العمر لحظة

الحمد لله

2010-04-17T19:29:00.002+03:00

فليت الذي بيني وبينك عامرٌ
و بيني وبين العالمين خرابُ

إذا صحَّ منك الود فالكل هيِّنٌ
وكل الذي فوق التراب ترابُ

ارجوكم ساعدوني

2009-03-10T14:12:00.003+03:00

هذه التدوينة بعد انقطاع طويل

اعتبرها استغاثة للذين ارتاح لهم قلبي واطمئنت اليهم نفسي

اتوسم فيهم ان يساعدوني

واعتقد انهم يهتمون لامري

وهم من ساطلب منهم في مدوناتهم ذلك
وارحب باي راي اخر

ولكن هذه تدوينة شخصية

فمن لا يريد ان يشغل نفسه ويضيع وقته بما لا يهمه

ممكن الا يكمل القراءه
باختصار

لم اعد اعرف كيف اعيش

تهتز اعصابي ويتوه عقلي عند اي مشكله عادية من مشاكل الحياه

لا يسيطر علي الا احساس عدم الجدوى والقيمه

وان الموت افضل

لانني لم اعد اعرف كيف اتعايش

معظم وقتي اقضيه حبيسة منزلي

حتى اولادي عجزت عن التواصل معهم

اؤدي مهامي اليومية بالية وفي اضيق الجدود

لم اعد اقابل احدا او اتكلم مع احد

وان اضررت فانني اضغط على نفسي بشده لكي لا يظهر علي ما اشعر به

لايوجد شئ محدد

كل ما حولي تمام

ولكني عجزت عن التعامل والتفاعل مع مجريات الحياة حولي

انظر الى الناس يسيرون ويتحدثون

فاقول انهم على قيد الحياه

انا ينقصني ان اشعر بالحياه

وارجوكم

واوجه كلامي الى الاخوة والاخوات

الذين بالاصل اوجه لهم رسالتي هذه

لا تقولو لي الزمي الذكر والقران

الاسبوع الماضي امتحنت في 17 جزء من القران

اتوسع في القراءة والعلم

تبهرني الاية ومعناها واهتز لها

ثم اعود لضيقي وكربي

لا تقولو لي شيطان

اخبروني كيف تتكون هذه حالي

وما الحل

قلبي من الداخل

ليس كما يجب ان يكون عليه

اتمنى ان اترك كل شئ وارحل

ان اضع كل حمل وان القي كل احساس بالذنب

اتمنى ان اتحرر من كل قيد

انا على هذا الحال منذ سنوات ولكن الامر اشتد الان حتى لم اعد احتمل

ليس هواي تبعا لما جئت به يا رسول الله

وانني انما اتبعه خوفا من عقاب دنيوي واخروي

ليس قلبي مثل جوارحي

جوارحي تطيع وتنتهي

وقلبي يتمرد ويتمنى

انني كمن يعمل رجيم ونفسه تتوق في كل لحظة للطعام

كل الادلة كل الاحاديث كل قصص الولين كل الحكم كل الايات امامي واعرفها

لكن قلبي في واد اخر

ما الحل؟

لقد حجزت عند طبيب نفسي ولكن الموعد اخر الشهر ولم اعد اطيق

لماذا انتم او غيركم ممن يؤمن بفكرة مطمئن لها ؟

وانا ابدا لا اجد هذا الاطمئنان؟

كيف اجد الايمان؟

المفسد الثالث

2008-12-14T16:04:00.001+03:00

المفسد الثالث من مفسدات القلب: التعلق بغير الله تبارك وتعالى:

وهذا أعظم مفسداته على الإطلاق.

فليس عليه أضر من ذلك، ولا أقطع له عن مصالحه وسعادته منه، فإنه إذا تعلق بغير الله وكله الله إلى ما تعلق به. وخذله من جهة ما تعلق به، وفاته تحصيل مقصوده من الله عز وجل بتعلقه بغيره، والتفاته إلى سواه. فلا على نصيبه من الله حصل، ولا إلى ما أمله ممن تعلق به وصل. قال الله تعالى: { وَاتَّخَذُوا مِن دُونِ اللَّهِ آلِهَةً لِّيَكُونُوا لَهُمْ عِزّاً ، كَلَّا سَيَكْفُرُونَ بِعِبَادَتِهِمْ وَيَكُونُونَ عَلَيْهِمْ ضِدّاً } [مريم:82،81]، وقال تعالى: { وَاتَّخَذُوا مِن دُونِ اللَّهِ آلِهَةً لَعَلَّهُمْ يُنصَرُونَ ، لَا يَسْتَطِيعُونَ نَصْرَهُمْ وَهُمْ لَهُمْ جُندٌ مُّحْضَرُونَ } [يس:75،74].

فأعظم الناس خذلانا من تعلق بغير الله. فإن ما فاته من مصالحه وسعادته وفلاحه أعظم مما حصل له ممن تعلق به، وهو معرض للزوال والفوات. ومثل المتعلق بغير الله: كمثل المستظل من الحر والبرد ببيت العنكبوت، أوهن البيوت.

وبالجملة: فأساس الشرك وقاعدته التي بني عليها: التعلق بغير الله. ولصاحبه الذم والخذلان، كما قال تعالى: { لاَّ تَجْعَل مَعَ اللّهِ إِلَـهاً آخَرَ فَتَقْعُدَ مَذْمُوماً مَّخْذُولاً } [الإسراء:22] مذموما لا حامد لك، مخذولا لا ناصر لك. إذ قد يكون بعض الناس مقهوراً محموداً كالذي قهر بباطل، وقد يكون مذموماً منصوراً كالذي قهر وتسلط بباطل، وقد يكون محموداً منصوراً كالذي تمكن وملك بحق. والمشرك المتعلق بغير الله قسمه أردأ الأقسام الأربعة، لا محمود ولا منصور.

منقول

المفسد الثاني

2008-12-14T16:03:00.002+03:00

المفسد الثاني من مفسدات القلب: ركوبه بحر التمني:

وهو بحر لا ساحل له. وهو البحر الذي يركبه مفاليس العالم، كما قيل: إن المنى رأس أموال المفاليس. فلا تزال أمواج الأماني الكاذبة، والخيالات الباطلة، تتلاعب براكبه كما تتلاعب الكلاب بالجيفة،

وهي بضاعة كل نفس مهينة خسيسة سفلية،
ليست لها همة تنال بها الحقائق الخارجية،
بل اعتاضت عنها بالأماني الذهنية.

وكل بحسب حاله: من متمن للقدوة والسلطان،
وللضرب في الأرض والتطواف في البلدان،
أو للأموال والأثمان، أو للنسوان والمردان،

فيمثل المتمني صورة مطلوبة في نفسه وقد فاز بوصولها والتذ بالظفر بها،
فبينا هو على هذا الحال، إذ استيقظ فإذا يده والحصير!!

وصاحب الهمة العلية أمانيه حائمة حول العلم والإيمان،
والعمل الذي يقربه إلى الله، ويدنيه من جواره.

فأماني هذا إيمان ونور وحكمة،

وأماني أولئك خداع وغرور.

وقد مدح النبي متمني الخير، وربما جعل أجره في بعض الأشياء كأجر فاعله.

منقول

المفسد الاول

2008-12-14T10:02:00.003+03:00

مفسدات القلب الخمسة
...

قال الإمام ابن القيم رحمه الله تعالى: وأما مفسدات القلب الخمسة فهي التي أشار إليها من كثرة الخلطة، والتمني، والتعلق بغير الله، والشبع، والمنام. فهذه الخمسة من أكبر مفسدات القلب.

المفسد الأول: كثرة المخالطة:

فأما ما تؤثره كثرة الخلطة: فامتلاء القلب من دخان أنفاس بني آدم حتى يسود، ويوجب له تشتتا وتفرقا وهما وغما، وضعفا، وحملا لما يعجز عن حمله من مؤنة قرناء السوء، وإضاعة مصالحه، والاشتغال عنها بهم وبأمورهم، وتقسم فكره في أودية مطالبهم وإراداتهم. فماذا يبقى منه لله والدار الآخرة؟

هذا، وكم جلبت خلطة الناس من نقمة، ودفعت من نعمة، وأنزلت من محنة، وعطلت من منحة، وأحلت من رزية، وأوقعت في بلية. وهل آفة الناس إلا الناس؟

وهذه الخلطة التي تكون على نوع مودة في الدنيا، وقضاء وطر بعضهم من بعض، تنقلب إذا حقت الحقائق عداوة، ويعض المخلط عليها يديه ندما، كما قال تعالى: { وَيَوْمَ يَعَضُّ الظَّالِمُ عَلَى يَدَيْهِ يَقُولُ يَا لَيْتَنِي اتَّخَذْتُ مَعَ الرَّسُولِ سَبِيلاً ، يَا وَيْلَتَى لَيْتَنِي لَمْ أَتَّخِذْ فُلَاناً خَلِيلاً ، لَقَدْ أَضَلَّنِي عَنِ الذِّكْرِ بَعْدَ إِذْ جَاءنِي } [الفرقان:27-29] وقال تعالى: { الْأَخِلَّاء يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ } [الزخرف:67]، وقال خليله إبراهيم لقومه: { إِنَّمَا اتَّخَذْتُم مِّن دُونِ اللَّهِ أَوْثَاناً مَّوَدَّةَ بَيْنِكُمْ فِي الْحَيَاةِ الدُّنْيَا ثُمَّ يَوْمَ الْقِيَامَةِ يَكْفُرُ بَعْضُكُم بِبَعْضٍ وَيَلْعَنُ بَعْضُكُم بَعْضاً وَمَأْوَاكُمُ النَّارُ وَمَا لَكُم مِّن نَّاصِرِينَ } [العنكبوت:25]، وهذا شأن كل مشتركين في غرضك يتوادون ما داموا متساعدين على حصوله، فإذا انقطع ذلك الغرض، أعقب ندامة وحزناً وألماً وانقلبت تلك المودة بغضاً ولعنة، وذماً من بعضهم لبعض.

والضابط النافع في أمر الخلطة: أن يخالط الناس في الخير كالجمعة والجماعة، والأعياد والحج، وتعلم العلم، والجهاد، والنصيحة، ويعتزلهم في الشر وفضول المباحات.

فإن دعت الحاجة إلى خلطتهم في الشر، ولم يمكنه اعتزالهم: فالحذر الحذر أن يوافقهم، وليصبر على أذاهم، فإنهم لابد أن يؤذوه إن لم يكن له قوة ولا ناصر. ولكن أذى يعقبه عز ومحبة له، وتعظيم وثناء عليه منهم، ومن المؤمنين، ومن رب العالمين، وموافقتهم يعقبها ذل وبغض له، ومقت، وذم منهم، ومن المؤمنين، ومن رب العالمين. فالصبر على أذاهم خير وأحسن عاقبة، وأحمد مالا.

وإن دعت الحاجة إلى خلطتهم في فضول المباحات، فليجتهد أن يقلب ذلك المجلس طاعة لله إن أمكنه.

منقـــــــــــــــــــــــــــــول

انا نفسي اتعب بشده من زحمة الناس
وكثرة الكلام
وبالذات التليفونات
ولو نظرنا نجد 90% من كلامنا هو عن الناس
دي قالت ودي عملت ودي راحت
قصص وحكايات
لا ليها لازمة ولا منها فايدة
لو كنا نتقابل نتكلم في المفيد
نعمل نادي كتاب
نقرا كلنا كتاب ونتناقش فيه
نتابع الاخبار
نقول معلومة ماكانتش معلومة لينا
نجتمع على عمل خير
ولكن .....

بالتي هي أحسن

2008-11-17T09:36:00.003+03:00

"وقل لعبادي يقولوا التي هي أحسن إن الشيطان ينزغ بينهم إن الشيطان كان للإنسان عدواً مبينا"

الإسراء - 53

" ولا تستوي الحسنة ولا السيئة ادفع بالتي هي أحسن فإذا الذي بينك وبينه عداوة كأنه ولي حميم * وما يلقاها إلا الذين صبروا وما يلقاها إلا ذو حظٍ عظيم * وأما ينزغنك من الشيطان نزغُ فاستعذ بالله إنه هو السميع العليم "

فصلت - 34 - 35 - 36

النصف الباقي

2008-09-14T12:24:00.004+03:00

مر سريعا جدا .. أكاد ألهث لكي ألاحقه فلا أستطيع .. عاهدت نفسي على اغتنامه وعدم تضييعه .. حاولت ان أخاصم كل شيء قد يلهيني عنه .. ولم أصل الى النتيجة المرجوة

نتيجة تشعرني بحد أدنى من الرضا .. وأمل واهن في القبول

فهل استطيع اللحاق بما تبقى؟

اتنين

2008-06-15T17:14:00.004+03:00

عقبال كل البنات ربنا يكرمهم بالزوج الصالح والخلف الصالح
بنتين بيجهزوا
الاولى
بتقول
انها اشترت " رفايعها " ب 35000
وعمالة تحنتف في الشقه وتختار بمنتهى الدقة في العفش ورجل الكرسي شكلها ايه لا لازم كرسيين لاكتورز واتنين باجير
وهنا اتنين ابليك في وسطهم تابلوه
وهنا دفاية ديكور
ولازم كونسول مراية مدهب
وشايفة انها اتنازلت لما جابت السيراميك فرز تالت
والنقاش قرب يطفش من الالوان اللي اتغيرت مرتين وتلاته
لا اللون بيج لا كاكاوي لا اسبونش واخر حاجة الحيطة مقلمة لون ولون
وطول ماهي ماشية تقول ماشفتش زي صالوني ماشفتش زي حاجتي
انا عايزة اللي يدخل شقتي يقول واو ماشفناش زي كده
مصممه تدخل شقتها تبقى كاملة مكمله مش ناقصها حاجة
ولو حاجة واحده اتعملت مش على مزاجها تعيط وتبات دمعتها على خدها تنعي حظها القليل وبختها المايل

التانية
بتقول
ماماتها ست كبيرة ومريضة ماتقدرش تنزل معاها
ادتلها 3000 جنية ونزلت معاها بنت عمتها عشان تجيب رفايعها
نزلت حمام التلات لقت اول محل طقم صيني عجبها كان تمنه 3000 جنيه
كانت هتعيط لان الفلوس اللي معاها كده مش هتجيب حاجة مالدنيا غليت والاسعار ولعت
بنت عمتها قالت لها استني ماحنا لسه هنلف ونتفرج
لقت فعلا طقم صيني ب 400 وب 500 جنيه
بس حالتهم صعب قوي
لفت كمان لحد مالقت طقم عجبها فاصلت وخدته ب 900 جنيه
وطقم اركوبال ب 500 وببقية الفلوس جابت طقم ميلامين وطقم الومنيوم وطقم حلل استانلس بغطا بايركس وجيد الصنع كمان واتبقى معاها 200 جنية وروحت مبسوطه وطايرة من الفرح بحاجتها

انا عارفة انه ربنا سبحانه وتعالى خلق الناس درجات
واحل لهم طيبات الحياه وزينتها بالحلال
ولم يفرض عليهم التقشف ولا الزهد

ربنا سبحانه وتعالى قال
"قل من حرم زينة الله التي اخرج لعباده والطيبات من الرزق قل هي للذين امنوا في الحياة الدنيا خالصة يوم القيامة كذلك نفصل الايات لقوم يعلمون" الاعراف اية 32

وكمان سبحانه وتعالى قال

""اعلموا انما الحياة الدنيا لعب ولهو وزينة وتفاخر بينكم وتكاثر في الاموال والاولاد كمثل غيث اعجب الكفار نباته ثم يهيج فتراه مصفرا ثم يكون حطاما وفي الاخرة عذاب شديد ومغفرة من الله ورضوان وما الحياة الدنيا الا متاع الغرور
الحديد اية 20"

.

