Tuesday, April 22, 2008

اتسرقت

امبارح
وانا راجعه من مشوار مهم وصلت لشارعنا قبل بيتنا بعمارتين عدى من جنبي موتوسيكل خطفوا مني الشنطة ووقعت على الارض واتعورت في ايدي وركبي وهدومي اتقطعت
ده الموقف باختصار
الموقف بتفصيل شوية
اني كنت راجعه من عند الدكتورة اللي نصحتني بالانجاب مرة ثالثة بعد ما كبرت الولاد وسني كمان بقى 34 سنة
وبالرغم اني حافظة الايات "نحن نرزقكم واياهم" الا ان الاوضاع المعيشية خلتني ابصلها بنظرة انتي مش عايشة في الدنيا والا ايه؟
وكذلك امر بظروف عائلية تحتم علي مسئوليات عائلية جسيمة
بقيت عماله اقول لنفسي يعني اجيب لنفسي كمان مسئوليه عاشرة اخد بالي منها
امال انا هاعيش لنفسي امتى
وفضلت ماشية اكلم نفسي بوساوس الشيطان دي اللي خلتني اتيقن اني برغم حفظي لاكثر من ثلث القران حتى الان فلست الا " كمثل الحمار يحمل اسفارا" او على اضعف الايمان انا حافظة مش فاهمة
وفي عز كلامي مع نفسي وسرحاني وانا ماشية حصلت السرقة
برغم الخضة والالم والجروح اللي اصابتني ومرواحي للقسم مع زوجي وقريبي ضابط الشرطة عشان اعمل محضر عارفة انه مش هيجيب نتيجة وانه مايساويش الورق اللي اتكتب عليه وانهم في نفس الليله عندهم حادثتين قتل يعني هيسيبوهم ويدورو على حرامي الشنطة؟ لكن بس عشان اعرف اطلع بدل فاقد للبطاقات والكارنيهات اللي راحت
برغم كل ده قعدت في بيتنا بعد ماهديت ودموعي شغاله بلا انقطاع وزوجي يهديني انه مش مهم الفلوس ولا الموبايل والكارنيهات نعمل بدلها ونمر التليفونات هنعرف نلمها
وان الحمد لله ان الموضوع كان جنب البيت مش بعيد
وان ماجراليش حاجة وولاد الحلال نقلوني مستشفى وانا لامعايا بطاقة ولا نمرة تليفون وكنا دخنا وما عرفناش جرالك ايه
انا كنت بافكر في اتجاهات تانية
ان ربنا سبحانه حب يفكرني
ان الحافظ هو الله وان الرازق هو الله
وانه " وان يمسسك الله بضر فلا كاشف له الا هو وان يردك بخير فلا راد لفضله " و

سالت نفسي هو انا زعلانه ليه؟

زعلانه عالشنطة عشان كانت غالية وشيك ومابقلهاش معايا شهرين؟ لا انا مش هاشيل شنط تاني انا بعد كده هاخيط جيوب في كل هدومي
زعلانه عالموبايل اللي جايلي هدية مابقالوش اسبوعين؟ لا مانا موبيالي القديم لسه معايا ومن فات قديمه تاه مش لازم يعني تبقى رنة موبايلي كوووول على راي محمد عبد الغفار
زعلانة على اقلامي اللي كان منها جوايز لتفوقي اثناء دراستي وكانت قيمة وعزيزة جدا على قلبي؟ لا ده البني ادم العزيز علينا بيروح هنزعل على قلم
زعلانه عالفلاش ميموري اللي جبتها بعد كتير وكان نفسي فيها من ايام ماكنت باشتغل من 3 سنين؟ لا ده انا حتى بعد ما جبتها لقيتها مش لازماني قوي بعد ما قعدت في البيت
زعلانه عاللف والمصاريف اللي هاتكلفها عشان اطلع بدل فاقد للبطاقة والكارنيهات ؟ لا بسيطة

