Thursday, July 5, 2007

فبذلك فليفرحوا

لما تقعد طول عمرك خايف من حاجة معينه تحصل وتعمل كل شئ عشان الحاجة دي ما تحصلش وتقول كله الا دي وبرضه تحصل

ولما تعمل كل حاجه و تحط املك في اللي تتمناه وتجري وتسعى وتضيع سنين وانت بتحاول وبعدين ما يحصلش اللي انت بتتمناه ويخيب املك خصوصا انه فعلا ما فيش امل انك تحقق اللي بتتمناه خلاص الوقت خلص والفرصة ضاعت والجهد كل

ولما تحس ان حياتك انتهت وحلمك راح واملك ضاع

ايه المنقذ هنا من الاكتئاب والاحباط واليأس والاحساس بعدمية ولا جدوى كل شيء

اقول لكم وجربوها

الدعاء ثم الدعاء ثم الدعاء وان ترد نفسك الى الله وان تطلب منه ان يردك اليه ردا جميلا

في الاول هتقول ايه ده بقى

هو عشان راحت مني الدنيا استشيخ واجري عالاخرة

وهتغصب على نفسك ما انت ما لكش حد غيره سبحانه

ولو طاوعتك نفسك هتقول وتدعي بلسانك بس مش بقلبك

وبعدين هتبص حواليك هتلاقي اللي حالتهم اصعب مليون مرة من حالتك

هتحس وقتها بفضل ربنا عليك

هتحس ان اللي راح منك ولا يساوي حاجة طول ما لسه لسانك قادر يسبح بحمده

وعينك قادرة تبص في كتابه

وايدك مطاوعاك ورجلك شايلاك تركع وتسجد خمس مرات في اليوم

وجسمك سليم ومستحمل يصوم ال30 يوم في السنه

ومخك يقدر يحفظ ويستوعب آية ترفعك بحفظها درجة في الجنة

ويبقى طلبك من ربنا حاجة واحدة بس

انه يجعلك دايما في معيته

انك تفضل دايما فاكرة وما تنساهوش ابدا

في كل خطوة بتخطيها

في كل كلمه بتتكلمها

في كل نظرة بتبصها

في كل فكرة بتمر بخيالك

في كل انسان بتقابله وكل موقف يحصللك تعتبر منه

في اداءك للي مكلفك بيه تجاه اللي ليهم حق عليك من خلقه

في اداءك للامانه اللي حملهالك

في قوتك في الحق

وخفض جناحك للمؤمنين

هي دي السعاده

اللي لو علم عنها اهل الدنيا لجالدونا عليها بالسيوف

يا رب اجعلنا ممن قلت عنهم في كتابك:

"قل بفضل الله وبرحمته فبذلك فليفرحوا هو خير مما يجمعون"

سورة يونس اية 58

10 comments:

عصفور المدينة said...

هو خير مما يجمعون

جزاك الله خيرا

Alaa said...

جميلة التذكرة دي
و بالذات موضوع ان الواحد يدعي ربنا في وقت الضيق
ساعات الشيطان بيدخل من هنا و يقولك يا عم هو انتا اصلا مبتدعيش ربنا غير وقت الزنقة
اكيد مش هيجاوبك
مع ان ربنا قال
أمن يجيب المضطر إذا دعاه

و كمان انك وضحتي ان مصيبة كل وحدة في مصيبة اكبر منها و انها مش آخر العالم

احكيلك قصة عجيبة

في راجل .. ضاع منه خمسين جنيه
الراجل قعد يزعض و يقول حرام كده هو انا بالاقي الفلوس
طيب هاكل العيال و امهم منين
انا ناقص
و حالته النفسية باظت

المهم الراجل روح البيت
و بيبص لقا ان بيتهم وقع ؟؟؟
الراجل اتصدم صدمة عمره و جري يسأل الناس
و طبعا نسي موضوع الخمسين جنيه و لا كأنه حصل
الناس قالوله بيتك وقع و مراتك في المستشفى و عايشة

قال الحمد لله في داهية البيت
المهم الست و العيال كويسين

راحوا المستشفى طلعوا كلهم ماتوا
الراجل اتصدم صدمة عمره و نسي موضوع البيت و بقى جزين و بيصرخ على مراته و عياله

خارج من المستشفى مش شايف قدامه
خبطته عربية

شفتي
كل مصيبة في الاعظم منها
و قضا أخف من قضا

سلام عليكم

ma 3lina said...

هو عشان راحت مني الدنيا استشيخ واجري عالاخرة

سبحان الله .. اللي يقول كده بيخالف فطرته البشرية .. لأن اللجوء لله عز وجل عند الشدة والكرب دي فطرة إنسانية كده .. ودعاء الله عز وجل عند المصيبة شيء تلقائي يمارسه المشرك كالموحد ..