نحن وهم

2008-04-26T12:50:00.005+03:00

تثار ضجة كبيرة حول احداث واشخاص
نتحث عنهم ونحن قابعون في اماكننا
قضايا كبيرة
واحداث مهمة
لا نشارك فيها بعضو من اجسادنا
الا السنتنا
او اصابعنا التي تكتب باقلام او ازرار
اهو راينا الذي نتج عن محاولتنا تشغيل عقولنا في الموضوع
نبوح به لنفتح حوارا مع الاخرين
فنثرى من آرائهم
وتتفتح عقولنا اكثر في محاولة فهم الموضوع بصورة اشمل
ورؤية زوايا لم نكن نراها

ام هي انفعالاتنا الشخصية
نخرجها كي لا نكبتها في صدورنا
ونظل نتحدث
واصفين الحدث بالاهمية او بالتفاهة
واصفين الاشخاص بالابطال او الخونة
منزهين انفسنا عن كل نقيصة

لاننا ضعفاء
وجبناء
ننتظر الحل يهبط علينا من السماء
ننتظر المخلص
تتنظر المهدي
او بطل يسفك دمه من اجلنا
ونحن في امان
لا يصيبنا ظمأ ولا نصب ولا مخمصة في سبيل قضية
او مبدا
لاننا فارغون
ومجوفون
ننتظر حدثا او شخصا
نشغل السنتنا وعقولنا وشاشاتنا
به
ونملا الدنيا صراخا وعويلا وشعارات
اياما ثم نهدا
ونخرس
ونهيل على الحدث التراب
ويصبح الشخص في طي النسيان

ونتمطى نحن في ملل
في انتظار حدث اخر
او شخص اخر

تاركين قيمة العمل الجاد الذي يبني ولا يهدم
تاركين قيمة مساعدة المحتاج واغاثة الملهوف وفك كربة المكروب
تاركين قيمة السعي والعلم والاستفاده والافاده
تاركين فكرة ابدأ بنفسك

نلوك كل الشعارات في افواهنا
ما عدا شعار العمل في صمت
متناسين قيمة الوقت الذي يضيع ولا ينتج عنه الا كلام في كلام
متجاهلين اشخاصا يعملون ويكدحون ويسعون وغاية املهم ان يمر اليوم في ستر
وان تحدث عنهم احد او تصدى لمشاكلهم
فهو فقط لاثراء عموده اليومي او جعل حلقته اكثر سخونة
او لان الاحداث التي على الساحة قد فترت
فيبحث وسط البسطاء عن موضوع يملا به الفراغ
هؤلاء
لا يمكن لاحد ان يتهمهم بالعمالة او الخيانة او البطولة
لانهم ببساطة

غير مرئيون

ملاحظة
من يرى في نفسه مفكرا عظيما او كاتبا كبيرا او اعلاميا رائدا
لا يأخذ الكلام على نفسه

الشنطة رجعت

2008-04-23T19:15:00.003+03:00

الحمد لله الحمد لله الحمد لله
بفضل الله
ثم بفضل الدعاء الذي يقوله من فقد ضالته
ثم بفضل اولاد الحلال الذين قال عنهم نبي الرحمه صلى الله عليه وسلم فيما معناه الخير باق في وفي امتي الى يوم القيامة
امبارح بعد ما نشرت تدوينة "اتسرقت" مباشرة
اتصل بي اخ فاضل يقول ان اولاده وجدو شنطتي مرمية تحت كوبري الدائري بين عربيات مركونة وهم راجعين من المدرسة
واقسم انه مالقاش فيها فلوس
كنت هابكي من الفرحة وانا باشكره وبادعي لاولاده وبسأله عن البطاقة والكارنيهات ونوتة التليفونات
ويقوللي موجوده
حتى الفلاش ميموري
قاللي ماهما ما يفهموش فيها لو يعرفو دي ايه كانوا خدوها
حتى مصحفي اللي اخت خاتمة للقران اهدته لي كان موجود
ماتتصوروش فرحتي
صحيح خدو الفلوس
والموبايل
بس نمر التليفونات والبطاقة والكارنيهات ومصحفي والفلاشة
ياه الحمد لله
انا فرحت قوي
وحبيت اشارككم فرحتي
زي ما شاركتكم همي
وكمان عشان اقول زي ماقلت لاولادي
زي مافيه ناس وحشة
فيه ناس كتير كويسه وبتعمل الخير
الحمدلله
ادعو بظهر الغيب لهذا الرجل ولاولاده ان يبارك الله فيهم ويوقفلهم ولاد الحلال
الحمدلله

اتسرقت

2008-04-22T18:33:00.007+03:00

امبارح
وانا راجعه من مشوار مهم وصلت لشارعنا قبل بيتنا بعمارتين عدى من جنبي موتوسيكل خطفوا مني الشنطة ووقعت على الارض واتعورت في ايدي وركبي وهدومي اتقطعت
ده الموقف باختصار
الموقف بتفصيل شوية
اني كنت راجعه من عند الدكتورة اللي نصحتني بالانجاب مرة ثالثة بعد ما كبرت الولاد وسني كمان بقى 34 سنة
وبالرغم اني حافظة الايات "نحن نرزقكم واياهم" الا ان الاوضاع المعيشية خلتني ابصلها بنظرة انتي مش عايشة في الدنيا والا ايه؟
وكذلك امر بظروف عائلية تحتم علي مسئوليات عائلية جسيمة
بقيت عماله اقول لنفسي يعني اجيب لنفسي كمان مسئوليه عاشرة اخد بالي منها
امال انا هاعيش لنفسي امتى
وفضلت ماشية اكلم نفسي بوساوس الشيطان دي اللي خلتني اتيقن اني برغم حفظي لاكثر من ثلث القران حتى الان فلست الا " كمثل الحمار يحمل اسفارا" او على اضعف الايمان انا حافظة مش فاهمة
وفي عز كلامي مع نفسي وسرحاني وانا ماشية حصلت السرقة
برغم الخضة والالم والجروح اللي اصابتني ومرواحي للقسم مع زوجي وقريبي ضابط الشرطة عشان اعمل محضر عارفة انه مش هيجيب نتيجة وانه مايساويش الورق اللي اتكتب عليه وانهم في نفس الليله عندهم حادثتين قتل يعني هيسيبوهم ويدورو على حرامي الشنطة؟ لكن بس عشان اعرف اطلع بدل فاقد للبطاقات والكارنيهات اللي راحت
برغم كل ده قعدت في بيتنا بعد ماهديت ودموعي شغاله بلا انقطاع وزوجي يهديني انه مش مهم الفلوس ولا الموبايل والكارنيهات نعمل بدلها ونمر التليفونات هنعرف نلمها
وان الحمد لله ان الموضوع كان جنب البيت مش بعيد
وان ماجراليش حاجة وولاد الحلال نقلوني مستشفى وانا لامعايا بطاقة ولا نمرة تليفون وكنا دخنا وما عرفناش جرالك ايه
انا كنت بافكر في اتجاهات تانية
ان ربنا سبحانه حب يفكرني
ان الحافظ هو الله وان الرازق هو الله
وانه " وان يمسسك الله بضر فلا كاشف له الا هو وان يردك بخير فلا راد لفضله " و

سالت نفسي هو انا زعلانه ليه؟

زعلانه عالشنطة عشان كانت غالية وشيك ومابقلهاش معايا شهرين؟ لا انا مش هاشيل شنط تاني انا بعد كده هاخيط جيوب في كل هدومي
زعلانه عالموبايل اللي جايلي هدية مابقالوش اسبوعين؟ لا مانا موبيالي القديم لسه معايا ومن فات قديمه تاه مش لازم يعني تبقى رنة موبايلي كوووول على راي محمد عبد الغفار
زعلانة على اقلامي اللي كان منها جوايز لتفوقي اثناء دراستي وكانت قيمة وعزيزة جدا على قلبي؟ لا ده البني ادم العزيز علينا بيروح هنزعل على قلم
زعلانه عالفلاش ميموري اللي جبتها بعد كتير وكان نفسي فيها من ايام ماكنت باشتغل من 3 سنين؟ لا ده انا حتى بعد ما جبتها لقيتها مش لازماني قوي بعد ما قعدت في البيت
زعلانه عاللف والمصاريف اللي هاتكلفها عشان اطلع بدل فاقد للبطاقة والكارنيهات ؟ لا بسيطة

امال زعلانه ليه؟

من الخضة
من ظلم الانسان لاخيه الانسان
ده الرسول عليه الصلاة والسلام قال فيما معناه كل المسلم على المسلم حرام دمه وماله وعرضه
حمدت ربنا انها جات في المال وماجاتش في الاتنين التانيين
من ان زوجي اول مانزلنا عشان نعمل المحضر اصر يلف في المنطقة بالعربية يمكن نشوف الموتوسيكل او الولد او حتى الشنطة يكونو خدوا الفلوس ورموها بالورق والبطايق
واحنا بنلف لقينا قهوة وانا اشتبهت في الولد اللي سرقني لانه كان لابس مقلم اسود في ابيض والموتوسيكل كان جنبه
وقلت كده في القسم
قالولي هنوريكي صور قلتلهم مش متاكده من وشه ماقدرش اظلم حد انا شفته من ظهره وهدومه
وفي نفس الوقت لو كان هو ماقدرش نتعرضله و حتى لو طلبتله النجده زي ماقال قريبي الضابط وقلت اني باتهمه ماهو هيعرفنا ويمكن يضرنا ويضر اولادنا او يتهور وديتها حته مطواه مع كل واحد من العينه دي
زعلانه عشان خفت عشان مش هنقدر ندافع عن حقنا ونجيبه
زعلانه عشان هاقعد وقت طويل اخاف انزل الشارع واخاف الولاد ينزلوا لوحدهم واني مش هاقدر اروح مشوار الا لما اعطل زوجي عن شغله ومصالحه عشان يوديني ويجيبني
زعلانه عشان دي مش اول مرة تحصللي
حصلت قبل كده وانا حامل في ابني الاولاني وشدوا من رقبتي السلسله وكان برضة موتوسيكل وكان الولد لابس مقلم وفي نفس الشارع لدرجة انه بيتهيالي انه نفس الولد اللي سرقني المرة دي كمان
زعلانه عشان لما تسرقت مني السلسلة بعدها بدقيقتين عدى البوكس الزرق مليان عساكر وضباط ووقفته وقلتله وشاورتله على المكان اللي مشيوا منه سمعني ببرود وقاللي مش هاقدر اروح وراه انا عندي مامورية خلتني ابصله وقتها بذهول و وسابني ومشي
زعلانه لانه الناس تبلدت وماحدش بيساعد حد ولا بينجد حد برغم ان الشارع كان مليان ناس والمحلات فاتحة ومنورة

بس حمدت ربنا
لاني استرجعت وقلت دعاء المصيبة بعدها على طول وانا طالعه سلم بيتنا متعورة وهدومي متقطعة ومنغير شنطتي
حمدت ربنا لاننا مش زي اللي سرقني مش بناكل سحت وحرام
حمدت ربنا لاني واحنا بنلف بقيت بقول اللهم رب الدابة اهدي الدابه فانها من فضلك ورحمتك
حمدت ربنا لانه رزقني ذكره في اللحطات دي
وقعدت افكر عايزة ادعي عليه
وزوجي يقوللي ادعيله ربنا يهديه
للاسف ماعنديش نفس درجة التسامح اللي عند زوجي
وكنت باتالم من جروحي وركبتي اللي ورمت ومش عارفة اصلي كويس
مش عارفة اسجد واحط ركبتي المتعورة ووارمة عالارض
وافتكرت " ويدعون الى السجود فلا يستطيعون" وتعوذت بالله ان اكون منهم
وزوجي يقوللي كل انة الم تزيد من ثوابك وتزيد من ذنبه عايزة ايه تاني
وسرحت في الحديث القدسي اللي ما معناه انه اتنين ظالم ومظلوم يوم القيامة والمظلوم عفا عن ظالمه فربنا سبحانه يدخلهم الجنه هما الاتنين برحمته
لكن انا ايماني مش عالي كده
مش قادرة اسامحه
مش قادرة مازعلش
جروحي بتوجعني قوي

ادعولي ربنا يقوي ايماني

انا والتورته

2008-04-19T11:31:00.003+03:00

فكرتني تدوينة علبة السمنه ام 20 جنيه - مدونة العداله للجميع
بموقف حصل من كام شهر
رحت اشتري علبة كمبوت ب 7 جنيه عشان اعمل تورته باكلفها 20 جنيه بدل ما اشتريها ب 50
لقيتها غليت الضعف
قلت للراجل
دي متخزنه عندك من قبل ما تغلى الاسعار
ليه بتبيعها بسعر غالي وانت اصلا شاريها رخيص
قاللي عشان لو بعتها بسعرها
لما المخزون اللي عندي يخلص
مش هاقدر اشتري الجديد الغالي منها تاني

المشكله عاملة زي البيضة والفرخة

كلنا ايدينا في جيوب بعض

وانا شخصيا مش شايفالها حل

الاضراب او المقاطعة مش هينزل الاسعار
لاننا مهما اضربنا او قاطعنا
هنحتاج نشتري
احنا مش بنتكلم عن حذاء ب 100 جنيه هاجيب بداله ب 20
او فستان من داليدرس هاجيب بداله من وكالة البلح
احنا بنتكلم عن سلع اساسية مش كمالية
ده اكل
والناس لازم تاكل
كل الحكاية اني بدل ماكنت باكل لحمه كل يوم هاكلها مرة في الاسبوع
وبدل علبة السمنه البلدي اللي بقت ب60 هاجيب اللي ب20
يعني مستوى الاسعار نزلني من مستوى الطبقة المتوسطة الى مستوى محدود الدخل
ثم قريبا معدوم الدخل
لان دخلي الثابت مش هيكفي اسعار الحاجات اللي بتزيد كل يوم
فهيكون معدوم القيمة

يبقى الحل ان دخلي يزيد
طب ازاي

فيه ناس بتسافر ( اذا عرفوا)
وفيه ناس بتشتغل شغلتين ( ان وجد)
وفيه ناس بتسرق
وفيه ناس بترتشي

المهم ان الناس بتتصرف
طب اللي مش لاقي يسافر او يشتغل شغل تاني او مستحرم يسرق ويرتشي
يعمل ايه
هي دي المشكلة

وطبعا بالشكل ده مش هاعمل تورته تاني

اللهم آت نفسي تقواها

2008-02-25T14:05:00.003+03:00

لأني ابنة
فرض الله علي طاعة والدي
وان اخطا
وبره
وان اذاني
وحبه
وان كرهت تصرفاته معي
وفرضه رايه علي
وتحكمه فيما اريد لانه هو الذي ينفق علي قبل زواجي ولومه المستمر على طريقة عيشي حتى بعد زواجي
واظل رغم تجاوزي الثلاثين وتجاوزه الستين الطفله التي يوبخها ويتهمها بكل ما يجول في خلده من اتهامات
واظل برغم تفوقي الدراسي وادبي ونجاحي في حياتي الزوجية وسماعي الدائم للكلام
مجالا يطبق عليه كل ما يسمعه من حكايات عن الابناء الفاشلين العاقين المخيبين لامال ابائهم
ولا املك الا ان اطيع الله
وان ابتسم في وجه ابي
وان اتذكر مواقفه الحنونه النادرة معي وايثاره لي على نفسه وتعبه و "بهدلته" من اجل تربيتي
وان اقنع نفسي انه يفعل ما يفعل معتقدا انه يفعل الاصلح والافضل لي وان لم يعجبني
وانه يعبر عن حبه لي بطريقته الخاصة وان لم افهمها
وادفع عن نفسي وساوس الشيطان بان ارد غضبه بغضب وصراخه بصراخ واتهاماته لي باتهامات اكبر منها له
واتذكر ايات بر الوالدين التي كانت تابعة دائما للامر بعدم الشرك بالله
واخاف ذنب عقوق الوالدين وقطع الرحم فاضغط على نفسي
وادعو الله من اعماقي
اللهم آت نفسي تقواها وزكها انت خير من زكاها