امال زعلانه ليه؟

من الخضة
من ظلم الانسان لاخيه الانسان
ده الرسول عليه الصلاة والسلام قال فيما معناه كل المسلم على المسلم حرام دمه وماله وعرضه
حمدت ربنا انها جات في المال وماجاتش في الاتنين التانيين
من ان زوجي اول مانزلنا عشان نعمل المحضر اصر يلف في المنطقة بالعربية يمكن نشوف الموتوسيكل او الولد او حتى الشنطة يكونو خدوا الفلوس ورموها بالورق والبطايق
واحنا بنلف لقينا قهوة وانا اشتبهت في الولد اللي سرقني لانه كان لابس مقلم اسود في ابيض والموتوسيكل كان جنبه
وقلت كده في القسم
قالولي هنوريكي صور قلتلهم مش متاكده من وشه ماقدرش اظلم حد انا شفته من ظهره وهدومه
وفي نفس الوقت لو كان هو ماقدرش نتعرضله و حتى لو طلبتله النجده زي ماقال قريبي الضابط وقلت اني باتهمه ماهو هيعرفنا ويمكن يضرنا ويضر اولادنا او يتهور وديتها حته مطواه مع كل واحد من العينه دي
زعلانه عشان خفت عشان مش هنقدر ندافع عن حقنا ونجيبه
زعلانه عشان هاقعد وقت طويل اخاف انزل الشارع واخاف الولاد ينزلوا لوحدهم واني مش هاقدر اروح مشوار الا لما اعطل زوجي عن شغله ومصالحه عشان يوديني ويجيبني
زعلانه عشان دي مش اول مرة تحصللي
حصلت قبل كده وانا حامل في ابني الاولاني وشدوا من رقبتي السلسله وكان برضة موتوسيكل وكان الولد لابس مقلم وفي نفس الشارع لدرجة انه بيتهيالي انه نفس الولد اللي سرقني المرة دي كمان
زعلانه عشان لما تسرقت مني السلسلة بعدها بدقيقتين عدى البوكس الزرق مليان عساكر وضباط ووقفته وقلتله وشاورتله على المكان اللي مشيوا منه سمعني ببرود وقاللي مش هاقدر اروح وراه انا عندي مامورية خلتني ابصله وقتها بذهول و وسابني ومشي
زعلانه لانه الناس تبلدت وماحدش بيساعد حد ولا بينجد حد برغم ان الشارع كان مليان ناس والمحلات فاتحة ومنورة

بس حمدت ربنا
لاني استرجعت وقلت دعاء المصيبة بعدها على طول وانا طالعه سلم بيتنا متعورة وهدومي متقطعة ومنغير شنطتي
حمدت ربنا لاننا مش زي اللي سرقني مش بناكل سحت وحرام
حمدت ربنا لاني واحنا بنلف بقيت بقول اللهم رب الدابة اهدي الدابه فانها من فضلك ورحمتك
حمدت ربنا لانه رزقني ذكره في اللحطات دي
وقعدت افكر عايزة ادعي عليه
وزوجي يقوللي ادعيله ربنا يهديه
للاسف ماعنديش نفس درجة التسامح اللي عند زوجي
وكنت باتالم من جروحي وركبتي اللي ورمت ومش عارفة اصلي كويس
مش عارفة اسجد واحط ركبتي المتعورة ووارمة عالارض
وافتكرت " ويدعون الى السجود فلا يستطيعون" وتعوذت بالله ان اكون منهم
وزوجي يقوللي كل انة الم تزيد من ثوابك وتزيد من ذنبه عايزة ايه تاني
وسرحت في الحديث القدسي اللي ما معناه انه اتنين ظالم ومظلوم يوم القيامة والمظلوم عفا عن ظالمه فربنا سبحانه يدخلهم الجنه هما الاتنين برحمته
لكن انا ايماني مش عالي كده
مش قادرة اسامحه
مش قادرة مازعلش
جروحي بتوجعني قوي

ادعولي ربنا يقوي ايماني


7 comments:

الطائر الحزين said...

ما اجمل التدبر فى الملمات والمصائب وكلها فى الاخر ابتلاءات

ابشرى بحب الله

فانه من احبه ابتلاه

وفقك الله واكرمك

وجزاك خيرا

دعواتك

موناليزا said...

ربنا يفرج همك ويرزقك حلاوة الايمان
والله حاسة بيكى جدا لانى تقريبا محطوطة فى نفس موقفك بل اكتر منه بمراحل مسروقة ومظلومة ومن اقرب الناس كمان تعرفى اختى الحبيبة لما تحسى بالظلم اوى ادعى ربنا بجد لان دعوة المظلوم لاترد شوفى نفسك فى ايه ساعتها وادعى واهم حاجة تكونى واثقة بالاجابة لان ربنا قال انا عند ظن عبدى بى فليظن عبدى ماشاء أقوللك على حاجة انا يقينى فى ربنا ان مسروقاتى دى هترجعلى كلها الكل طبعا مش مصدقنى بس بياخدونى على قد عقلى بس ميعرفوش يعنى ايه تبقى واثقة فى ربنا انا رميت حمولى عليه وانا عارفه انه مش هيضيعنى
اسفة انى كلمتك عن مااعانيه ولكنى اردت ان اعرفك ان مش انتى لوحدك ده فى غيرك واكتر من الموقف ده بمراحل وامانة عليكى تدعيلى
ربنا يبارك لك فى زوجك ويعينك على طاعة الله

Anonymous said...

