Tuesday, May 22, 2007

اول تاج

ده اول تاج يجيلي
جالي من العزيزة شيرمين
متشكرة اوي انك افتكرتيني
وانا سعيدة جدا على عكس اي حد بيجيله تاج بيضايق مش عارفة ليه؟
ودي اجاباتي

أحب شخص لقلبك فى الدنيا؟

"احبب حبيبك هوناً ما فعسى ان يكون بغيضك يوماً ما"

-------------------------------------

انسان مستعد تضحي بحياتك – ركز فى كلمة حياتك - عشانه؟

ممكن اقول دلوقت بس وقت الجد ما اضمنش نفسي

--------------------------------------

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

اي حد بيأذي اي حد من غير ما يعمل له حاجة

سواء كان هيستفيد او لأ

وسواء كان أذى مادي او معنوي

بالقول او بالفعل

كبير او صغير

مباشر او غير مباشر

بنفسه او بتحريض منه

ودول كتير أوي دلوقت

تأذيني ليه؟ انا عملت لك ايه؟ ما انا عايشة في حالي وساكته

عشان كدة باتمنى اقتل ناس كتير جدااااااااااا

----------------------------------------

ما هو:اسم أجمل كتاب كتبه بشر قرأته ومحتفظ به حتى الان؟

سلسلة ما وراء الطبيعة "ما حدش يبصلي، فيها معلومات لا بأس بها ود. رفعت اسماعيل بيضحكني"