ولأني امراة
يجب ان اطيع زوجي
واعيش في حدود ظروفه
وان اسمع لرايه وحكمه وان لم يعجبني
وان اثبتت الايام خطأه لا اجرؤ ادبا ان اقول له انت مخطئ
وان اخطأ في حقي او "جه عليا" لا يعترف ابدا انه اخطأ ولا يعتذر ولا يراضيني الا بنظرة تحمل معنى " انت اللي خليتيني اعمل كده "وليس معنى "حقك علي"
ويجب علي ان اقبل بهذا ولا اكبر الموضوع وانسى او اتناسى واتذكر انه يحبني وان هذه طريقته وطباعه
يجب عليا الا اقول رايي في احداث حياتنا وقرراتها لان عقلي قاصر لا يفهم الحياة جيدا ولانني بدون خبرة كافية بالبشر ولانني لا ادرك تطورات الامور
فحتى ان قلت رايي لا يعمل به وان كان في توافه الامور
لانه يرى الافضل
وعلي ان اقبل وابتسم
زمان عندما كنت ازعل من ابي وابكي كان يغضب بشده ويقول " لما اموت لبقي عيطي" فكنت اختبئ في الحمام حتى تجف دموعي واغسل وجهي جيدا بماء بارد حتى يخف احمراره ويخف انتفاخ عيني ثم اخرج
والان غير مسموح بالنكد في البيت
فانتظر حتى يخلو علي وابكي بصوت مسموع
اذن وان كنت حزينة يجب ان ابتسم
وانت غير مقتنعة يجب ان ارضي
وان كنت لا اريد يجب ان اريد
والا فان علي الوزر
قد يرى البعض ذلك ظلما
ولكنني ارى ان الله الذي فرض علي طاعة الاب وطاعة الزوج لن يضيعيني
فهو العادل وهو العليم الحكيم الخبير
وان كان علي الوزر ان عصيت الله
فبالتاكيد لي الاجر ان اطعت الله
اتصالي هنا بالله
ورجائي من الله
واحتسابي لوجه الله
ودعوتي ان يغفر لي الله فانا بشر وانا امراه تسبقها دموعها وعاطفتها
ولا املك الا ان اقول
اللهم آت نفسي تقواها وزكها انت خير من زكاها انت وليها ومولاها

قليل من الانصاف

2008-01-22T16:35:00.000+03:00

اخي الكريم مسلم كتب تدوينة عن عمرو خالد آلمني اسلوبها
فانا اكتب هنا تعليقي عنده وازيد عليه

من الانصاف ان نذكر الحسنات كما نذكر السيئات

من العدل ان نذكر بداياته المشرقة وكم من الشباب عرف الله على يديه بعد ان كان لا يعرف من الاسلام غير انه مذكور في خانة الديانة بالبطاقة

لا انكر ان له اخطاؤه
ولا انكر اختلاف علماء لهم مكانتهم مع منهجه

ولا انكر مبادرته ومد يده للغرب والمسيحيين في احتفاله معهم وان هذا يبدوا خطأ في نظر الكثيرين وانه رضي الدنية في دينه

ولكنه من وجهة نظره يخاطبهم باللغة التي يفهمونها

ان قال امام الشباب لذي ليس في راسه الا نجوم الفن والغناء والكرة قدوة ومثلا انه يحب عادل امام وجعل تامر حسني يغني مقدمة برنامجه

وان قال ليسمعه المثقفون المتحذلقون الذين يتهمون المتدينين بالبداوة وحجاب العقل انه معجب بمفيد فوزي

فانا اذكر فئة سماها الاسلام
المؤلفة قلوبهم
وكيف انهم كانوا بابا من ابواب الزكاة

عمرو خالد قال هذا ليؤلف قلوب الشاردين لعلهم يسمعون منه كلمة تهديهم الى الله

المسيحيين يدعون انهم هم وحدهم المسالمون والمضطهدون وان من يضربهم على خدهم الايمن يديرون له الايسر

فقال بتصرفه نحن افضل ونحن اكثر سلاما

الدنماركيون والغرب يقدسون حقهم في حرية التعبير

فذهب اليهم ليعبر ويخبر من هو رسولنا الذي اساتم اليه في عقر دارهم ليسمعوه وهم المقدسون لحرية التعبير
خاطبهم بطريقتهم وعلى قدر عقولهم
بلغتهم التي يفهمونها

وكان معه د. طارق سويدان وغيره

لكني لم ار احدا يعيب او يهدم في طارق سويدان

لم ار احدا بدر او قدم اي عمل ايجابي سوى الزعيق والتظاهر والانقطاع عن اكل الجبنه
لست ادافع عن احد ضد احد

ولكني لن انسى كما لن ينس كثيرون غيري ان اول طريق هدايتهم وحبهم
واكرر حبهم لدينهم كان على يد عمرو خالد

ان اخطا
فمصادر الصواب كثيرة

وان كان علمه ضحلا
فالعلم موجود في كل مكان لمن اراد التعلم

وان مال عن الحق

فموقعه وايميله موجودان
ولمن النصيحة؟
لله ورسوله وللمسلمين

اما ان نشاهد المسلسلات ويسترعي انتباهنا كومبارس
ظهر في احدى حلقات برنامجه على انه شاب تائب فنقول عن حلقاته انها تمثيل
وما يجيش في مخيلتنا ولو للحظة
ان الشاب ده من متصيدي الفرص
والباحثين عن مصلحتهم الشخصية
فقد يكون هذا الشاب يبحث عن منفذ تصوره منه الكاميرا فلم يجد الا برنامج عمرو خالد
وانطلق بعد ذلك الى الادوار التمثيلية

في احد حلقاته الرمضانية شاهدت موديل اعلانات تردتدي غطاء الراس جالسه مع الجمهور
وتنظر اليه بنظرات كلها تحدي واستفزاز واحتقار له ولما يقوله
وهذه الموديل مازالت تظهر في الاعلانات حتى الان بغطاء راس او بدون حسب ما يطلبه المخرج
يبقى العيب في عمرو خالد

غلطة عمرو خالد انه كان عايز يوصل للناس ويدعوهم
في كل مكان
في النوادي
في المساجد
في التليفزيون
ان يذهب هو اليهم ماداموا لا يريدون ان ياتوا اليه
فتلقفته اله اعلاميه لا ترحم
واحتكره ملياردير بقنواته ليكسب المزيد من المال
وقام على اخراج برامجه واضاءة وبناء ديكورات استديوهات برامجه واعداد حلقاته ودعوة الجمهور عاملين في المجال الفني
وانتم ادرى بالعاملين في المجال الفني
لا يشترط فيهم ان يكونوا من غير المدخنين او مقيمي الصلاه

غلطة عمرو خالد انه كان عايز الناس تسمعه باي شكل
تسمعه وهو بيقول بلغته العامية ربي الله
ربنا ده كريم قوي
ربنا بيحبنا قوي
بلغته البسيطه لحد الركاكة
وهو بيفكرنا بالاخلاق اللي راحت مننا
وبالعبادات اللي مابنعرفش ناديها
او بناديها كانها هم وبنرميه من على كتافنا

وفي الاخر
نقول اننا كنا بنتخانق مع اللي يقول عنه كلمة وحشة
لكن دلوقتي مستعدين نقطعه بسناننا

يمسك كل منا حجرا
ويلقيه به مع الذين يرجمونه ممن لا يريدون نصرة لدين الله
ومع الذين يذيعون برامجهم لنشر الخلاف بين العلماء
ومع الذين لا يريدون ان تسمع كلمة الله
ومع الذين يتخذون ديننا هزوا
وهم من جلدتنا
ويتكلمون لغتنا

وممن يعيبون في كل الدعاة على اختلاف مذاهبهم لينصرف الكل عنهم

فهذا داعية اثرى وتربح من الدعوة
وهذا يتكسب من قراءة القرآن وصلاة التراويح
وهذا الداعية القطري الذي باع وطنه
وهذا الذي يعيش على اموال الخليج
وهذه القناه التي تذيع اعلانات الزواج والنصب بالاعشاب

قليل من الانصاف

ولنتوقف عن مهاجمة بعضنا بعضا
ولناخذ كلمة الحق ننتفع بها
ولنرد الخطا بالحكمة والموعظة الحسنة

اما ان نقول عن رجل يقول ربي الله
ويدعو التائهين ان يقولو ربنا الله
ويعيشوا حياتهم كما اراد الله
ان يحسنوا من انفسهم ولو قليلا

انه اصبح صنما وياكل صنمه

فهذا ليس من الموعظة الحسنة في شئ

سامحني يا اخي ان اختلفت معك

بعيدا عن الموضوع

ياسمين الخيام ابنه الشيخ محمود خليل الحصري
استضافها برنامج العاشرة مساء من فترة
ولما المذيعه سالتها
الفترة الماضية من حياتك لما كنتي بتغني
ودلوقتي كل وقتك للخير والايتام ونشاط الجمعية

تقولي عنها ايه؟
قالتلها مش هاقول حاجة
كله ربنا كاتبه علينا
لكي لا تأسوا على فاتكم ولا تفرحوا بما اتاكم
انا باحمد ربنا على اللي انا فيه دلوقتي

اول يوم في دورة المعلمات

2008-01-17T16:02:00.000+03:00

في شهر سبتمبر 2005.. بدات دراسة التجويد وفي شهر ابريل 2006 بدات في حفظ القرآن الكريم من اول جزء مع التوسع في دراسة التجويد .. وكانت قراءتي ولله الحمد طيبة
رشحتني معلمتي مع اخريات للقراءة عند الدكتورة عميدة االمعهد لدخول دورة معلمات القرآن التي ينظمها المعهد ويشترط لدخولها حفظ 15 جزءا وان يكون المتقدمات اصلا معلمات في مساجد او دور تحفيظ اخرى

وبما اننا مازلنا في الجزء الحادي عشر ومن طالبات المعهد فالدكتورة عملت استثناء بشرط حسن الاداء يعني حسن التلاوة وصحة المخارج والاحكام .. يعني تعمل لنا ختبار ونقرا امامها .. والدكتورة ما شاء الله عليها ما بتعديش غلطة وبتطلع غلطات فنية لا يعرفها الا مهرة القراء زي ما بيقولوا .. يعني باختصار مش أي حد يعدي من تحت ايديها

كنت محتارة اروح والا لأ.. معلمة قرآن دي مش لعبة .. ده الواحد بيحفظ بتعدي عليه الآية وهو ما بينفذهاش او بيعصيها كمان وبيبقى مرعوب من حساب ربنا.. امال لما اقعد واعلمها واحفظها يبقى ايه " كبر مقتا عند الله ان تقولوا مالا تفعلون" .. وبعدين موضوع شغلي السابق والحيرة اللي كنت فيها .. لقيتني معلمتي متردده قالت لي صلي استخارة

صليت .. انا عمري ما صليت استخارة الا وربنا يسر لي مافيه الخير
ودخلت وبدات القراءة لكن ماكنتش خايفة ولا متردده وكان عندي هدوء وثبات غريب وما طلعتليش فعلا غير غلطات فنية وقليله جدا وسالتني عن اسمي وقالت لي خلاص احضري معاهم

خرجت من عندها وانا مزأططه من الفرحة .. وأنا نادرا جدا لما حاجة بتخليني أزأطط من الفرحة
وكلمت معلمتي وانا فرحانه زي العيال الصغيرين وباقوللها الدكتورة قبلتني .. دعيتلي كتير وكل زميلاتي فرحوا جدا

والنهارده كان أول يوم احضر

وغصب عني رجعت بذاكرتي لما كنت عليه وازاي اني رحت معهد القرآن بعد ما شغلي وقف بحجة اني فاضية وماوراييش حاجة وعندي وقت كتير على مالاقي شغل تاني .. ماكانش عندي اصلا نية الحفظ فما بالك بالتحفيظ والتعليم .. وكنت حزينة جدا على الشغل اللي سبته لاسباب قهرية مش بارادتي بل بارادة الزملاء والرؤساء وطبيعة الشغل نفسها .. وعلى نمط الحياه اللي كان الشغل موفرهولي .. وعلى احلامي اني اكون استاذه جامعية في مجال شغلي واخد دكتوراه عشان ارتقي فيه اكتر واللي برضه ماكملتهاش لاسباب قهرية

وكان جوايا غضب وسخط .. واحتقار وتقليل من نفسي واني بعد ماخسرت شغلي ودراستي بقيت ولاحاجة

وما ابتديش اقرب من ربنا الا بعد كام موقف حصلوا في حياتي خلوني اؤمن ان احنا مانعرفش الخير فين وان الدنيا دي مش مفروض تكون هي اهتمامنا الاول والاوحد "اعمل لدنياك كانك تعيش ابدا واعمل لآخرتك كانك تموت غدا " و الموت قريب والمرض قريب وماحدش كبير على ربنا

لقيتني النهارده ربنا بيرفعني درجات اعلى من اللي كنت عايزة ارفع نفسي ليها "اقرأوارتق ورتل كما كنت ترتل في الدنيا فإن منزلتك عند آخر آية تقرؤها" .. لقيتني النهارده مرشحة اشتغل شغل احسن من اللي كنت باشتغله " خَيْرُكُمْ مَنْ تَعَلَّمَ الْقُرْآنَ وَعَلَّمَهُ " ..
لقيتني بعد يوم مالدكتورة قبلتني في الدورة باخد بالي من كل كلمة وكل حركة وكل تصرف باعمله حتى في ابسط الحاجات.. حتى لما جيت ازعق لولادي على حاجة عملوها سكت وافتكرت " والكاظمين الغيظ" ..

وافتكرت رسولنا صلى الله عليه وسلم " كان خلقه القرآن " وقلت ازاي نبقى مسلمين وبيقولوا علينا متدينين وما يبقاش خلقنا القرآن في كل حاجة في حياتنا ؟ .. ليهم حق يوجعوا دماغنا بالكلمة اللي طلعوا فيها اليومين دول في برامج التليفزيون ومقالات الجرايد .. التدين القشري .. التدين المظهري .. التدين الظاهري

يارب زي ما بنحرص على المظهر كلنا نحرص على الجوهر

ياارب زي ما بنطهر اجسامنا وهدومنا نطهر قلوبنا

ياارب زي ما بنصلي ونصوم ونروح العمرة نعامل كل خلقك بالحسنى وبما نحب ان يعاملونا به و نأدي حقوق الناس اللي علينا ونقوم بمسؤلياتنا بالشكل اللي يرضيك عننا

يارب زي بنقرا القرآن صح نعمل بكل مافيه صح

اللهم اصلح فمي ولساني لأقيم حروف كتابك

وأصلح قلبي وجوارحي لأقيم حدود كتابك

التبرع بالبلازما

2008-01-12T19:36:00.000+03:00

ليس اشد من بلاء المرض والالم والاحتياج للعلاج على المريض واهله معا
وكلنا يعرف اجر زيارة المريض
‏ ‏عن ‏ ‏أبي هريرة ‏ ‏قال ‏
قال رسول الله ‏ ‏صلى الله عليه وسلم ‏ ‏إن الله عز وجل يقول يوم القيامة ‏ ‏يا ابن ‏ ‏آدم ‏ ‏مرضت فلم تعدني قال يا رب كيف ‏ ‏أعودك ‏ ‏وأنت رب العالمين قال أما علمت أن عبدي فلانا مرض فلم تعده أما علمت أنك لو عدته لوجدتني عنده يا ابن ‏ ‏آدم ‏ ‏استطعمتك فلم تطعمني قال يا رب وكيف أطعمك وأنت رب العالمين قال أما علمت أنه استطعمك عبدي فلان فلم تطعمه أما علمت أنك لو أطعمته لوجدت ذلك عندي يا ابن ‏ ‏آدم ‏ ‏استسقيتك فلم تسقني قال يا رب كيف أسقيك وأنت رب العالمين قال استسقاك عبدي فلان فلم تسقه أما إنك لو سقيته وجدت ذلك عندي

فهذا اجر الزيارة فقط فما بالكم بأجر المساعده والمساهمة في العلاج؟

ليس كلنا يقدر على المساعدة المادية ونعلم جميعا غلاء المستشفيات والادوية واجر الأطباء
ولكن يمكن ان نساعد بالتبرع بالبلازما
ودرسنا في العلوم في ابتدائي ان البلازما هي سائل الدم الذي يحتوي الصفائح الدموية وهي مكون مهم جدا في دم الانسان
والانسان السليم يصنع جسمه هذه الصفائح باستمرار
اما مرضى الفيروسات عموما مثل الفيروسات الكبدية ومرضى الفشل الكلوي فعندهم نقص كبير جدا في الصفائح الدموية بسبب مرضهم لا تصنع اجسادهم الصفائح بنفس قدرة الانسان السليم وهذه الامراض منتشرة بيننا بشكل رهيب
وكيس البلازما غالي الثمن جدا
لذلك من يقدر وكلنا ان شاء الله نقدر ان ياخذ من وقته ساعة واحدة ويتوجه الى اي بنك دم للتبرع فجزاه الله خيرا
التبرع يكون بتوصيل الذراع بجهاز يفصل البلازما من الدم مباشرة بدون سحب الدم بكمية ستمائة مللي ثم تعويض السائل المسحوب من الجسم بزجاجة محلول ولا يحدث دوخة او اي شئ غالبا ويمكن التبرع بالبلازما كل 15 يوم بينما التبرع بالدم لا يجب ان تقل الفترة عن 3 شهور
فترة التبرع حوالي ساعةالا ربع تقريبا
جزاكم الله خيرا
ورزقم العافية والصحة
وشفى كل مريض
واعان اهله