{حَتَّى إِذَا كُنتُمْ فِي الْفُلْكِ وَجَرَيْنَ بِهِم بِرِيحٍ طَيِّبَةٍ وَفَرِحُواْ بِهَا جَاءتْهَا رِيحٌ عَاصِفٌ وَجَاءهُمُ الْمَوْجُ مِن كُلِّ مَكَانٍ وَظَنُّواْ أَنَّهُمْ أُحِيطَ بِهِمْ دَعَوُاْ اللّهَ مُخْلِصِينَ لَهُ الدِّينَ لَئِنْ أَنجَيْتَنَا مِنْ هَذِهِ لَنَكُونَنِّ مِنَ الشَّاكِرِينَ}

{فَإِذَا رَكِبُوا فِي الْفُلْكِ دَعَوُا اللَّهَ مُخْلِصِينَ لَهُ الدِّينَ فَلَمَّا نَجَّاهُمْ إِلَى الْبَرِّ إِذَا هُمْ يُشْرِكُونَ}

وإحنا أولى من المشرك باللجوء إلى الله وقت الشدة .. والمفروض نتميز عنه باللجوء إليه في كل وقت كمان

تحياتي للكلمات الطيبة .. وفقك الله دائما

eldoctor said...

تدونة تحتاج كلام كثيرا للرد عليها ...
جزاك الله خيرا .. لى عودة باذن الله

رصاصة طـائشة said...

الدعاء من أعظم أسباب دفع البلاء قبل نزوله ورفعه بعد نزوله
كما أنه سبب في أنشراح الصدور وتفريج الهموم وزوال الغم
وهو ملجأ المظلومين و المستضعفين وأعجز الناس من عجز عن الدعاء

وللدعاء جزاء عظيم يتمثل في :
إما الاستجابة المباشرة
وإما الاستجابة لاحقا
وإما يدخر الدعاء أجرا وثوابا ليوم القيامة .
وقال رسول الله صلى الله عليه
وسلم:
"الدعاء هو العبادة" ثم قرأ: {وَقَالَ رَبُّكُمُ ادْعُونِي أَسْتَجِبْ لَكُم}.

وقال عليه الصلاة والسلام:
"ليس من شيء أكرم على الله تعالى من الدعاء"،
والعلاقة بين الخالق والعبد سواء كانت

بالدعاء او بالصيام او بالصلاة اوبالتصدق فهي مطهرة للقلوب

نصحني صديق ما نصيحة لن انساها ابدا
كلما احسستي بالضيق او بالهم تصدقي
اخرجي مما اعطاكي الله
سيزيل عنك كربك ويفرجه
وبذلك تكوني قد حققتي اكثر من فائدة ترجى


ليس بالدعاء وحده يزول الغم
وان كان المراد هو ابسط اشكال العلاقة وهي التناجي



لكن احيانا فعلا بنجد ان اليائس والفاشل والمحبط يتجهو للخالق
ليس ايمانا منهم واحتسابا بل لانه لا سبيل لهم غير هذا يسلكوه بجهل وبتعصب اعمى
وبالتالي نجد جماعات محبطة ويائسة تسيء للاسلام تحت زعم التدين والتمسك بدين الله
وهم ابعد مايكنوا عن التدين وفهم الدين وحسن تطبيقه
ويفرغوا شحنات حقد وكره ملأت نفوسهم باشخاص لاذنب لهم



ولي تساؤل ارجو ان يتسع صدرك له واستطع ان اعبر عنه
هل أراد الله سبحانه وتعالى عندما قال((ادعوني أستجب لكم))

ما نفهمه نحن او ما تدركه عقولنا
بأن نتجه للخالق بايدينا نشكو له ونتضرع ..فيستجب لنا..ويفرج كربنا


أم ان آداب الدعاء وشروطه هما القصد والغرض
كما قال سبحانه وتعالى
))فليستجيبوا لي وليؤمنوا بي..((صدق الله العظيم فاراد العظيم بالدعاء ان يكون بوابة يدخل منها العبد بطريق الهدايةوليس هو المبتغى

mohand said...

السلام عليكم
ربنا بيفك كرب الكافر لما يلجاء ليه
فما باللك بالمؤمن بيه العاص له

اعتقد ان ربنا بيكون مشتاقله

تحياتي

Fedaa AL Eslam said...

السلام عليكم ورحمة الله وبركاته

جزكى الله خيرا على المدونة الرائعه ديه

الطائر الحزين said...

السلام عليكم

وظنوا أن لا ملجأ من الله الا اليه
الواحد بعد ما يعمل ذنب ويحاول يرجع لله يقول ازاى وبأى وش أدعوة مع ان الدعاء اصلا معمول علشان كدة

تحياتى

المجاهدة said...