--------------------------------

اسم كتاب -كتبه بشر برضة- انت متعلق بيه وبتقرأه كل فترة؟

كما سبق

----------------------------------------

اهم جهاز منزلى انت متعلق بيه او بتستخدمه كتير؟

المكواه و الكمبيوتر بعد ما دخلت ال دي اس ال

-----------------------------------------

مكان تحس بالراحة عندما تدخله؟

بيتي

-----------------------------------------------------

شىء تحس بالراحة النفسية عندما تنظر اليه؟

ارنوب فرو أبيض في بمبي عندي من ايام الجامعة

----------------------------------------------

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

البحر وأي مكان طبيعي واسع وممتد وفاضي

-----------------------------------------

اجمل مدينة زرتها داخل مصر ؟

6 اكتوبر

في الاحياء اللي مش زحمة

---------------------------------------------

أجمل مكان طبيعي رأيته داخل مصر ؟

اللسان في راس البر: التقاء النيل بالبحر وهمي

-------------------------------------------

شخصية كارتونية بتحبها؟

------------------------------------------

نوع هاتفك المحمول؟

نوكيا ليه؟

---------------------------------------------

سرعة بروسيسور جهازك؟

برضه ليه؟

----------------------------------------------

حجم ذاكرة –هارد- جهازك؟

التلات اسئلة دول ما لهمش علاقة باللي قبلهم ولا اللي بعدهم

------------------------------------------------

المساحة التى تشغلها المواد الاسلامية على جهازك؟

لما بالاقي حاجة كويسة بانزلها وما باحسبش المساحة

---------------------------------------------

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟

طب هارد ازاي؟

---------------------------------------------

أهم هدف انت واضعه لحياتك الآن؟

اني اؤدي مسؤوليتي تجاه الناس اللي انا مسؤولة عنهم وما اقصرش في حقهم

اني اتعلم باستمرار حاجات جديدة وما اتوقفش عن التعلم طول ما في نفس

اني اقدر اشتغل باستمرار واعتمد على الله ثم على نفسي

------------------------------------------------

مواصفات فتاة/ فتى الأحلام بالنسبة لك؟

الموضوع ده عندي ما بيخضعش لمواصفات

ده احساس مع شوية عقل وصلاة استخارة

-----------------------------------------

صف ما يأتى:شعورك لما بتسمع كلمة مصر ؟

بالحسرة

شعورك لما بتسمع كلام عن اليهود؟

بالقرف

شعورك لما بتشوف ظابط شرطة؟

ولا حاجة

شعورك لما بتشوف الكناس العجوز فى الطريق؟

بالالم

-----------------------------------------

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

انا اسفة: باتضايق لانه الدين فرض على المرأة الحجاب وما فرضش على الراجل المظهر ده ، ما فيش زي اسلامي معين لا للرجل ولا للمراة والرسول علية الصلاة والسلام كان يرتدي الرداء والازار والثوب وكان عنده بردة وكان بيجيله ملابس هدايا من بلدان اخرى زي البردة التي اهديت له من اليمن يعني الملابس المتاحة والمتعارف عليها في العصر اللي هم عايشين فيه واهم شيء هو ستر الجسم و انه ما يكونش حرير (بالنسبة للرجال) والملابس المناسبة في المكان المناسب يعني كان وقت الحرب له زي وفي البيت وسط الاهل زي ومع الناس زي ووقت الحج زي، ومعروف ان الجلابية والعمامه هو لبس تقليدي في بعض البلدان و بيدي انطباع مش مجال مناقشته هنا، ايه المشكله لمانلبس ملابس عادية و محترمة وساترة ومريحة طالما مش محزق ولا مقطع ولا واقع ولا ديرتي ولا عليها كلمات ولا رسومات سيئة وتخالف الدين والادب؟ زي ما ده منتقد ده كمان منتقد .وصحيح الرجل يطلق لحيته بس ما فيش مانع انه يهذبها اما موضوع المصحف والسواك فكل انسان حر يشيل مصحف او حتى كتاب عادي والسواك اهه في جيبه وله وقته ومكانه سنة مع الوضوء وقبل الصلاه وقبل قراءة القرآن يعني مش لازم يطلع في المواصلات العامة او في الشغل او وسط الناس، اللي بيلبس كده عايز يقتدي بالجيل الاول من الصحابة وعايز ينشر فكرة الالتزام والتدين بين الناس لكن الاوقع انه يقتدي بسلوكياتهم واعمالهم ويظهرها للناس عشان هم كمان يقتدو بيها وده مش هيكون بالجلابية والعمامة

-------------------------------------------

احساس يراودك فى اشارة مرور مغلقة بسبب مسئول كبير؟

باتنرفز جدا بس ايه يعني ما اتفلق

ايه يعني طالب رايح امتحان والا واحد هيتاخر على شغله او واحد هتفوته طيارته والا ست سايبة ولادها لوحدهم في البيت والاواحد تعبان عايز يروح مستشفى

كلنا نروح فداء عشان المسئول يعدي بسرعة وسلامة

---------------------------------------


14 comments:

Rosa said...

اول كومنت برده يا لحظه ولا يهمك اهو
عجبني ردك اوي في موضوع ما رايك في شاب لابس جلابيه بيضا
بجد تسلم ايدك
تحياتي ليكي
ومبروك اللوك الجديد
تحياتي

حقى اهرتل said...

يامجرى ريق القلم على ورقه م الدفتر
اوعى لكلام خداع قبل الميعاد يفطر
خليه يكمل صوم لحد سبت النور
لو قش هوه ببنت بالتالته هيبصر

وشوشات said...

تم الرد على التاج يا فندم.. و اسمحي لي اني أقتبس بعض ردودك اللي حسيت ان هي انا بالظبط :)

shermen said...

ميرسي يا قمر إنك جاوبتي التاج
وإجاباتك كلها تتسم بخفة الدم والجمال والرقة والتلقائية والصدق اللي انا حسيته فيها
----------------------
مبرك على الشكل الجديد للبلوج
أختيارك جميل وذوقك عالي

تحياتي القلبيه يا قمر

لحظة said...

rosa
تسلميلي وتفضلي دايما اول تعليق اشوفه
الله يبارك فيك
**************
حقي اهرتل
انا مش فاهمة حاجة وشكلي هاروح اشوف مدونتك يمكن افهم
بس اسمحلي انا ما بافهمش الهرتلة وما بحبهاش
**************
علا حبيبتي
نورتيني
وعلم هاروح اشوف اجاباتك حالا
والمدونة كلها تحت امرك
مش انا قلت ان احنا توأم
**************
شيرمين رفيقة التدوين
ميرسي ليكي انت يا جميلة
اخجلتيني
يارب اشوفك هنا دايما
***************

shermen said...

انتي فين يا قمر من زمان
وحشتيني

ma 3lina said...