انا جيت ولقيت تاج

2007-12-10T22:23:00.000+03:00

المدونه وحشتني جدا
ووحشوني كل الناس الحلوين اللي عرفتهم من خلالها
الاخوة والاخوات في الله
اللي تبادلنا مع بعض كلمه طيبه
كنت مشغوله معلش
واول ما رحت رحت عند الاستاذ عصفور لقيت تاج خدته علىطول وهو سامح

ماهى سورتك فى القران(اى احب سوره اليك تقرأها فى فرحك وفى حزنك)؟

سورة الفرقان والسجدة وغافر والزمر

ماهى احب ايه اليك الايه التى دائما تتمناها؟

"ان تجتنبوا كبائر ما تنهون عنه نكفر عنكم سيئاتكم وندخلكم مدخلا كريما"
اية 31 من سورة النساء

ما هى اكثر ايه تخاف منها وتدعوا الله الا تكون من اصحابها؟

فمن يرد الله ان يهديه يشرح صدره للاسلام ومن يرد ان يضله يجعل صدره ضيقا حرجا كانما يصعد في السماء كذلك يجعل الله الرجس على الذين لا يؤمنون
سورة الانعام اية 125

ما هى الايه التى تشعر بانها تتحدث عنك؟

واتل عليهم نبأ الذي آتيناه آياتنا فانسلخ منها فأتبغه الشيطان فكان من الغاوين * ولو شئنا لرفعناه بها ولكنه أخلد الى الأرض واتبع هواه
الاعراف ايه 175 -176

من احب صحابى واحب صحابيه اليك؟

صهيب الرومي - ربح البيع يا ابا يحيى .. ربح البيع
فاطمة رضي الله عنها

من احب نبى اليك بعد الحبيب صلى الله عليه وسلم؟

يوسف عليه السلام وعيسى عليه السلام

اذا كنت على عهد النبى صلى الله عليه وسلم فمن كنت تحب ان تكون ولماذا؟

بلال رضي الله عنه - ماذا كان قبل الاسلام : عبد حبشي وماذا صار بعده : مؤذن الرسول صلى الله عليه وسلم يصدح صوته الندي بالاذان

ما هو منتداك وموقعك المفضل؟

مااعرفش منتديات وباحب موقع جوجل

ما هى احب الاسماء التى تحب ان تنادى بها؟

ماعرفش غير اسمي الحقيقة وهو غير مذكور

من هو كاتبك المفضل؟

ماحدش معين اي حد بيكتب بصدق وكلامه يفيدني او يسعدني

مدون له عليك فضل او استفدت منه؟

نحسبهم كذلك ولا نزكي على الله احدا
عصفور المدينه
ضاكتور خالد
استراحة المحارب

من هو قارىء القران المفضل اليك؟

مشاري العفاسي وابو بكر الشاطري
والحصري عشان باتعلم منه القراءة الصحيحة

من هو منشدك المفضل؟

للاسف ماليش خبرة في موضوع الانشاد حاليا ومش متابعاه
حتى لو سمعت انشوده وعجبتني مش باعرف مين قالها زي راية بيضا مثلا

ما هو نشيدك المفضل؟

زي الاستاذ عصفور
هل ترانا نلتقي
لانها مرتبطة باخواتي اللي انفصلت عنهم من 16 سنه
وده كان التوقيت اللي كنت باسمع فيه انشاد
و الانشوده دي كانت في شريط اسمه اناشيد الدمام 2

اذا كان لك دعوه واحده تدعوها وستتحقق فبماذا ستدعو؟؟

اللهم اني اسألك حسن الخاتمه

من هو الداعيه المفضل اليك او شيخك المفضل؟؟؟؟

محمد حسان
هادئ واسلوبه علمي بسيط

ما هى اكثر عباده تشعر انها تجعلك قريب جدا من الله؟

قيام الليل .. ان قمت

من احب افراد عائلتك اليك؟؟

ابنائي

ما هو املك فى الحياه؟؟

ان لا يذلني الله لاحد من خلقه مهما كان السبب

هتمرر التاج
اللي عايزة يتفضل

نفسي اصحى وانا صاحية

2007-11-18T17:20:00.000+03:00

يا جماعه حد يساعدني
ظروفي بتخلي نومي متقطع بشكل عام .. يعني انام ساعتين واصحى.. 3 ساعات واصحى ..
كرهت صوت منبه الموبايل اللي على طول زابطاه
ممكن اسرق نص ساعة نوم وازبط المنبه
حتى الايام اللي بقدر انام فيها 5 ساعات متواصل وبعدين انام 4 ساعات متواصل بعدهم برضه بيحصل فيهم نفس المشكلة
اللي هي
اني بنام على نفسي في اي مكان وفي اي وقت من اليوم وانا قاعده مع الناس وبيكلموني
انا باشرب القهوة وانام ما بيحوقش معايا حاجة
راسي تتقل كاني شاربة حاجة وعيني تحرقني لو قاومت وما غمضمضطهاش
باحاول اصحى الفجر عشان احفظ واراجع الاقيني من الساعة 4 لحد 5 ونص بافقر على المصحف وما حفظتش آيه
فيه ناس قالولي يمكن عندك حالة مرضية او الضغط منخفض
انا اسمع ان فيه ناس بيكفيهم النوم القليل
نفسي ابقى زيهم
اعمل ايه

امتحان

2007-11-07T14:09:00.000+03:00

النهاردة كان عندي امتحان
من سورة البقرة حتى سورة الانعام
زميلاتي بقلهم اسبوعين بيراجعوا في الحلقة
وعشان انا ماكنتش مراجعه كويس كنت بخاف اروح لشكلي يبقى وحش او المعلمة تديني كلمتين
ولما رحت الامتحان طبعا ما كنتش مذاكرة كويس ولا مراجعه معاهم
كويس قوي لو جبت 10 من 25
بس خدت بالي من الحاجات اللي غلطت فيها
وبيتهيالي ان شاء الله مش هانساها تاني

لو حد بيحفظ زيي خدوا بالكم من قوله تعالى
"و الذين كفروا وكذبوا باياتنا " وردت مرة في سورة البقرة ومرتين في سورة المائده
"يا اهل الكتاب " وردت مرة في سورة النساء ومرتين في سورة المائدة
"والذين امنوا وعملوا الصالحات فيوفيهم " مرة في سورة ال عمران ومرة في سورة النساء ولكن بدلا من الواو فاء

واجب
مواضع " قل يا اهل الكتاب" في سورتي ال عمران والمائده وعدد المرات
مواضع " يا اهل الكتاب" في سورتي ال عمران والمائده وعدد المرات

ارجو الدعاء بالتثبيت والاخلاص وحسن الحفظ والاداء والعلم والعمل

هاموت من القرف

2007-10-28T18:49:00.000+03:00

ليه
ناس تخصص مدونه كاملة للشتيمة بس
وتعمل نفسها محترمة لما حد يرد عليها شتيمتها
انا لا مع ده ولا مع ده
الاتنين اثاروا فيا حالة قرف وغثيان مش قادرة اتخلص منها من الصبح
حسبي الله ونعم الوكيل
مخصص مدونه كاملة لشتيمة الحجاب والنقاب
طيب
انا عن نفسي كشخص واحد فرد واحد مش بالبس النقاب
لكن مش ممكن اشتم اللي لابسينه
مش من منطلق كل واحد حر لان الحرية تنتهي عند حرية الاخرين
والا كنا قلنا زي ما هو نفسه بيقول انه مش معقول يقلع ملط في الشارع ونقول كل واحد حر
من منطلق حب لاخيك ما تحب لنفسك
وعامل الناس بمثل ما تحب ان يعاملوك به
ليه يبقى مستوى الحوار وعرض الاراء بالشكل ده
حسبي الله ونعم الوكيل
انا كنت هاعلق لكن قلت لا
مش هاسيب اسمي هناك
ده غير ان ما اعتقدش ان فيه اي كلام هيخليه يرجع عن اراؤه
قلت اجي انفس عن غضبي وحرقة دمي هنا
معلش استحملوني
انا ايه بس اللي وداني هناك؟

دايما متاخرة

2007-10-26T12:52:00.000+03:00

كل سنه وانتم طيبين
قديمة
عارفة
الجهاز كان بايظ
ولسة جاي من يومين

ربنا يعين ونعرف نكتب كلمتين بعد ما نعرف نزيل كل الصدا اللي على دماغنا ده

العشر الأواخر

2007-10-03T23:14:00.000+03:00

وبقينا 21 رمضان
الشهر جري
وبقينا في العشر الأواخر
ما احلى منظر الآلاف مصطفين في ساعات الليل الاخيرة يتهجدون في بيت الله الحرام

زمان في التوقيت ده كانت فيه اغنية بيعيدوا ويزيدوا فيها في التليفزيون
والله لسه بدري والله يا شهر الصيام
كنا نسمعها وندمع
اللهم اجعلنا من الذين رحمتهم وغفرت لهم واعتقتهم في رمضان
على ضعف قوتنا
وفتور همتنا
وقلة حيلتنا
اللهم تقبل من كل من صام يوما .. وسجد سجدة .. وقرأ آية .. وأحسن عملا .. ابتغاء وجهك الكريم
اللهم بلغنا جميعا ليلة القدر
ولا تحرمنا الأجر
آمين

رمضان جانا .. وانا اتاخرت

2007-09-20T12:23:00.000+03:00

كل عام والمسلمين جميعا بخير

فاتتني بدايات الشهر الكريم

مدارس بقى وهنفطر اول يوم عند مين وتاني يوم عند مين ومين هيفطر عندنا رابع وخامس يوم

الحمد لله استقريت في البيت وعندي وقت مع نفسي
يارب اغتنمه وما اضيعوش
يارب ابني يعرف حكمة الصوم ويحبه ويحب الشهر وما يشوفش فيه مجرد حرمان
يارب وكل المسلمين نخرج من الشهر فرحانين بالقيام والصيام وختم كتابك الكريم
مش ندمانين على اللي ضيعناه في العزومات والمسلسلات والريحات والجيات
يا رب

ليه؟

2007-09-10T15:17:00.000+03:00

قالت لنا معلمة القرءان امس – وكانت آخر حلقة لنا قبل رمضان – في معرض الحديث عن الاستعداد لرمضان انه يجب علينا :

ترك الاشتغال بخلق الله والاشتغال بالله

بذكره ومراعاته في كل لحظة وكل تصرف ومراعاة النية في كل عمل

وان ذلك يؤنس الانسان حين لا يكون له مؤنس عندما تصل الرحلة الى القبور

انا عن نفسي اشعر ببعض التيه

الف حوالين نفسي في البيت

تدمرني نفسيا اي نزاعات او خلافات على مستوى اسرتي الكبيرة

اتدخل لحاول تلطيف الموقف وحله

لاني الاخت الكبيرة

احاول اقرب وجهات النظر وارضي جميع الاطراف

بالذات الوالدين

ومحاولتي هذه قد تصيب وقد تخطئ لدرجة انهم في النهاية قد يحملوني الخطا

واسمع الكلمة القاتلة : انت السبب

مع ان الله يعلم ان قصدي لم يكن كل خير

آخر مرة ارتفع فعلا ضغط دمي حتى احسست بصداع قاتل وان راسي ستنفجر

واصبحت ابكي لدرجة اهتزاز كل خلايا جسدي من حرقة البكاء

تتكرر الزوابع الان وقمتها ستكون في رمضان

فهل استطيع ترك الاشتغال بخلق الله واشتغل وآنس فقط بالله ؟

اتمنى

*****************

امر يشغلني

اريد ان اعود لدراستي

واتعلم شيئا يفيدني

اريد ان اعود للعمل

اريد ان اخالط الناس واصبر على اذاهم

اريد ان التمس رزق الله

اشعر انني عالة

وطاقة معطلة

امكانياتي الان لا تسمح بالعمل

ربما اذا درست شيئا

ربما اذا راجعت خبرتي القديمة

اريد ان اساعد

وانا لا املك الان الا المساعدة بالدعاء

فهل يكفي

كيف احقق المعادلة الصعبة

بين بيتي واولادي وزوجي ونفسي وربي وحفظي وعملي

لا استطيع حتى ان ادرس او انظر في اي شئ رغم ان الموارد متوفرة

لم اعد اطيق او اصبر

صليت استخارة اكثر من مرة

كل الشواهد والعلامات تدفعني فقط في طريق الحفظ والتحفيظ

وانا لا اريد ان اتكسب بالقرآن

مع انه حلال اذا راعينا النية والالتزام والعمل به

لم اعد ادري ماذا افعل

المشكله انني فعلا لم اعد اطيق الخروج من المنزل

لم اعد اطيق ان امسك كتابا

لم اعد اطيق ان افتح الجهاز على برنامج لاتعلمه او اراجعه او امارسه

نسيت كل ما تعلمت

وافتقد القدرة والرغبة على اعادة تعلمه او تعلم الجديد

ولسه بالف حوالين نفسي

************

هو ده اكتئاب

طب ينفع اعالجه فقط بالقرب من الله والصلاة والقران والذكر والتزام واجباتي تجاه البيت والاولاد لان هذه هي مهمتي الحالية الوحيدة

وان ماكانش ده اكتئاب

ليه مش طايقة اقرا حاجة او امسك كتاب مع ان عشقي كان القراءة؟

ليه مش عارفة اكتب كلمتين عدلين مع اني كنت باملا كشاكيل؟

ليه مش قادرة اكلم حد ولا اشارك في اي حوار وشايفة الموضوع كلة عبث؟

ليه مش شايفة في الدنيا حواليا حاجة شاداني؟

ليه ما بقاش فيه شئ بيثير دهشتي او انتباهي؟

ليه لما باسمع الاخبار ما باستغربش من اي حاجة؟

ليه شايفة ان كل شئ امر واقع ومسلم بيه ولا يمكن تغييره؟

ليه شعار المرحلة الحالية : ليس في الامكان ابدع مما كان؟

ليه ما بقاش فيه شئ بيضحكني؟

لدرجة اني ضحكت على تدوينة عند الاستاذ جعان لميت البيت علي وكانوا عايزين يصوروني؟

ليه ما بقاش فيه شئ بيفرحني؟

ليه ؟

ليه؟

ايكم زادته هذه ايمانا؟

2007-09-04T14:40:00.000+03:00

اشكركم جميعا على سؤالكم عني

بصراحة لم اقل انني ساسافر او ساغيب لانني لم اتخيل ا ن احدا سيفتقدني ولكنني سعدت جدا بسؤالكم واهتمامكم فجزاكم الله خيرا

انا والاسرة متعودين نسافر كل سنه في نفس الميعاد والى نفس المكان .. مدينه صغيرة هادئة بحرها جميل وليس بها صخب المصايف المعتاد ولا زحامها الفظيع .. يتاح لي فيها ان امارس عبادة التامل في ملكوت الله سبحانه كما تفعل داعية المستقبل مع البحر والغروب والسماء والنجوم التي لا اراها هنا في القاهرة .. والسنه دي كمان كان القمر بدر وحضرنا النصف من شعبان هناك..

عادة نقابل في المصيف ناس زينا زبطوا اجازتهم في نفس المكان ونفس الميعاد .. جمعنا حبنا للهدوء وخصوصية المكان

السنه اللي فاتت وانا قاعدة على البحر مع الولاد قرب الغروب حاطة رجلي في المية وبالعب بالرمل والناس بتتمشى على البحر لفت نظري بنتين عدوا من قدامي لابسين ملابس طويلة وشرابات وماشيين على الرمل والموج يجيلهم !! رفعت عيني لقيت واحده منتقبه والتانيه محجبه حجاب سابغ وطويل.. كنت ساعتها بقالي سنه في مشوار حفظ وتجويد القران الذي لم يضف لي وقتها شيئا بل زاد من حيرتي وتخبطي وقلقي بخصوص مفاهيم العلم والعمل والالتزام والثبات ..

