك يارب

أحمد

الطائر الحزين said...

لو اطلعتم على الغيب لاخترتم الواقع



بالتوفيق ان شاء الله
دعواتك

تحياتى

عصفور المدينة said...

لا أجد تعليقا أفضل مما علقت به يومها

بارك الله فيك وبارك في جهدك

خمسة فضفضة said...

السلام عليكم ورحمة الله وبركاته

ماشاء الله ، الف مبروك وربنا يوفقك

šσяšαяαα said...

السلااااااام عليكممم

ماشاء الله انا فرحانة ليكى جدااا ربنا يوفقك ويجزيكى كل خير يارب

واتمنى انا كمان ارجع احفظ القرآن تانى واجيلك تعلمينى:)

بس يارب يكون العنوان قريب

تحياتى ليكى ونورتينى
وسعيدة بالتعرف على مدونتك

مسلم said...

يقول العلماء إذا أردت أن تعرف عند الله مقامك فأنظر أين أقامك

أحد العلماء علمني دعاء

اللهم دبر لي فإني لا أحسن التدبير

شئ رائع أن يدبر لك الله أمرك فتجدي و كأنك يؤخذ بيدك إلي الطريق لست أنت التي تتحركين إليه و إنما أنت مأخوذه إليه مصحوبه فيه بتوفيق الله

فهذا و الله هو التسديد

و التوفيق كل التوفيق أن يكلك الله إليه و الخذلان كل الخذلان أن يكلك الله إلي نفسك

ما أنت فيه نعمه لو قضيتي أيامك حمداً لها ما كفاك

فإجتهدي في الحمد

و إعلمي أن أعظم الحمد أن تؤدي شكر النعمه من جنسها

فكما أخذ بيدك و علمك

فخذي بيد غيرك و علميه

و إجتهدي

فأنت في خير شغل

إنشغالك بكلام الله

و هل أعظم منه كلام

و هل أعظم منه شغل

أرجوكي أن تدعي الله لي أن يهديني و يغفر لي و يرزقني ما أشتهيه

صوت من مصر said...

بامانه القران شىء جميل
الهم اهدنا جميعا ؟
مدونتك جميله جدا

عن أبي ذر الغفاري رضي الله عنه عن النبي - صلى الله عليه وسلم - فيما يرويه عن ربه عز وجل أنه قال : ( يا عبادي إني حرمت الظلم على نفسي وجعلته بينكم محرما فلا تظالموا ، يا عبادي ، كلكم ضال إلا من هديته ، فاستهدوني أهدكم ، يا عبادي كلكم جائع إلا من أطعمته ، فاستطعموني أطعمكم ، يا عبادي كلكم عار إلا من كسوته ، فاستكسوني أكسكم ، يا عبادي ، إنكم تخطئون بالليل والنهار ، وأنا أغفر الذنوب جميعا ، فاستغفروني أغفر لكم ، يا عبادي ، إنكم لن تبلغوا ضري فتضروني ، ولن تبلغوا نفعي فتنفعوني ، يا عبادي ، لو أن أولكم وآخركم وإنسكم وجنكم كانوا على أتقى قلب رجل واحد منكم ما زاد ذلك في ملكي شيئا ، يا عبادي لو أن أولكم وآخركم وإنسكم وجنكم كانوا على أفجر قلب رجل واحد ما نقص ذلك من ملكي شيئا ، يا عبادي لو أن أولكم وآخركم وإنسكم وجنكم قاموا في صعيد واحد فسألوني فأعطيت كل إنسان مسألته ما نقص ذلك مما عندي إلا كما ينقص المخيط إذا أدخل البحر ، يا عبادي إنما هي أعمالكم أحصيها لكم ثم أوفيكم إياها ، فمن وجد خيرا فليحمد الله ، ومن وجد غير ذلك فلا يلومن إلا نفسه ) . تخريج الحديث أخرجه مسلم ولم يخرجه غيره من أصحاب الكتب الستة.