السلام عليكم ورحمة الله وبركاته

كيف حال أختنا .. يارب تكوني في أحسن صحة وحال ..

عندي سؤال
:">

إذا كان اللبس حرية شخصية ومفيش زي معين الراجل يلبسه والرسول علية الصلاة والسلام كان يرتدي الرداء والازار والثوب وأهم حاجة إنه يكون ساتر الجسم ومش حرير ومش محزق ولا مقطع ولا واقع ولا ديرتي ولا عليه كلمات ولا رسومات سيئة وتخالف الدين والادب

لما هي دي آداب الملبس بالنسبة للرجل ..

حضرتك بقى ليه بتتضايقي لما تشوفيني في الشارع هو أنا بعمل حاجة من الحاجات دي

:D

ياريت لو حضرتك شفتيني في الشارع واتضايقتي .. افتكري إن أحب الثياب إلى رسول الله القميص وهو اللي قال البسوا من ثيابكم البياض .. وأنا بتشبه بيه عشان اللي بيحب حد بيبقى عامل زي الطفل الصغير ويقلده .. حتى اسألي المعجبين بتوع المغنيين ولعيبة الكورة

كمان هو اللي قال للرجال اطلقوا اللحى وقال لي استاكوا عند كل صلاة وأمرنا بالاستفادة من أوقاتنا دايما .. عشان كده المصحف والسواك ضروري في خروجاتنا

معلش طولت عليكي سامحيني أول زيارة كده واعمل مشاكل .. معلش .. اعذريني

لحظة said...

تعليق خارج السياق وان كان في الموضوع
اخونا ما علينا
اسفة برده ان دي اول مرة ازور مدونتك وباعتذر ان كنت ضايقتك بس انا قلت ارجع ارد عليك عندك في بيتك
اولا:الزي مش مناسب لايامنا دي وانت ما تقدرش تروح شغلك كده وفيه ناس بتتخانق في الشغل عشان المظهر
ثانيا:قلت انه كمان الملابس المقطعة والواقعة واللي عليها رسومات وكلمات مسيئة كمان منتقده
ثالثا:فيه حاجة اسمها المظهر العام مادام الملابس مش بتخالف الشرع والدين ما البسهاش ايه؟
ايه مشكلتكم في البدلة والقميص والبنطلون؟
وما تقولليش مخالفة للكفار لان الرسول صلى الله عليه وسلم لما لبس القميص والبرده هل كانوا الكفار في وقته ما بيلبسوهاش؟ كان بيلبس الملابس المتاحة في عصره وما عملش زي موحد للمسلمين هو بس حبب لهم البياض؟
رابعا: انت عارف وانا عارفة اللبس ده بيفكرنا كلنا بمين وللاسف الوحش خد الكويس في سكته وللاسف فيه ناس كتير اساءت لهذا المظهر وادت عنه انطباع وحش جدا للي لابسينه فليه ما يكونش اقتدائي بسلوكي واعمالي مادام ما خالفتش في مظهري اوامر ربي؟
انا باضايق من المظهر مش من السلوك
ومش من الانسان اللي لابس كده لاني ما اتعاملتش معاه عشان احكم عليه
خامسا : انا ما اعترضتش على المصحف انا نفسي مصحفي في شنطتي ودايما بافتحة واقرا فيف في المترو والمواصلات بس ما ينفعش اقرا وانا ماشي في الشارع جنب العربيات زي ما شفت بعض الناس ده حتى يبقى فين التدبر والتركيز هنا؟
شادسا : السواك مرضاة للرب والتخلف بس هو اللي يمتنع عن حاجة بسيطة زي دي ترضي عنه ربنا لكن انت قلت بنفسك زي ما انا قلت انه قبل الصلاة وقراءة القرآن مش وسط الناس في الشارع او قاعد باتكلم معاهم اقوم اطلع استاك

كل ده مبالغة في مظهرية ما اعتقدش ابدا ان الرسول عليه الصلاة والسلام امرنا بيها
هو حد يطول يطبق سنه رسوله وياخد عليها قد كدة حسنات وينال بيها شفاعته؟ لكن لكل شيئ اصول ولكل وقت اذان ولكل مقام مقال

ارجو ان دي تكون معرفة خير بيننا
ومقدمه للمزيد من التواصل في الخير واسفة عشان طولت كل ده سامح

رفقة عمر said...