وكنت دائما اقول لنفسي ما احنا حلوين اهه هو احنا بنعمل حاجه وحشة يعني لازم نزنقها على نفسنا .. الدين يسر.. وحاجات كده

فلما شفت منظر الشرابات اللي مليانه رمل والهدوم الطويلة اللي اكيد تقلت من المية وانا قاعدة مشمرة بنطلوني استغربت قوي

هم مستحملين كدة ازاي

استجمعت شجاعتي وهم راجعين وقفتهم وسلمت عليهم وتعرفت عليهم ولقيتهم لسه ما اتخرجوش من الجامعه وفي كليات قمه كمان وسالتهم السؤال ده

وبدا حوار طويل

لهم سنين مش بيتغيروا

بيطيعوا ربنا وبس

مش هاممهم الناس والحاجات الحلوة الكتير اللي حارمين نفسهم منها .. صابرين على الطاعة.. متحملين المكاره

ردوا على برد عمري ما كنت اتوقعه

قالولي احنا مش شايفين الا الجنه قدامنا .. اليها نعمل .. هي هدفنا .. مش بنبص لا يمين ولا شمال..

بنذاكر وبنتفوق وبنعمل كل اللي علينا في الدنيا

لكن الاخرة ليها عمل تاني .. لاننا في لحظة هنموت ومش هيبقالنا غير عملنا .. فزي ما بنعمل للدنيا لازم كمان نعمل للاخرة ..

واحنا ما طلعناش لقينا نفسنا كده.. احنا كنا زي كل ملايين البشر مش في دماغنا حاجة غير دنيتنا وبس لحد ما اتعلمنا صح وعرفنا ربنا عايز مننا ايه

واحنا مش دافنين نفسنا ولا حاجة الصبح بدري بنلعب راكت وبننزل البحر وساعة الغروب بنتمشى على البحر ونقول اذكار المساء

حبيتهم قوي وافترقنا لان ده كان اخر يوم لنا في المصيف

وفضلوا معلقين معايا طول السنه وحكيت لكل اصحابي عنهم بس انا فضلت زي ما انا .. مازادش علي حاجة بل بالعكس

بس كنت دايما فاكراهم واسال نفسي انا ليه مش باعمل زيهم .. ناقصني ايه ؟

وزاد حفظي للقران وزادت حيرتي وقلقي

والسنه دي .. لما سافرت المصيف في نفس الميعاد ولنفس المكان .. كنت باتمنى اقابلهم تاني

عدوا اول اربع ايام منغير ما اشوفهم ..

وفي يوم وانا قاعده على الرمل وقت الغروب مع الولاد .. مشمرة بنطلوني.. وبعمل على الرمل عروسة البحر وظهري للشمس وهي بتغيب.. عدت من ورايا شرابات وملابس طويلة رفعت راسي بعد ما عدوا .. وفرحت قوي هما ايوه هما .. هما زي ما هما وانا زي ما انا.. ولا كإن عدت سنه طويله.. واتكسفت قوي من نفسي .. ايه اللي انا حققته وزاد علي في سنه.. على الاقل هم لسه على التزامهم وصبرهم على الطاعة .. هديت تمثال عروسة البحر.. وقمت نزلت بنطلوني .. وقعدت استناهم وهم راجعين.. واول ما قربوا جريت عليهم .. لقيتهم فاكرني بالاسم وسلموا على بشوق وحضنوني.. وانا اللي كنت نسيت اساميهم.. واتكلمنا

واتفقنا نتقابل كل يوم الصبح بدري وساعة الغروب.. حكيت لهم كتير عن تخبطي وافكاري وسمعولي بصبر وحاوروني.. وقللوا كتير من شان التزامهم وقالولي ان كلامي بين لهم قد ايه هم مقصرين ..

وسالوني طب والقران اللي انت بتحفظيه؟

قلت لهم مش معلق معايا غير ايه سورة النساء " ان تجتنبوا كبائر ما تنهون عنه نكفر عنكم سيئاتكم وندخلكم مدخلا كريما"

المرة اللي بعدها ادوني كتاب اسمه " 10 مفاتيح لتدبر القران " بيتكلم عن القراءة والحفظ والفهم والتدبر للقران وبيقول ان اهدافنا لقراءة القران هي الثواب والعلم والعمل والشفاء ومناجاة الله تعالى

وان كل ايه كان الصحابة والتابعين يقفون عندها يفهمونها ويتدبرون ماذا يريد الله منهم فيها فيعملون به

وان ايات القران لابد ان تكون حية في اذهاننا نراها في كل مواقف الحياه فنكون على صلة دائمه بالله

وان الحسن البصري رضي الله عنه قال " اقرأ القران ما نهاك فان لم ينهك فلست بقارئ"

ولقيت في الكتاب اية كاني اراها لاول مرة .. " ام حسب الذين اجترحوا السيئات ان نجعلهم كالذين امنوا وعملوا الصالحات سواء محياهم ومماتهم ساء ما يحكمون" الجاثية 21

وهنا حسيت باحساس تاني

ولقيت اية تانية " واذا ما انزلت سورة فمنهم من يقول ايكم زادته هذه ايمانا فاما الذين آمنوا فزادتهم ايمانا وهم يستبشرون" التوبة 124

ساعتها شفت حياتي والدنيا كلها بعين تانية

واتعلمت حاجة مهمة

مش بالتمني ولا بالكلام

بالعمل والمجاهده والصبر زي اللي بيتعب وهو بيادي تمارينه في الجيش عشان القائد بتاعه ما يعاقبهوش ولا اللي بينقص وزنه عشان يبقى رشيق والا اللي بيسهر عشان يطلع من الاوائل كل واحد بيتعب عشان يحقق هدفه .. طب انا ايه هدفي؟

ولله المثل الاعلى

قرات في هذا الكتاب : قال ثابت البناني " كابدت هذا القرآن عشرين سنه ثم تنعمت به عشرين سنه" فقف عند الباب حتى يفتح لك

المرة دي خدت تليفونات البنتين وايميلاتهم

المرة دي رحت حلقة تحفيظ القران باحساس تاني ونية تانية " اقرا وارتق فان منزلتك في الجنه عند آخر آية تقرؤها " او كما قال النبي صلى الله عليه وسلم

ادعولي اتقدم لقدام وما ابصش تاني ورايا

ادعولي بالثبات

ادعولي بالاخلاص

واسألوا الله من فضله

2007-08-18T11:12:00.001+03:00

الموضوع ده كان شاغلني

جات اختي رفقه وشجعتني اكتب فيه بالتدوينه الاخيره بتاعتها عن الدعاء

وكمان طعمه تناولت نفس الموضوع في تدوينه سابقة عن عدل الله سبحانه في تقسيم الارزاق بين العباد

ايه في سورة النساء

"ولا تتمنوا ما فضل الله به بعضكم على بعض للرجال نصيب مما اكتسبوا وللنساء نصيب مما اكتسبن واسالوا الله من فضله ان الله كان بكل شئ عليما"

النساء آية 32

اللهم سامحني على ما تمنيت ونظرت الى ما اعطيت لغيري

اللهم اغفر لي ان كنت حسدت او سخطت

اللهم ارزقني الرضا بما قسمت لي

اللهم اجعل غايتي الجنه اليها اعمل

اللهم لا تجعل الدنيا اكبر همنا ومبلغ علمنا

وارزقنا منها ما يكفينا ويكرمنا ولا يذلنا لاحد من خلقك وما يعيننا على طاعتك

اللهم اني اسالك من فضلك

تاني تاج

2007-08-16T15:06:00.000+03:00

ده تاني تاج يجيلي
جالي من الحبيبه رفقة عمر

اسم مدونتك؟

العمر لحظة

لماذا اخترته ..وماهي نيتك من وراء اختياره؟

عشان لحظة واحدة
بتاثر في حياة انسان
كلمة قالها فكرة فكرها تصرف عمله موقف شافه قرار خده معلومه عرفها
في لحظة
ممكن تغير حياته في اتجاه مختلف
وتاثر فيه لآخر لحظة
شايفة ان حاجة زي كده تستاهل تتكتب وتتسجل وماتتنساش وما تعديش بدون تسجيل

هل فكرت في إغلاق مدونتك؟ والسبب؟

فكرت كتيير خصوصا اني كتير مش بالاقي حاجة اكتبها والقريحة جفت والحبر نشف وماليش خط معين للتدوين امشي عليه وكتير احس اني مش بالاقي حاجة اضيفها لحد .. لكن باستمر لمجرد التواصل والحاجة الى المشاركه

واول مرة لما حسيت اني اسأت بكتابتي لاحد المدونين وحسيت اني زعلته وضايقته وهو لا يستحق الا كل خير احسبه كذلك ووجدت ان صراحتي وصدقي في التعبير عن مشاعري ووجهة نظري في الامور قد نؤذي غيري وهو لا يستحق الاذية

صورتك في المدونة ورمزيتها ؟؟

غروب الشمس على البحر اكتر منظر باحبه وباتنح قدامه وباسافرله مدينه معينه استنى معاد سفري ليها من السنه للسنه هاديه وفاضيه عشان اشوفه براحتي كل يوم وعلى رواقه
منظر اشعر امامه بالراحة والسعاده والهدوء

لماذا دخلت عالم التدوين من الاساس؟

اولا سمعت عن المدونين وقضاياهم في الاخبار والصحف وبعدين جات لي رسالة في الميل منقوله من مدونة وشوشات دخلت المدونه وقريت وعجبتني وزرت المدونات الصديقة فقلت وانا كمان
زمان كنت باكتب عن اي حاجة او موقف يقابلني او شعور باحس بيه ويحركني وعندي كشاكيل مليانه وبعدين لاسباب كتيره توقفت قلت ارجع لحبي القديم بس المرة دي بدل القلم يبقى كي بورد وبدل الكشكول يبقى مدونه
ولندرة الاصدقاء اليومين دول ولانشغال كل واحد بحاله وكل واحد عنده اللي مكفيه وبيحكموا عليك من خلفيتهم عنك وحسب نوعية علاقتهم بيك
يعني بدون ادعاء انا باكتب لاحتياجي للكتابة والمشاركة الصادقة المجرده من أي غرض
على فكره ما حدش يعرف اني عندي مدونه

جمله قيلت لك فى وصف مدونتك؟

جمله قالها بينو ربنا يكرمه في تعليق على تدوينه رب اشرح لي صدري كنت هاعيط لما قريتها:

من أحد الأسباب اللي بتخليني أن أقول أن التدوين نعمة
هو تلك الكلمات التي تقطر صدقاً
والتي تعبر عني
وأراها تتساقط من غيري
بل واري الحل خلفها يصدمني في وجهي
ويقول لي فوووووووووووق
عايز أيه تاني

التعليقات بالنسبه لك ,اهميتها؟

التعليقات بالنسبه لي مشاركه انا باكتب هنا عشان حد يشاركني ويقوللي رأيه على اللي بقوله بشكل مجرد منغير ما يحكم علي كفلانه، فلما الاقي تعليق نور لي حته كانت مضلمه وتايهه عني بافرح زي الطفل الصغير وكمان بتعبر عن اهتمام اصحابها بالمدونه وصاحبها وان اللي بيعلق كتب تعليق لان المكتوب حركه .. عجبه او ما عجبوش.. لكن شاف انه يستحق يكتب حاجة في الموضوع خصوصا لما يكونوا زائرين دائمين ده بيخلق علاقة ورابطة وتفاعل انساني رائع خصوصا اننا ما نعرفش بعض

احلى بوست كتبته ...ضع اللينك , ثم اذكر لماذا؟

بيحلم يجيب جون

رب اشرح لي صدري

لاني كنت في حالة انفجار وغليان والتدوينتين دول بالذات طلعوا شويه من البخار المكتوم
لكن للاسف على مستوى الواقع العملي مافيش حاجة اتغيرت

أفضل بوست قرأته؟ وضع لينكه؟

ثائر بلا قضية عند ماعلينا

وكل تدوينه تؤثر في وتحرك الانسان جوايا بعيد عن روتين الحياة اليومي اللي بننسى معاه احنا مين وتخليني اقف قدامها وافكر ازاي النقطه دي ما لفتتش نظري قبل كده ودول الحمد لله كتير عند ناس كتير

أفضل مدونة قرأتها؟

استراحة المحارب للعلم الذي يريد نشره وتبسيطه ليفهمه اللي على قدهم امثالي
جعله الله في ميزان حسناته بالرغم اني من زمن مش بادخل مدونته لاني باحس اني لازم اذاكر تدويناته مش بس اقراها وللاسف ده عايز مني حاله استقرار عقلي ومنزلي وهدوء الجو اللي حواليا وده مش متوفر من فترة بس هاوفره قريبا ان شاء الله

حد قل أدبه فى التعليق إيه رد فعلك؟

قلة ادب ما حصلش لحد دلوقتي الحمد لله بس نادرا لما اجد تعليق مستفز فمش بارد على طول بستنى وافكر وبعدين ارجع افتح المدونه تاني وارد بهدوء
لكن لو حصل قلة ادب هامسح التعليق ومش هارد عليه

أسوأ مدونة؟

لما باشم ان المدونه سيئة من كلامها او صورها ما بكملش فراءة واسيبها بسرعة لاني اكرمكم الله بابقى عايزة اتقيأ فبالتالي لا اذكر حتى اسمها

أسوأ بوست أسوأ مدون

كما سبق

هيحصل ايه لإيميلك لما تموت ؟؟

معرفش لاني هكون مت
وبعدين الميل مش بيتحط في اعلام الورائة

اديت الباسوورد لحد قبل كده؟

لا

كانت إيه طبيعة علاقتك بيه؟

ما قلنا ما اديتوش لحد

اسمك؟

مش عايزة اقوله
يهمك في ايه اسمي ده اهلي اللي اختاروهولي يعني مالوش اي دلاله عندي كانسان مجرد اداة تعريف عشان يندهولي بيها ويكتبوها في الورق الرسمي والشهادات وروشتات الدكتور

المشهور بيه وسط اصحابك؟

هو اسمي وساعات بيقولولي يا حزينة

شخصيتك نوعها إيه؟

شخصيتي ضعيفة وباتاثر باي حاجة
ماعنديش اي ثقة في نفسي
ما ابصش لابعد من مناخيري
حساسه لدرجة زهقتني شخصيا وضايقتني
عصبيه لدرجة ان الضغط بيعلى وباسخن ونافوخي بيضرب
جبانه مووووت
صادقة جدا ومابعرفش اللوع وده عامللي مشاكل ياما
يا اقول بصراحه يا اسكت بس بيبان على وشي
لدرجة بيقولولي ده هبل
لازم يكون عندك ذكاء اجتماعي
وانا عندي تخلف وغباء اجتماعي
بس انا متاكده ان ربنا مش هيضيعني

السفر بالنسبة لك؟

باحبه جدااااااااااااااااا لو كان لمكان باحبه
ويا سلام لو اسافر لوحدي وده طبعا ما بيحصلش
ونفسي الف العالم وده طبعا مش هيحصل

وقت فراغك بتعمل فيه إيه؟

زمان كنت باقضيه في القراءة واغيب عن الدنيا مع الكتاب
ماعرفش ايه اللي حصللي ما بقيتش استحمل الكتاب في ايدي ربع ساعه
الا لو الكتاب حلو بجد زي كتاب حياتي لاحمد امين وده اخر كتاب قريته
دلوقتي وقت الفراغ نادرجدا وغالبا بيكون على النت او اتفرج على فيلم جيد

المود بتاعك؟

مكتئبة ومحبطة

الاكلة المفضلة؟

محشي بكل انواعه وملوخية
رقاق وبطة وملوخية
رز بالخلطة والمكسرات مع المشويات
والحلو صوابع زينب ورموش الست وميلفيه وكنافة بالكريمه والمكسرات
وبامووت في الشيكولاته الجيدة الصنع
والعصاير الفريش وقمر الدين
دلوقتي تقولوا عليا طفسة

الصفات اللي أخدتها من بابا؟

العصبيه والقلق والحذر الزياده عن اللزوم

الصفات التي أخدتها من ماما ؟

الشبه الشكلي لدرجة ممكن يلخبطوا بيننا

اكتر ست حاجات بكرهها؟

الأذى والكدب و عدم الاحساس والزحمة بتخنقني والصوت العالي والمطبخ

اكتر ست حاجات بحبها؟

البحر والهدوء والفضا والافلام المعموله صح من كل النواحي والاطفال تحت سن سنه واني اتعلم معلومه جديدة