جزاكى الله خيراً كثيراً
:)

وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لا تَعْلَمُونَ


لو حد بيتعب عشان حاجة و بذل فيها كل ما في وسعه و ماجاتش... يكون عنجه يقين تماما انها الحاجة دي مش ليه
و مش خير ليه انها تبقى عنده

ف الحمد لله انها ماجاتش
:)

جزاكى الله خيراً كثرياً على التذكرة

المدونة جميلة اوى ماشاء الله... زرتها من كام يوم بس للاسف الوقت ماأسعفش انى اسيب تعليق
ربنا يبارك فيكي
:)

لحظة said...

جزاكم الله خيرا جميعا
اسمحوا لي ان ارد على تعليقاتكم في التدوينه التالية لاوضح وجة نظري اكثر

عصفور المدينة
جزانا واياكم

*************

علاء

القصة حلوة قوي
لو علمتم الغيب لاخترتم الواقع
واللي يشوف غيره ......

*************

ما علينا

عندما الجا الى الله وقت الشده هو فعلا عمل فعلي تلقائي
لاني اكون في وقت ضعف
المهم ان الجا اليه وقت الصحة والقدرة والرخاء
ربنا ينولهالنا جميعا

******************

الدكتور

في انتظاركم يا استاذي الفاضل

*****************

رصاصة طائشة

شكرا جزيلا لمرورك
تعليقك هو الذي سيجعلني اكتب تدوينه اخرى لما اثرته لدي من افكار
وساجيب على تساؤلك فيها
فشكرا لك

*****************

مهند


قال رسول الله ‏ ‏صلى الله عليه وسلم ‏ ‏يقول الله عز وجل يا عبادي ‏ ‏كلكم مذنب إلا من عافيت فاستغفروني أغفر لكم ومن علم أني أقدر على المغفرة فاستغفرني بقدرتي غفرت له ولا ‏ ‏أبال ‏ ‏وكلكم ضال إلا من هديت فاستهدوني أهدكم وكلكم فقير إلا من أغنيت فاسألوني أغنكم ولو أن أولكم وآخركم وحيكم وميتكم ورطبكم ويابسكم اجتمعوا على أشقى قلب من قلوب عبادي ما نقص في ملكي جناح بعوضة ولو اجتمعوا على أتقى قلب عبد من عبادي ما زاد في ملكي من جناح بعوضة ولو أن أولكم وآخركم وحيكم وميتكم ورطبكم ويابسكم اجتمعوا فسألني كل سائل منهم ما بلغت أمنيته فأعطيت كل سائل منهم ما سأل ما نقصني كما لو أن أحدكم مر بشفة البحر فغمس فيه إبرة ثم انتزعها كذلك لا ينقص من ملكي ذلك بأني ‏ ‏جواد ‏ ‏ماجد ‏ ‏صمد ‏ ‏عطائي كلام وعذابي كلام إذا أردت شيئا فإنما أقول له كن فيكون
الحديث في مسند احمد

تحياتي لمرورك

*****************


فداء الاسلام

جزانا واياكم
تحياتي لمرورك

*******************


الطائر الحزين

جزاك الله خيرا
تحياتي لمرورك

****************


المجاهدة

جزاك الله خيرا
انت فهمتيني صح

*****************

عن أبي ذر الغفاري رضي الله عنه عن النبي - صلى الله عليه وسلم - فيما يرويه عن ربه عز وجل أنه قال : ( يا عبادي إني حرمت الظلم على نفسي وجعلته بينكم محرما فلا تظالموا ، يا عبادي ، كلكم ضال إلا من هديته ، فاستهدوني أهدكم ، يا عبادي كلكم جائع إلا من أطعمته ، فاستطعموني أطعمكم ، يا عبادي كلكم عار إلا من كسوته ، فاستكسوني أكسكم ، يا عبادي ، إنكم تخطئون بالليل والنهار ، وأنا أغفر الذنوب جميعا ، فاستغفروني أغفر لكم ، يا عبادي ، إنكم لن تبلغوا ضري فتضروني ، ولن تبلغوا نفعي فتنفعوني ، يا عبادي ، لو أن أولكم وآخركم وإنسكم وجنكم كانوا على أتقى قلب رجل واحد منكم ما زاد ذلك في ملكي شيئا ، يا عبادي لو أن أولكم وآخركم وإنسكم وجنكم كانوا على أفجر قلب رجل واحد ما نقص ذلك من ملكي شيئا ، يا عبادي لو أن أولكم وآخركم وإنسكم وجنكم قاموا في صعيد واحد فسألوني فأعطيت كل إنسان مسألته ما نقص ذلك مما عندي إلا كما ينقص المخيط إذا أدخل البحر ، يا عبادي إنما هي أعمالكم أحصيها لكم ثم أوفيكم إياها ، فمن وجد خيرا فليحمد الله ، ومن وجد غير ذلك فلا يلومن إلا نفسه ) . تخريج الحديث أخرجه مسلم ولم يخرجه غيره من أصحاب الكتب الستة.