عجبنى ردك على سؤال فتى الاحلام احساس مع شويه تفكير وصلاه استخاره
ربنا يراضيكى ويعطيك الخير اللهم امين يارب العالمين

Alaa said...

ربنا يستر
تقتلي ناس كتير :)
انا مش منهم .. مش كده ؟

أول زيارة للمدونة و أكثر من رائعة ماشاء الله
ربنا يباركلك و يحفظك
و بالنسبة لطلب حضرتك
أكيد معنديش أي مانع طبعا ان شاء الله
ايميلي في البروفايل

لحظة said...

الاخت العزيزة رفقة عمر
بما انك قفلت التعليقات مضطرة اعلق هنا
متشكرة قوي لزيارتك بجد فرحتيني لاني من يوم ما دخلت مدونتك حسيت انك قريبة لقلبي
جزاك الله خيرا وياريت نبقى اخوات بجد

لحظة said...

علاء
مش عارفة اشكرك ازاي
فرحتني جدا
متشكرة لزيارتك

ma 3lina said...

والله يا أختي يكفيني تشريف حضرتك ليا .. أنا متفهم وجهة نظر حضرتك تماما .. وعلى فكرة أنا غالب لبسي بنطلون وقميص زي ما قلت في التاج دا عندي .. بس كان نفسي إن حضرتك لو قابلتيني في مرة ولقيتيني بالقميص الأبيض ما تتضايقيش عشان مش أحب أكون سبب في ضيق حد .. عموما أنا متأكد إن معرفتنا معرفة خير بفضل الله ..

وعلى فكرة إنا مش زعلان خالص وكنت بضحك كمان .. وكنت بقول لواحدة من المدونات ياريت تكتب رأيها بصراحة في المواضيع دي .. عشان لو كان واحد بالهيئة دي بيعمل حاجة غلط ينتبه ليها ويعرف رأي الناس فما يكررهاش ... يعني حضرتك عملتي ليا حاجة كويسة جدا بصراحتك الجميلة .. ومش عارف اكافئ حضرتك إزاي .. ربنا يبارك فيكي ويحقق لك كل ما تتمنيه

إيمان الحسيني said...

فينك يا لحظة ؟
مختفية بقالك كتير
لعل المانع خير

عن أبي ذر الغفاري رضي الله عنه عن النبي - صلى الله عليه وسلم - فيما يرويه عن ربه عز وجل أنه قال : ( يا عبادي إني حرمت الظلم على نفسي وجعلته بينكم محرما فلا تظالموا ، يا عبادي ، كلكم ضال إلا من هديته ، فاستهدوني أهدكم ، يا عبادي كلكم جائع إلا من أطعمته ، فاستطعموني أطعمكم ، يا عبادي كلكم عار إلا من كسوته ، فاستكسوني أكسكم ، يا عبادي ، إنكم تخطئون بالليل والنهار ، وأنا أغفر الذنوب جميعا ، فاستغفروني أغفر لكم ، يا عبادي ، إنكم لن تبلغوا ضري فتضروني ، ولن تبلغوا نفعي فتنفعوني ، يا عبادي ، لو أن أولكم وآخركم وإنسكم وجنكم كانوا على أتقى قلب رجل واحد منكم ما زاد ذلك في ملكي شيئا ، يا عبادي لو أن أولكم وآخركم وإنسكم وجنكم كانوا على أفجر قلب رجل واحد ما نقص ذلك من ملكي شيئا ، يا عبادي لو أن أولكم وآخركم وإنسكم وجنكم قاموا في صعيد واحد فسألوني فأعطيت كل إنسان مسألته ما نقص ذلك مما عندي إلا كما ينقص المخيط إذا أدخل البحر ، يا عبادي إنما هي أعمالكم أحصيها لكم ثم أوفيكم إياها ، فمن وجد خيرا فليحمد الله ، ومن وجد غير ذلك فلا يلومن إلا نفسه ) . تخريج الحديث أخرجه مسلم ولم يخرجه غيره من أصحاب الكتب الستة.