الشغل بالنسبة لك؟

كان وما زال حاجة مهمه قوي .. استقلال مادي وادبي ومعنوي .. كان نفسي قوي يبقى لي career محترم ومستقر ابذل فيه كل جهدي وتفكيري وأؤدي واجبي فيه على اكمل وجه وارتقي فيه باستمرار
مكتب بتاعي في مكان محترم عليه صور احبابي و يبقى عندي لاب توب وكارت عليه المسمى الوظيفي وتليفوناتي وايميلي
مجرد حلم وصورة ما اتحققتش مع اني حاولت وكنت بابذل كل جهدي بضمير وامانه

لكن الشغل اللي مش هاقدر اديه حقه واكون متفوقه فيه لسبب او لآخر ويكون في اجواء غير مناسبة او محترمة او مع زملاء يحترفون الزنب ونقل الكلام وتحويره وما عندهمش احترام لزملاءهم وضمير في شغلهم ورؤساء لا يتقون الله في مناصبهم ومرؤوسيهم للاسف ما قدرتش عليه وألوم نفسي ولا القي باللوم على احد

لذلك ولاسباب اخرى انا حاليا ربة منزل أؤدي شغل البيت من كنس ومسح وطبيخ وغسيل بكل ضمير وامانه برضه

الانترنت بالنسبه لك؟

ازال حالة العزلة بدون اتصال مباشر بالاشخاص
معلومات تحت ايدي في اي وقت وتحت اي بند
بحبه جدا
يوم ما دخلت الدي اس ال كان فرح
ولو اتفصل لاي سبب بابقى هتجنن وعايزة اضرب حد
ولو بعدت عن البيت كام يوم منغير ما ادخل عالنت بابقى متضايقه جدا وباحس ان فيه حاجة مهمة ناقصاني

امرره
للحبيبه طعمه
وفتاة الجنة لما جهازها يتصلح

مشهدين ومشهدين

2007-08-12T11:10:00.000+03:00

اضطررت الى السفر الى الاسكندرية لمدة ثلاثة ايام

لانني لو باختياري لا ادخلها في هذا التوقيت ابدا

وذلك لانني لا اطيق الزحام ولا استطيع استيعاب ان الاجازة هي ان احرق نفسي على البحر طول النهار ثم اسهر الليل في شراء اشياء لا احتاجها باضعاف ثمنها وان ادور في الشوارع آكلا وشاربا باكثر مما يطيق البطن استمع واسمع من حولي فارضا عليهم ذوقي في الاستماع وان اجلس في اقتراب يكاد يكون التصاقا بمن حولي من الناس على الشاطئ او في مقهى ليكون حديثنا مشاعا وخصوصيتنا كلأ مستباحا بهذا الشكل الموجود في كل مصايفنا وليس في الاسكندرية وحدها

لذلك اروي عشقى لها بزيارتها في عز البرد والنوات

لكي اتمتع بسحرها الشتوي وبحرها الذي يكون في اجمل حالاته وما اسعدني حين امطرت على في شارع خالد بن الوليد في شهر 1 وهو خالي من البشر والمحلات لا تجد من يدخلها فاقول سبحان مغير الاحوال

ركبت الميكروباص " المشروع " هربا من المطقة المكتظة بالمصيفين المتلاحمين في حميمية لم اجد لها مثيلا في اي مكان

ونزلت بعد الجدارية بمسافة معقولة

هناك الكورنيش فاااضي والناس ممكن تتمشى مش تمشي بقوة الدفع ممن خلفهم

هناك ممكن نقعد على سور الكورنيش في هدوء ونشوف البحر ونعد امواجه ونتطلع الى الافق اللا متناهي ونستمتع برؤية الشمس اثناء المغيب

بدلا من ان نرى رؤؤسا قد اينعت ... احم اقصد رؤوسا تستحم في البحر حتى لم تعد ترى المياه من كثرة الرؤوس بجوار بعضها

وانا في لحظة التجلي تلك احاول اكمال اذكار المساء امام هذا المنظر المهيب لفت نظري مشهدين ومشهدين

المشهد الاول: رجل وزوجته يتمشيان وهو يحمل على كتفه طفلا رضيعا صغيرا جدا من حجمه يبدو انه لم يتعد شهرين ومغطى تماما بالكوفرته وال" زعبوط" مغطي راسه لدرجة مش باين غير عنيه وامه بتزبط الكوفرته حواليه عشان الهوا

الله

المشهد الثاني: رجل عادي جدا ذهب معظم شعره وشاب الباقي يرتدي نظارة وتيشيرت عادي جدا في حوالي الخمسينات من عمره يسير وبجواره شابه جمبله صغيره تبدو في اوائل العشرينات ويتحدث معها باهتمام وجدية ويشير بيديه ويستعمل لغة جسده في الحديث وهي تسمعه في اهتمام واحترام وتفكير .. صور لي خيالي انه والدها او عمها او خالها يبتعد بها عن العائلة ويتباحثان في امر يهمها

الله

المشهد الثالث: بنتين تحت العشرين تتمشيان ومن خلفهما ولدين تحت العشرين يقفان اذا وقفتا ويسيران ورائهما اذا سارتا ثم جلس احدهما بجواري لحظات رافضا اكمال المشي والثاني يقول له ياللا يا عم واضح من المشهد انه بدايات معاكسة وتعارف تقليدي او هكذا صور لي خيالي

لا حول ولا قوة الا بالله

المشهد الرابع: ام وولدها وابنتها تحت العشرين جلسوا على السور واخرجو السندوتشات والولد يبتعد عنهما وفي يده الطعام تناديه امه فيشيح لها بيديه ويشيح عنها بوجهه ولا يرد عليها

لا حول ولا قوة الا بالله

وما الدنيا الا مسرح كبير

=========

تحديث :

لفت نظري بينو والطائر الحزين جزاهم الله خيرا ان ادنيا ليست مسرحا كبيرا وانما:

"وما الحياة الدنيا الا لعب ولهو"

شيماء كمان .. توفيت

2007-08-05T20:46:00.000+03:00

قرات الان فقط في مدونة انسانه ان المدونه شيماء صاحبة مدونة
shiko online
والتي اعتقد ان بعض المدونين تساءل عن غيابها الطويل
قد توفيت الى رحمة الله تعالى في النصف من رجب
وقد اوصت اخاها ان يكتب ويبلغ زملائها من المدونين ويسالهم الدعاء لها
فقد كانت مريضة رحمها الله
وتوفيت بعد انتهاء علاجها
عمرها 28 سنه
انا لم اعرف شيماء
ولم ادخل مدونتها الا بعد ان قرات عن وفاتها
وانا اسال الله سبحانه ان يرحمها ويدخلها فسيح جناته ويغفر لها
انه تعالى اهل المغفرة
وانني انما اشفق على نفسي وعلى غيري
في الفترة الاخيرة كثرت المرثيات
وعدد كبير نقرا عنهم ونسمع
توفاهم الله
ومعظمهم صغير السن
فجاة
حادثة
مرض
تعددت الاسباب
والموت قريب
قريب
وماذا فعلنا
ماذا اعددنا
لاشيء
مازلت اركض
واجري
واتحسر على مافات
واسعى لما هو آت
واتزود لكل شئ
الا للحظة الفاصلة
وللرحلة الاخيرة
رحمك الله يا شيماء
وافاقنا من غفلتنا

خزعبلات .. جايز

2007-08-04T15:34:00.000+03:00

انا مش هنا
موجوده اه
باكل وباشرب وباقوم بواجباتي العادية
بكلم الناس وبيكلموني
لكن انا ساعات باحس انه حلم
وان كل اللي حواليا ده مش حقيقي
وانه لازم الحلم هيخلص في يوم ما
وهاصحى و
ومش عارفه هلاقي ايه
احسن من اللي موجود والا اوحش
المهم اني مصدقة انه حلم
وان هييجي يوم وهاصحى
وان دي مش انا
انا هناك
مستنياني لما اصحى
والاقيني
ياترى ده تفسيره ايه؟

الاحساس نعمة

2007-07-25T17:57:00.000+03:00

لما ست مصرية عادية خاااالص شكلا وموضوعا تبقى قاعده في شقتها المتواضعة جدا في حي متواضع جدا واقفة قدام البوتاجاز بتعمل اكلة اكيد برضه متواضعه لعيالها وتلاقي الامين والا الشاويش والا قوة جاية تقبض عليها انت فلانة الفلانية

ايوة

اتفضلي قدامنا يا...

وممكن الحوار يكون محلى بشوية كلمات من اياها

وتتجرجر قدام جيرانها والاحياء الشعبية دي ما تتوصاش في حركات المصمصمة والتصعيب وشوف يا اختي الولية السهتانة .. تلاقيها عاملة عاملة .. يبقى الحال ايه؟

ولما جوزها يجيله الخبر مراتك اتقبض عليها روحلها الاسم .. هو هيفتكر ايه.. وشكله قدام للي معاه ايه؟

ولما يوصل الخبر مكان شغلها وضعها هيكون ايه؟

ولما تفضل الست دي مرمية في الحبس الاحتياطي 33 يوم هيتاكد الناس ويصدقوا فيها ايه؟

وشكلهم قدام ولادها وفي الحتة وفي وسط الجيران

بلاش الناس هي حالتها هتكون ايه؟

لما تبقى مقضية يومها وراضية بعيشتها وبتشتغل عشان تساعد بالقرش مع جوزها عشان يربوا العيال بالحلال وتلاقي نفسها 33 يوم في زنزانة قذرة مع النشالات والحرامية واللهم احفظنا يبقى احساسها ايه؟

لما اولادها يعايرهم ولاد الجيران اللي بيلعبوا معاهم في الشارع بامهم يبقى احساسهم ايه؟

وكل ده بسبب ايه؟

تشابه اسماء

تشابه اسماء في عصر الحكومة الاكترونية والدكتور احمد نظيف

طب لو هي مواطنه مش حاسة بالنعمة اللي بلدها موفرهالها وماراحتش وقفت في طابور السجل المدني عشان تطلع الرقم القومي

قاللك فيه حاجة اسمها اسم الام تفرق بينها وبين المشتبه بها

طب هي فين؟ ده شهادة الميلاد لو مش ممكن نطلعها بالكمبيوتر ممكن نطلعها بمستخرج من اللي قد ورقة الجرنان من العباسية .. من دار المحفوظات بالقلعة

ولو ما فيش شهادة ميلاد خالص

مش فيه حاجة لسة لحد النهاردة اسمها شيخ حارة؟ شهود؟ حاجة اسمها تحريات؟ حاجة اسمها نظر؟

هي خرجت دلوقت بس بضمان وظيفتها .. لسه الحكاية ما خلصتش .. لسة فيها نظر

ايوة لسه فيه ناس فيكي يا مصر بياكلو لقمتهم بالحلال ويمكن يكملوا عشاهم نوم .. ومهم عندهم قوي شرفهم وسمعتهم

لسه فيه ناس ما بتسرقش وما بتنهبش وما بتقتلش بالالفات وبعدين تحط صباعها في عين التخين

لسه فيه ناس ماشية جوة الحيطة ومالهاش دعوة باي حاجة بس يتسابوا في حالهم وبرضه ما بيتسابوش في حالهم

دول اول ناس بييجوا عليهم

انا ما استحملتش حتى اتخيل نفسي مكانها

ربنا يقويها على محنتها

طب قول دي حالة فردية

طب والالفات من الغلابة في قراهم المتواضعة - هم كمان - اللي مش لاقيين نقطة المية

وتعرض منى الشاذلي فيلما تسجيليا اخرجته عطيات الابنودي من سنة 1981 في نفس المكان – برج البرلس – من 26 سنة وكاننا النهارده بنفس منظر الناس اللي شايلين الجراكن وبيدوروا عالمية مش لاقيينها

طب من 26 سنة ما كانش فيه بنية تحتية

دلوقتي فية وكله تمام

يبقى العيب فيهم

هم اللي ما بيصونوش النعمة .. اتعودو المية تجيلهم ببلاش وابو بلاش كتر منه زي ما وصفهم معالى السيد رئيس الوزراء

ولذلك المية خدت تحويلة من عندهم للفلل في الكمبوندات الشيك بتاعة علية القوم اللي يقدروا يدفعوا تمنها

وبدل ما تروح المية للفلاحين عشان يسقوا الرز وجدوا ان ملاعب الجولف اولى بالمية منهم

وقال بيقولوا المية ما بتجريش في العالي

لا دي بتجري قوي

والبنت .. العيلة الصغيرة اللي عندها 11 سنة وعلى ايدها رضيعة

لما شفتها في التليفزيون ما قدرتش امنع نفسي من البكاء .. سواق توكتوك

شاف فيها ايه دي؟ ده حجمها ما يجيبش 7 سنين؟

لا حول ولا قوة الا ابالله

انا قلت البنت ادمرت

لكن شفتها امبارح في 90 دقيقة – في بيتها المتواضع قوي برضه - بتتكلم وبتزعق وبتجادل ولا هند الحناوي لما عرفت ان الولد واهله بشككو في نسب الرضيعة عشان ينفوا التهمة عن ابنهم

ببتقول بكل جرأة وثقة طب يروحوا يحللوا بره .. انا عايزاهم يحللوا برة

بصراحة حمدت ربنا انها ما ادمرتش نفسيا

هو صحيح الاحساس نعمة زي ما سواقين الميكروباص بيكتبوا على عربياتهم ده على اساس انهم حساسين جدا

لكن في الحالات دي يبقى نقمة كبيرة قوي

لان واضح ان الواحد عشان يعرف يعيش في وطننا الغالي

لازم يكون ما بيحسش

ربنا يرحمنا برحمته

ويرفع عننا ظلمنا في بعض

رب اشرح لي صدري

2007-07-24T15:55:00.000+03:00

انا باعترف اني قربت من ربنا قوي الفترة اللي فاتت بسبب مشكله او يمكن اطلق عليها بلاء وقع لي

امر ابتليت به والمفروض اصبر

شيئ غالي فقدته والمفروض ارضى

طريق عايزة امشي فيه ومش سالك ومعاكسني وقدامي كل الدلائل اللي بتقول ان ربنا راسملي وممهدلي طريق تاني

برغم كل الآيات التي استدللت بها في التدوينه السابقة الا انني اعود كثيرا الى حالة القلق والتمني ولو التي تفتح عمل الشيطان

لدرجة انني خفت على نفسي ان اكون من الذين يقولون مالا يفعلون

انا خايفة

انا قلقة ومتردده

ارى قوله تعالى " مذبذبين بين ذلك لا الى هؤلاء ولا الى هؤلاء ومن يضلل الله فلن تجد له سبيلا" يكاد ينطبق علي

مازلت انظر الى ما كنت اتمناه واريده في يد غيري وتنطبق علي الايه "وكذلك فتنا بعضهم ببعض ليقولوا اهؤلاء من الله عليهم من بيننا أليس الله بأعلم بالشاكرين"

احتاج الى المزيد من العلم؟ من العمل؟ من اجبار نفسي على عدم التفكير؟

الصحبة الصالحة؟ لدي الكثير بارك الله فيهم واحتاروا معي

القرآن؟ اعترف انني ادرس تجويد القرآن وحفظه منذ عامين وصلت في الحفظ الى نهاية سورة الأنعام ودائما ما ادعو الله ان يتم علي حفظ كتابه ويثبته في قلبي

ولكني مازلت قلقة

اقرأ الاية واحفظها فاخاف خوفا عظيما من عدم تطبيقها وان اكون مثل الحمار يحمل اسفارا

اقرأ الحكم في المسألة الشرعية فاخاف واحاول العمل به فاعمل مرة واعصي مرات

مثال: البحث الطويل الذي اورده bino في حكم الغناء نعم لا انكر ايا مما جاء به ولا اجادله

امتنع ان امد يدي الى فولدر ال mp3 واشغل اي من الكم الهائل الذي حملته من النت واقول عيب عليك انت حامله او ستكونين حامله لكتاب الله فكيف تعارضي ايات مفسرة واحاديث صحيحة

خافي من الله اتقي الله

فاطيع مرة واعصي مرة

والغريب انني لا استمتع ابدا بها ان شغلتها وسمعتها

ارتدي ملابسي الواسعه مرة " يدنين عليهن من جلاببهن" مرة واختنق مرات

فاعود لملابسي العادية ساترة ايضا ولكن ليست مثل الجلباب

ليست كما احب ان يراني رسول الله وانا البسها

ولكنني البسها لانها اسهل في الحركة واقل تكلفا وأكثر عصرية الى غيره من المبررات التي لم تعد تقنعني انا نفسي

