هي

قابلتها من كام شهر .. انسانه عادية جدا لو قابلتها في الشارع مش هتلفت نظرك .. اتعرفت عليها .. كانت ساكنة في نفس العمارة اللي كنت بازور فيها ناس قرايبنا.. كان مجرد سلام من على السلم مصحوبا بعبارات المجاملة المألوفة مع الحاح منها اني ادخل عندها وابقى ازورها

مرة مسكت في واصرت ادخل عندها واقعد معاها شوية .. دخلت .. لقيت شقتها بسيطة وانيقة في نفس الوقت وعملت معايا واجب الضيافة باصرار شديد وبعدين قعدت تحكي.. زي ماتكون كانت مستنيه حد تحكيله

عرفت انها كانت متجوزة من ضابط من حوالي 15 سنة .. فضلوا مع بعض 7 سنين ربنا مارزقهمش اولاد .. وبعدين ربنا كرمهم ببنت زي العسل .. وبعد 4 شهور.. مات جوزها

وعاشت في شقتها لوحدها مع بنتها اللي بقى عندها دلوقت 7 سنين .. مدخلاها مدرسة لغات عريقة وعايشة عشان تربيها وتذاكرلها وتخاف عليها .. ما هو ماعندهاش غيرها .. لا بتشتغل ولا بتروح ولا بتيجي .. ابوها واخوها بيسالو دايما عليها وبيراعوها .. طبعا ادبا مني لاني ما اعرفش ظروف اهلها ايه وتفهما لطبيعة انه اللي بيتعود يستقل ويعيش في بيته ممكن ما يقدرش يرجع يسكن مع اهله تاني خلوني ما اسألهاش هي ما عاشتش مع ابوها ليه؟

لحد هنا والموضوع عادي

لكن اللي مش عادي ان الست الطيبة قوي دي الراضية بنصيبها جالها من حوالي سنه فيروس سي والمرارة والدكتور قالها وش كدة انت ترجعي بيتك تستني كرم ربنا

تخيلوا حالتها .. وهي بتحكيلي قالت لي ياعالم هاعيش مع بنتي دي قد ايه؟ هي طبعا سابت الدكتور ده ربنا يسامحه وراحت لدكتور تاني واهي بتتعالج بالشكل المتاح .. خلصت الزيارة وهي بترجوني ابقى افوت عليها من وقت للتاني.. سبتها وانا قلبي موجوع

لحد هنا برضه الحمد لله على كل شئ .. قابلتها تاني من يومين لقيت وشها فيه حاجة مش طبيعية .. ولما قلتلها سلامتك مالك.. قالت لي انه جالها شلل في وشها والدكتور بيقول انه العصب السابع والا السادس مش عارفة .. هنا ما قدرتش امسك نفسي .. انا ماعرفش ايه هو العصب السابع ده بس كلمة شلل لوحدها تعبتني اوي.. قلتها الف سلامة وانشاء الله خير واستاذنت منها وطلعت اجري على قرايبي وانا معيطة.. ولما قالولي مالك وحكيتلهم قالولي انشاء الله حاجة بسيطة وشوية علاج طبيعي وهتخف ده بيبقى من الزعل او برد

في اللحظة دي فكرت .. يا رب انت خلقتنا وعارف احنا اد ايه ضعفاء.. شوية انفلونزا يرقدونا.. ووقعة في الشارع ممكن تكسر رجلنا وتحبسنا في الجبس شهور.. و.. و.. و

الابتلاء من عندك يارب لحكمه لا ندركها .. وان امرنا بالصبر عليه.. وعرفنا انك سبحانك تكفر به ذنوبنا .. وتجازينا خير الجزاء اذا صبرنا.. وفكرت .. انا ارفل الان في نعمة من الله وعافية اشكره عليها فهل اقوى على الاحتمال والصبر اذا ابتلاني الله

وخفت وارتعبت.. هل اقوى على الاحتمال.. ولم اجد الا ان ادعو الله بالدعاء الذي اسمعه كثيرا " اللهم لا تجعل مصيبتنا في ديننا" وتذكرت قوله تعالى في سورة البقرة:" ولنبلونكم بشئ من الخوف و الجوع ونقص من الاموال والانفس والثمرات وبشر الصابرين* الذين اذا اصابتهم مصيبة قالوا انا لله وانا اليه راجعون * اولئك عليهم صلوات من ربهم ورحمة واولئك هم المهتدون " ( الايات من 155 الى 157 ) وسالت نفسي هل اكون من الصابرين؟ هل قوة ايماني ويقيني تبلغني هذه المنزلة؟

يا رب