السلام عليكم ورحمة الله وبركاته

ربنا يبارك فيكىويرضى عليكى ويجزيكى بكل جرح تتالمين منه خير الجزاء

اختنا فى الله اصبرى على الابتلاء واحتسبى عند الله ولتكونى على يقين من ان المولى عز وجل سيعوضك بما سرق منكى خيرا وبما تتالمين يكثر من حسناتك

اعرف ان التسامح فى الوقت الحالى بعد الحادث مباشرة
لن يكون بالهين او السهل ولكن مع مرور الوقت وصفاء القلب ستسامحين كل من اساء اليكى
هكذا هم من يحبون الله ورسوله وانت اهل لهم

بارك الله فيكى وفى زوجك واولادك
ورضى علكى وادخلك الفردوس الاعلى

ولا تنسينى بالدعاء

ma 3lina said...

ربنا يقوي إيماني

أيوه إيماني أنا

:)

حضرتك من المدونات القليلة التي تغيب تغيب ثم تعود برائعة من الروائع ..

عجبني جدا الموضوع برغم الحادثة واسمحيلي ان اقول ان مصائب قوم عند نفس قوم فوائد إن عقلوا

ثبتك الله على الحق واجرى على لسانك الحق .. وآجارك في مصيبتك واخلفك خيرا منها

عصفور المدينة said...

أعانك الله وأخلف عليك

لحظة said...

الطائر الحزين

امين وجزاك الله خيرا

============

monaliza

نصرك الله على من ظلمك
وعوضك خيرا
وجزاك خيرا
اتمنى ان اراك هنا دائما
شرفتيني

============

ام الابناء

جزاك الله كل خير
واستجاب دعائك
ان التسامج امر عظيم
ارجو ان يرزقنا الله الايمان وحلاوة الايمان
شرفتيني

============

ma_3alina

اللهم قوي ايمانك
وجزاك الله خيرا
واستجاب دعاءك
ويجعلنا جميعا من العقلاء
شرفتني

============

عصفور المدينة

جزاك الله خيرا
واعانك على حملك

رفقة عمر said...

ربنا يخلف عليكى اللهم امين
وقولى دعاء اللهم ااجرنى فى مصبيتى واخلفنى خيرا منها
انت ان شاء الله من المؤمنين حقا
اشد اناس بلاءا الامثل فالامثل
وافضل شئ للانسان المؤمن نزول الحوادث عليه لتذكيره بنعم الله عليه ومن مثك هكذا فكر كما تفكرين ويحلل كل موقف من منظر ايمانى
لو احد غيرك كان سخط ولكنك تقبلتيه بالصبر الجمييل وبحكمه
ربنا ييزدك ايمان اللهم امين يارب العالمين

عن أبي ذر الغفاري رضي الله عنه عن النبي - صلى الله عليه وسلم - فيما يرويه عن ربه عز وجل أنه قال : ( يا عبادي إني حرمت الظلم على نفسي وجعلته بينكم محرما فلا تظالموا ، يا عبادي ، كلكم ضال إلا من هديته ، فاستهدوني أهدكم ، يا عبادي كلكم جائع إلا من أطعمته ، فاستطعموني أطعمكم ، يا عبادي كلكم عار إلا من كسوته ، فاستكسوني أكسكم ، يا عبادي ، إنكم تخطئون بالليل والنهار ، وأنا أغفر الذنوب جميعا ، فاستغفروني أغفر لكم ، يا عبادي ، إنكم لن تبلغوا ضري فتضروني ، ولن تبلغوا نفعي فتنفعوني ، يا عبادي ، لو أن أولكم وآخركم وإنسكم وجنكم كانوا على أتقى قلب رجل واحد منكم ما زاد ذلك في ملكي شيئا ، يا عبادي لو أن أولكم وآخركم وإنسكم وجنكم كانوا على أفجر قلب رجل واحد ما نقص ذلك من ملكي شيئا ، يا عبادي لو أن أولكم وآخركم وإنسكم وجنكم قاموا في صعيد واحد فسألوني فأعطيت كل إنسان مسألته ما نقص ذلك مما عندي إلا كما ينقص المخيط إذا أدخل البحر ، يا عبادي إنما هي أعمالكم أحصيها لكم ثم أوفيكم إياها ، فمن وجد خيرا فليحمد الله ، ومن وجد غير ذلك فلا يلومن إلا نفسه ) . تخريج الحديث أخرجه مسلم ولم يخرجه غيره من أصحاب الكتب الستة.