وفي كل خطوة احس بالذنب

امد يدي بالسلام لمن مد يده ليصافحني وكل مرة اتذكر تحريم ذلك بحديث وراي العلماء ولكنني لا اسحب يدي ولا اقول انني لا اسلم ولا حتى البس جوانتي لاعفي نفسي ومن امامي من الحرج

يرى علماء اخرون تخفيف الكثير من هذه الاحكام مثل ابن حزم والغزالى ولكن علماء اخرون يعتبرونها زلة لهؤلاء العلماء وسقطة منهم

ويقولون اتقو الشبهات

واقرأ قوله تعالى " ان تجتنبوا كبائر ما تنهون عنه نكفر عنكم سيئاتكم وندخاكم مدخلا كريما" النساء (31)

فيقولون لا تحقرن صغيرة ان الجبال من الحصى

سامحني با رب

واهديني

وساعدني ان اجمع بين الخوف والرجاء

اجعلني اعبدك يارب خوفا وطمعا

اجعل الجنه نصب عيني اعمل لها

لاني موقنة ان " وما الحياة الدنيا الا لعب ولهو وللدار الآخرة خير للذين يتقون أفلا تعقلون" الانعام (32)

هل اقتربت من الله فقط في الضراء وابتعدت ثانية عندما هدأت الامور؟

ام ان هذا هو السجال الممتد بيننا وبين الشيطان الى يوم الدين؟

الخلاصة

ان انا دلوقتي

مش عارفة اعيش

يا رب

انت عالم بحالي

يا رب

" فمن يرد الله ان يهديه يشرح صدره للاسلام ومن يرد ان يضله يجعل صدره ضيقا حرجا كأنما يصعد في السماء كذلك يجعل الله الرجس على الذين لا يؤمنون" الانعام (125)

رب اشرح لي صدري

آمين

اليقين

2007-07-09T17:57:00.001+03:00

عندما كتبت التدوينه السابقة كنت قد وصلت الى مرحلة اطمئنان بعد عامين من " المقاوحة"

عامين اعملت فيهما العقل ونوازع النفس

لم يكن قصدي مما كتبت ان الفاشل والمحبط واليائس والذي لم تاته الدنيا كما يريدها يحبس نفسه في الجامع او يقعد على السجاده ما يقومش او يقراله ايتين وحديثين ويعمل فيها عالم.. ابدا

ده مرفوض تماما بنص الحديث عن ‏ ‏أبي هريرة ‏ ‏قال :قال رسول الله ‏ ‏صلى الله عليه وسلم ‏ ‏المؤمن القوي خير وأحب إلى الله من المؤمن الضعيف وفي كل خير احرص على ما ينفعك واستعن بالله ولا تعجز وإن أصابك شيء فلا تقل لو أني فعلت كان كذا وكذا ولكن قل قدر الله وما شاء فعل فإن لو تفتح عمل الشيطان "صحيح مسلم 4816"

و كان نبي الله ‏ ‏صلى الله عليه وسلم ‏ ‏يقول ‏ ‏اللهم إني أعوذ بك من العجز والكسل والجبن والبخل والهرم وأعوذ بك من عذاب القبر وأعوذ بك من فتنة المحيا والممات " في صحيح البخاري 5890 "

وفي اخر التدوينه قلت :

في اداءك للي مكلفك بيه تجاه اللي ليهم حق عليك من خلقه

في اداءك للامانه اللي حملهالك

يعني الانسان له دور في الدنيا لازم يقوم بيه ربنا خلق آدم في الارض ليعمرها " واذ قال ربك للملائكة اني جاعل في الارض خليفة " البقرة 30

لكنه ايضا قال سبحانه " وما خلقت الجن والانس الا ليعبدون" الذاريات 56

لكن اللي بيحصل اننا بنركز على دورنا في الدنيا وننسى دورنا في العبادة

بنتشد اكتر للارض وبنبعد عن السماء

بنغذي اجسامنا وعقولنا ونسيب ارواحنا جعانه لحد ما تدبل وتموت

عشان كده لما بتحصل لنا حاجة نكرهها او بنخسر حاجة بنحبها بنتعب قوي

خصوصا اذا كنا بذلنا كل الجهد فيها

تبقى الحاجة اللي انا خسرتها مش بتاعتي فعلا

مش ليا

مش نصيبي

انا عملت اللي عليا بس ربنا مش رايد

ربنا رايد لي حاجة تانية

بس انا مش عايزاها

وهنا نحس بعظمة قول الله تعالى " وعسى ان تكرهوا شيئا وهو خير لكم وعسى ان تحبوا شيئا وهو شر لكم والله يعلم وانتم لا تعلمون " البقرة 216

ولو تاملنا في الحديث الجميل :

عن ‏ ‏عبد الله بن عباس ‏ ‏أنه ‏حدثه أنه ركب خلف رسول الله ‏ ‏صلى الله عليه وسلم ‏ ‏يوما فقال له رسول الله ‏ ‏صلى الله عليه وسلم ‏ ‏يا غلام إني معلمك كلمات ‏ ‏ احفظ الله يحفظك احفظ الله تجده تجاهك وإذا سألت فلتسأل الله وإذا استعنت فاستعن بالله واعلم أن الأمة لو اجتمعوا على أن ينفعوك لم ينفعوك إلا بشيء قد كتبه الله لك ولو اجتمعوا على أن يضروك لم يضروك إلا بشيء قد كتبه الله عليك رفعت الأقلام وجفت الصحف " مسند احمد 2537"

ده مش معناه اني اعتزل الدنيا

لا ده معنا اني اعيشها بشكل مختلف عن الاول

بفهم ووعي

وبتقدير الاولويات

وايه الاهم ثم المهم

يعني ماكنش من الذين ينطبق عليهم قوله تعالى " الهاكم التكاثر * حتى زرتم المقابر"

اخد بالي شويه

وعلاقتي تبقى بربنا مش بس علاقة فروض واوامر ونواهي

دي تبقى علاقة مناجاه وامل ورجاء

ويقين وتوكل

الموضوع كله ميزان

ماترجحش كفة على كفة

كل الحكايه ان اكتشفت جانب جديد من نفسي

جه بعد اضطرار او اختيار مش مهم

المهم اني حاسه احساس جديد

بالتفاؤل والخير والاقبال على العلم والعمل

واذا كان اتقفل باب

فانا متاكده ان ربنا سبحانه وتعالى هيفتح باب احسن منه

اللهم اقسم لنا من خشيتك ما تحول به بيننا وبين معصيتك ومن طاعتك ما تبلغنا به جنتك

ومن اليقين ما تهون به علينا مصائب الدنيا

فبذلك فليفرحوا

2007-07-05T17:55:00.000+03:00

لما تقعد طول عمرك خايف من حاجة معينه تحصل وتعمل كل شئ عشان الحاجة دي ما تحصلش وتقول كله الا دي وبرضه تحصل

ولما تعمل كل حاجه و تحط املك في اللي تتمناه وتجري وتسعى وتضيع سنين وانت بتحاول وبعدين ما يحصلش اللي انت بتتمناه ويخيب املك خصوصا انه فعلا ما فيش امل انك تحقق اللي بتتمناه خلاص الوقت خلص والفرصة ضاعت والجهد كل

ولما تحس ان حياتك انتهت وحلمك راح واملك ضاع

ايه المنقذ هنا من الاكتئاب والاحباط واليأس والاحساس بعدمية ولا جدوى كل شيء

اقول لكم وجربوها

الدعاء ثم الدعاء ثم الدعاء وان ترد نفسك الى الله وان تطلب منه ان يردك اليه ردا جميلا

في الاول هتقول ايه ده بقى

هو عشان راحت مني الدنيا استشيخ واجري عالاخرة

وهتغصب على نفسك ما انت ما لكش حد غيره سبحانه

ولو طاوعتك نفسك هتقول وتدعي بلسانك بس مش بقلبك

وبعدين هتبص حواليك هتلاقي اللي حالتهم اصعب مليون مرة من حالتك

هتحس وقتها بفضل ربنا عليك

هتحس ان اللي راح منك ولا يساوي حاجة طول ما لسه لسانك قادر يسبح بحمده

وعينك قادرة تبص في كتابه

وايدك مطاوعاك ورجلك شايلاك تركع وتسجد خمس مرات في اليوم

وجسمك سليم ومستحمل يصوم ال30 يوم في السنه

ومخك يقدر يحفظ ويستوعب آية ترفعك بحفظها درجة في الجنة

ويبقى طلبك من ربنا حاجة واحدة بس

انه يجعلك دايما في معيته

انك تفضل دايما فاكرة وما تنساهوش ابدا

في كل خطوة بتخطيها

في كل كلمه بتتكلمها

في كل نظرة بتبصها

في كل فكرة بتمر بخيالك

في كل انسان بتقابله وكل موقف يحصللك تعتبر منه

في اداءك للي مكلفك بيه تجاه اللي ليهم حق عليك من خلقه

في اداءك للامانه اللي حملهالك

في قوتك في الحق

وخفض جناحك للمؤمنين

هي دي السعاده

اللي لو علم عنها اهل الدنيا لجالدونا عليها بالسيوف

يا رب اجعلنا ممن قلت عنهم في كتابك:

"قل بفضل الله وبرحمته فبذلك فليفرحوا هو خير مما يجمعون"

سورة يونس اية 58

بيحلم يجيب جون

2007-06-24T20:58:00.000+03:00

الولد الصغير نفسه يلعب كورة
اشتركوله في نادي صغير فضل شهور مواظب على التمرين
غاية امله انه يلعب ماتش كبير ويجيب كام جون
بس المدرب كان دايما بيحطو ورا
موقفه دفاع
ده ان ماكانش قاعد احتياطي
وهو هيموت ويطلع قدام ويجيب جون
واكبر دور خده لحد دلوقت
انه يحرس واحد من الفريق التاني
لعيب شاطر
يفضل لازقله عشان يمنع الكورة توصله
المدرب شايف ان احسن دور ليه هو ده
وان قدراته تؤهله يلعب ورا مش قدام
طيب
بس الولد مالعبش
ولسه ما جابش جون
امنيته وحلمه مالهاش مكان من الاعراب
لان اللي بيحكم ويتحكم
قدراته والمدرب ومصلحة الفريق
وهو لسه بيحلم
يلعب قدام

ولسه بيحلم يجيب جون

فيلم شفته- الجزء الئاني : القصة الحقيقية

2007-06-20T16:15:00.000+03:00

كنت ناويه اكتب في التدوينه دي عن خواطري تجاه فيلم The Terminal - قبل ما يطالبني ما علينا - ولكن قررت أأجل الموضوع ده للبوست الجاي بعد ما افادنا الدكتور المحارب كعادته الجميله بعلمه الواسع الذي يبهرني كلما قرأت له شيئا في مدونته الجميله استراحة المحارب ولم أتخيل ان يكون مهتما بمثل هذا الموضوع وملما بالقصة الاصليه التي لم افكر انها حقيقية فجزاه الله خيرا

اخصص هذه التدوينه للاشارة الى تعليق الدكتور الذي ذكره على التدوينه السابقة (فيلم شفته)ثم في تدوينه قادمه لما اود قوله تجاه الفيلم مع خالص تحياتي له:

تصحيح بس القصة الاصلية للايرانى مهران کریمی ناصرى

.......................

ياريت تضيفى المعلومة للتدوينة
تحياتى

المعلومات من هذا المصدر

http://ar.wikipedia.org/

ابحث عن مهران كريمي ناصري

شكرا للدكتور المحارب

فيلم شفته

2007-06-18T19:08:00.000+03:00

هواية مازالت تتملكني هي مشاهدة الافلام الاجنبية، ولو انها تطورت بشده .. من انتظار أي فيلم تجود به القناة الثانيه في التليفزيون بتاعنا .. والمحافظة على معاد نادي السينيما كل يوم سبت ومقدمته المميزة وعرض وتحليل الفيلم .. و تاجير ثلاث افلام في اليوم اول ما اشترينا الفيديو.. لحد ما جبنا الدش وما كنتش بحول عن mpc2 وعملت فرح لما فتحت one tv واقعد قدامهم طول اليوم وتزامن ذلك مع ظروف كنت امر بها كانت تجعلني اجلس مكاني طول النهار والليل محملقة في الشاشة ولم تكن لدي الرغبة او القدرة على عمل اي شيء فكانت 24 ساعة افلام هي الحل..

لحد ما ربنا فرج كربتي ورزقني خيرا مما فقدت وعرفت قيمة الوقت ومعنى ان يضيع بدون انجاز شئ و لقيت الدنيا بتتكركب وبتبوظ فقللت من ادماني شيئا فشيئا حتى وصلت الى فيلم او اثنين اسبوعيا .. ونتيجة لهذا التخفيض حرصت على الا اشاهد الا اجود الافلام وذلك بعد معرفة قصتها وممثليها الذين لهم سابقة اعمال جيده والتي اخرج منها بفكرة او قيمه واتامل الفروق والمميزات والعيوب بين ثقافتنا كعرب ومسلمين وبين ثقافه الآخرين وغالبا بتكون نوعية الافلام انسانية او تاريخية.

طبعا مش محتاجة اقول اني ما باتفرجش على افلام عربي اصلا الا لو كنت عند حد وكان مشغلها صدفة وبتبقى مجرد اخدت فكرة بتزود ايماني بسفاهة وهيافة وضياع تفكيرنا ولا أجد لوجود هذه النوعيه من الافلام تبريرا الا انها "سبوبة" للعاملين عليها ومزيدا من الهروب والتغييب والتسطيح للمشاهدين لها.

من حوالي اسبوعين شفت فيلم اسمه The Terminal انتج سنة 2004 من بطولة توم هانكس الفيلم بيحكي قصة فيكتور رجل من احدى الجمهوريات الروسية ( مش حقيقية) يسافر من بلده الى نيويورك ليحقق رغبة والده المتوفي في شئ ما وعده به قبل ان يموت وقبل وصوله للمطار تندلع الحرب في بلده وتقوم حكومه اخرى لم تعترف بها الولايات المتحده فيصادر مدير امن المطار جواز سفره ويمنعه من مغادرة المطار الى ارض نيويورك و تتوقف رحلات الطيران لبلده بسبب الحرب فيظل عالقا في المطار ينام على الكراسي حتى يكتشف مكانا مهجورا في المطار ينام فيه .. وبمرور الوقت يمثل مشكله لمدير امن المطار الذي يحاول بشتى الطرق ابعاده من المطار:

- بان يوحي له بان يهرب من باب المطار في فترة تغيير الامن على البوابات الذين سيتأخرون متعمدين 5 دقائق وبالتالي يقبض عليه المسؤولين عن الهجرة الغير شرعيه ويسجن ويكون مشكلة شخص آخر فيكتشف الخدعة ويرفض الخروج.

- يحاول اقناعه بان يطالب بحق اللجوء السياسي وفي هذه الحاله سيخرج الى نيويورك ويبقى بها 6 اشهر حتى يمثل امام المحكمه لتقرر حقه في اللجوء السياسي من عدمه ويكون قد حقق هدفه من الزيارة ويعود او يبقى كما يقرر، ولكن نظرا لصعوبات اللغه وعدم اتقانها لا يفهم معنى اللجوء السياسي فيفهمه المدير انه حق يطالب به عندما يخاف من بلده بسبب الحرب او انتهاك الكرامه الانسانية او .. او.. فينظر اليه بنظرة ثابته ويقول : ان هذه التي يتحدث عنها هي وطنه

Home.. nobody afraid from home" "

ويرفض. نلاحظ ان المدير يحاول التغلب على المشكله بطريقه قانونيه وان فيكتور ثابت على مبادئه لا يغيرها.

- يظل فيكتور اياما جائعا لا ياكل الا عينات البسكوت المجانية التي يضع عليها الكاتشب ويحاول كسب قوته من خلال اعادة عربات نقل الحقائب الى الماكينه المخصصة والتي تعطيه ربع دولار عن كل عربة يرجعها فيستطيع ان ياكل سندويتش ب 74 سنت وتعيد له النادلة السنت الباقي - مش يبقالك 15 قرش من اجرة الميني باص ابو جنيه و10 ساغ - ثم يجمع نقودا اكثر فيستطيع ان يشترى وجبه كامله حتى يضيق المدير عليه ويجعل عاملا ضخما يمنعه ليضيق عليه الخناق و يضطره للخروج من المطار تحت اي مسمى، ويحاول البحث عن عمل في المحلات الموجوده بالمطار فيرفضون تشغيله بدون بطاقة هوية او رقم ضمن اجتماعي او عنوان ثم يرزقه الله برئيس عمال يراه وهو يدهن حائطا ويركب كورنيش فيعجبه عمله فيوظفه بدون السؤال عن الرسميات ويدفع له 19 دولار/ساعة under the table . نلاحظ ان ففيكتور لم يسرق او يتسول ولم يكلفه احد بتصليح الحائط وانما كانت لديه روح المبادرة ولم يكن ينتظر اجرا.

- يعيش فيكتور واكل نايم شارب في المطار منتظرا ما لا يجئ لا هو يستطيع العوده ولا الخروج ويدور حوار بينه وبين احد المضيفات معناه اننا جميعا نعيش حياتنا في انتظار شئ ما.

- يحاول مواطن اخر من روسيا تهريب ادويه من امريكا لوالده المريض بدون وصفه طبيه والقانون يمنع ذلك ويصادر الامن الادويه فيجن جنون المواطن ويصرخ ويحدث اضطرابا كبيرا ولا يستطيع احد التفاهم معه بسبب اللغه فيضطر مدير الامن الى الاستعانه بفيكتور ليترجم للمواطن القانون ويترجم لهم ما يقوله المواطن وعندما يفهم يركع على ركبتيه متوسلا للمدير ان يسمح له باخذ الادوية والمدير مصر على موقفه فيتاثر فيكتور ويقول كاذبا ان الادويه للماعز وليست للبشر فيفهم المدير الخدعة لان فيكتور قرأ لوحة القونين ويعلم ان الادويه البيطرية لا تحتاج وصفة ولكن لا يملك الا تصديقه يعيد الادويه للمواطن مغتاظا بعد ان يمسك فيكتور بشده ويجذبه معنفا الى الحائط بجوار ماكينة التصوير التي تدور بالصدفة وقد ارتكن فيكتور بيده عليها و تنتج نسخا عديده ليد فيكتور والتي تتحول الى رمز يعلقه كل العاملين في المطار كرمز للوقوف بجوار المقهورين والتعاطف معهم والتصدي لقاهريهم بالطرق السلمية

- تتزايد شعبية فيكتور بين كل العاملين بالمطار ويتحول الى بطل وصديق لهم وتحضر احدهم له تأشيرة مدتها يوم واحد ليخرج من المطار الى نيويورك ويفي بوعده لوالده ولكن التأشيرة يجب ان توقع من مدير أمن المطار ويحاول احدهم اقناعه بان يتصالح مع المدير فيأخذ له هديه سمكه محنطة من مفقودات المسافرين ويبدؤه بالكلام الطيب فيحدثه المدير بمنتهى الصفاقة والاحتقار ويقول له انه لن يضع اصبع قدمه على ارض نيويورك مادام في منصبه هل تفهم؟ فيرد فيكتور نعم افهم انك لا تحب الاسماك( يارب ما تحكمنا على حد) ويخرج من مكتبه. نلاحظ قيم التواضع والمحبه بين العاملين في المطار وفيكتور وعلى العكس التكبر والتسلط واحتقار الغير والتحكم في مصائرهم بسبب المنصب من قبل المدير

- تنتهي الحرب في بلد فيكتور فيحتفل به كل اصدقائه ويصبح من حقه ان يحصل على جواز سفره ويخرج الى نيويورك ويذهب الى المدير الذي يعطيه جواز السفر ولكن يهدده انه لو خرج ولم يعد لبلده فورا فسوف يسلم عامل النظافة صديقه العجوز الى الشرطة بتهمة الاقامه غير الشرعيه والذي هرب من بلده الهند منذ 23 سنه تاركا زوجته وطفله لانه حاول قتل ضابط شرطه كان يأخذ منه اتاوة يومية من محل رزقه واذا رحلوه سيسجن 7 سنوات (وقد سأله فيكتور مرة وكيف لم يرحلوك من قبل فقال : طالما الأرض التي انظفها لامعة ورأسي مطأطأ وصوتي منخفضا فانهم يتركونني ) فيضطر لكي لا يؤذي صديقه ان يذهب الى صالة السفر ليعود الى بلده بدون تحقيق غايته فيسقط من نظر كل اصدقائه في المطار الذين كانو يعتبرونه بطلا وصامدا واولهم صديقه الهندي الذي يشتمه وهو ينظر اليه في حزن ولا يتكلم ، ثم يخبر احد موظفي الامن الرجل الهندي بالحقيقة فيتوجه الهندي الى مدرج المطار واقفا امام طائرة متحركه فيتجمع عليع كل الأمن والمطافئ يظنون انه ارهابي ويلوح بيده الى فيكتور الذي يراقبه مشدوها من خلف زجاج صالة السفر قائلا

I'm going home

- يتوجه فيكتور الى باب المطار محاطا بكل اصدقائه الذين يقدمون له الهدايا ويوقفه موظف امن ضخم امام الباب فيظنه يعترضه ولكن الموظف يقول : هذه نيويورك ستحتاج الى هذا ، ويخلع معطفه ليضعه على كتفة والمدير يصرخ في اللاسلكي طالبا منهم ايقافه فلا يعبأ به أحد

- يتوجه فيكتور مباشرة الى غايته وينهيها في ساعات ثم ياخذ تاكسي ويسأله السائق الى اين فيجيب :Home. فيعود به الى المطار بدون ان تبهره اضواء المدينه او الحضارة المختلفة عن وطنه الصغير او حتى يفكر في البقاء لمجرد السياحة.

حاجات كتيرة استفدتها من الفيلم ده وحاجات اتأكدت اكتر جوايا مع الفارق بيننا وبينهم ومن كل موقف ومشهد طلعت بوجه تشابه او اختلاف وحاجات لازم نعمل زيها وحاجات لأ.

اهم حاجة اتعلمتها ان الانسان لازم يصر على هدفه ويفضل يحاول يحقق حلمه بكل الطرق المشروعة

وان الانسان لازم يكون ....انسان

اعتزل ايه؟ ده المدونه دي اتعملت بعد شقا

2007-06-14T11:01:00.000+03:00

ربنا يخليهم لي النا س اللي دخلت للمدونتي المتواضعة وقرو التدوينه اللي فاتت

واللي ما كانش قصدي بيها خالص التوقف عن التدوين انما هي كانت تعليل لحاله الوقفة التي اتخذتها حتى اعرف ما سوف اكمل عليه التدوين وهل ساستمر كما انا اكتب عن ما اقابله من مواقف واشخاص وكلمات اقرؤها وتؤثر في وتعلمني شيئا جديدا وربما جعلتني اغير سلوكا او اسلوب حياه راجية من الله اني اكون ماشية صح

يعني اكتب عن لحظات مرت علي وسابت اثر

والا هاخد منحى تاني في الكتابة

انا فعلا بدات اكتب لنفسي واطلع افكاري اللي جوايا ومشاعري بدل عل الورق زي زمان تبقى قدامي على الشاشة وما فيش مانع غيري يقراها ويتفاعل معاها لغرض انساني بحت زي ما بنشوف فيلم راقي جميل نتفاعل مع احساس البطل وحزنه وفرحه دي حاجة انا مؤمنه انها مهمة عشان نفضل محافظين على مشاعرنا الانسانية اننا نحس بالناس وان فكرة جديدة تنور في عقولنا وتورينا حاجة ما كناش شايفينها

اللي خوفني هو ان الكلمه امانه والكلمة اللي بتخرج بنتحاسب عليها والكلمه ممكن تاذي غيرنا ده اللي خلاني اعمل حساب قبل ما اكتب

مش قصدي خالص اتوقف ده المدونه دي اتعملت بعد شقا

من اصلا ما اعرفش يعني ايه تدوين

واغير من الووردبرس للبلوجر

واغير التمبلت واعيد الاكواد تاني

والتعليقات القليلة اصلا تضيع

وارجع تاني اذاكر
HTML
واكواد وحاجات كنت نسيتها وبارجع اذاكرها تاني ماهو العلم نور
انا مش هاعتزل التدوين زي ما فهم علاء ولا اتأمصت زي ما فهم ما علينا
وساذكر هنا شيء من ردرودي على المدونين جزاهم الله كل خير اللي وقفو جنبي هنا عشان اوضح الفكرة
الاستاذ محمد عبد الغفار - في العمق مكان للحرية - قال ان انا لازم اكون انا وما امشيش ورا خط حد وان الطائره الضخمه بها المحرك النفاث وبها المسمار الصغير ولا هذا يستغنى عن ذاك
وانا رديت عليه اني يكفيني اني اكون مسمار في الطيارة بدل ما يكون مالياش لازمة خالص
وبعدين تطيروا وتسيبوني
:)

علاء -مش انا - قال تعتزلي ؟
مدونتك هي إبداء لرأيك و اتجاهك الشخصي و ليس شرطا ان تتقيدي بجانب معين الا جانب الحق

وانا باقول يا علاء انت فهمتني غلط انا ما كتنش قصدي اعتزل التدوين انا كان قصدي اعتزل الفرق المختلفة في الدين والسياسة زمان الفتن كما تحدث عنه الرسول صلى الله عليه وسلم يعني لا انضم الى فرقة او حزب او اي اتجاه وانما اتمسك فقط بكتاب الله وسنة رسوله اقرا عنهم واتعلم نعم لكن ما اديش دماغي لحد انا مش هاعتزل التدوين بس انا كل فترة لما بحس اني ممكن اكتب حاجة عليها القيمة شكرا لك جدا جدا على تشجيعك

وما علينا - ما علينا - انا مش قصدي احملك اي مسؤوليه والله انا ما زعلتش من تعليقك انا زعلت من نفسي

ما انكرش ان تعليقك هو سبب من اسباب وقفتي بس السبب الاساسي هو احساسي اني ممكن ااذي حد بكلامي وهو ما يستحقش الاذيه بل بالعكس انا بكره الاذى قوي فازاي ااذي الناس وكمان خايفة تكون حجتي في الكلام علي مش لي خايفة اكون من اللي بيجادلو بالباطل وتاخذهم العزة بالاثم ولكن ربنا عارف بنيتي فانا هاتوكل على الله وافضل اكتب احساسي ووجهة نظري طالبة من الله اني اقرا واتعلم واتكلم صح بما لا يخرجني عن حدوده
وانا مش زعلانة منك ولا حاجة ده انا خايفة لتكون حضرتك اللي زعلت

اما رفقة عمر - العائشة في الاحلام - وطعمة فما فيش كلام اقوله هيوفيكم حقكم يارب نبقى اخوات بجد

ربنا يخليكو لي جميعا انكم وقفتو جنبي وخليتوني اقرر هاعمل ايه وانتظروني في البوست القادم

انا فين من كل دول؟

2007-06-09T15:00:00.000+03:00

بقالي كتير ما بكتبش

وجزاهم الله خيرا اللي سألوا عني طعمة وشيرمين

وعلى الرغم ان مدونتي اصلا صغيرة وبقالي شهرين بس في التدوين من ساعة ما بدأت في الووردبرس وغيرت التمبلت وكل التعليقات القديمة القليلة قوي ضاعت

الا اني توقفت بعد التاج لاسباب عديدة

وهي اني لفيت في مدونات عديده خطها مختلف عن مدوناتي الصديقة

لقيت بعد اللف ده اختلاف تام في الافكار والكلام ما قدرتش اتقبله يمكن عشان اختلاف المرجعية الدينيه والثقافية واسلوب التفكير لقيتني حتى مش قادرة اقرا كلامهم ولا اتقبله يبقى ازاي هاحاورهم فيه؟ لقيتني ما عنديش القدرة على المناقشة اساسا وانا اللي كنت فاكرة نفسي مؤمنه بتقبل الآخر المختلف معايا

وبعدين المدونات القريبة لقلبي التي اصلا هي اول ما وقع عليه عيني من مدونات زي وشوشات وطعمة وفوضى الحواس اللي هم قريبين من قلبي جدا برغم قصر الفترة و العائشة في الاحلام اللي عرفتها بعد كدة بفترة لكني هي كمان كاني اعرفها من زمان،

ثم ياتي الصارم الحاسم بكلامه الكبير قوي عن ما يحدث حولنا في العالم اللي هو فوق مستوى تفكيري

والدكتور المحارب الذي يكتب موضوعات قيمة جدا واكتأب لانه لا يجد معلقين يناقشونه فيما يكتب لتعم الاستفاده

والدكتور خالد من مصر الماروصة اللي هو كمان كلامه كبير قوي قوي وصعب على امثالي ولكني باستفيد وباتذكر منه حاجات بتمر علينا مرور الكرام

وبعدين اخي ما علينا اللي كان تعليقة جامد شوية على موضوع الجلابية البيضا المذكور في التاج واللي انا دافعت عن وجهة نظري بشده ليس عندا مني وانما توضيحا وخوفا ان اؤذي احدا عن غير قصد وخصوصا وهو بيعمل كده عشان ربنا ابقى انا خدت ذنب

قلت لنفسي انا فين وسط كل دول:

علم الدكتور المحارب

والا دعوة طعمة والعائشة في الاحلام

والا التزام الدكتور خالد وما علينا

والا ثقافة فوضى الحواس

والا تلقائية وشوشات علا

والا دماغ الصارم الكبيرة

وفي نفس الوقت ما احبش اكون مع الجناح التاني اللي بيتكلم في السياسة لاني مش مؤمنه باللي بيعملوه ولا الفرق الدينية وجدالهم ومين فيهم اللي على حق وانا من الناحيه دي باعمل زي ما قال رسول الله ‏ ‏صلى الله عليه وسلم عن حذيفة بن اليمان "‏ ‏يكون دعاة على أبواب جهنم من أجابهم إليها قذفوه فيها قلت يا رسول الله صفهم لنا قال هم قوم من جلدتنا يتكلمون بألسنتنا قلت فما تأمرني إن أدركني ذلك قال فالزم جماعة المسلمين وإمامهم فإن لم يكن لهم جماعة ولا إمام فاعتزل تلك الفرق كلها ولو أن تعض بأصل شجرة حتى يدركك الموت وأنت كذلك"

انا بقى قررت اعتزل ومعايا كتاب ربنا وسنة رسوله وعلمي القليل اللي بحاول ازوده على قد ما اقدر

وكمان ما حبش اكون مع الناس اللي بتهيس وبتقول اي حاجة وببتكلم في الهايف اللي معلش يعني درجته بتختلف من شخص لاخر فما اعتبره انا قمة الهيافة قد يعتبره اخرون هو سبب وجودهم في هذه الحياه

انا باكتب اللي باحس بيه واللي باشوفه حولي في الحياه وياثر في واتفاعل معاه

انا مش كاتبه محترفة لازم تحضر مواضيع قبل ما العدد الاسبوعي ينزل للطباعة

ولا باحثة اقدر افيد الناس بموضوع مهم

لكن انا باقدر كل اللي بكتب كلمه طيبه تفيد اللي يقراها وتقدم له حاجة جديدة: "قيمة مضافة "(زي ما بيقولوا بتوع الاقتصاد) لعقل ووجدان القارئ وباشكرهم جميعا

وادعولي اقدر اكتب قيمة مضافة انا كمان في يوم من الايام

شكرا لكم جميعا على كل شيء

اول تاج

2007-05-22T14:03:00.001+03:00

ده اول تاج يجيلي
جالي من العزيزة شيرمين
متشكرة اوي انك افتكرتيني
وانا سعيدة جدا على عكس اي حد بيجيله تاج بيضايق مش عارفة ليه؟
ودي اجاباتي

أحب شخص لقلبك فى الدنيا؟

"احبب حبيبك هوناً ما فعسى ان يكون بغيضك يوماً ما"

-------------------------------------

انسان مستعد تضحي بحياتك – ركز فى كلمة حياتك - عشانه؟

ممكن اقول دلوقت بس وقت الجد ما اضمنش نفسي

--------------------------------------

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

اي حد بيأذي اي حد من غير ما يعمل له حاجة

سواء كان هيستفيد او لأ

وسواء كان أذى مادي او معنوي

بالقول او بالفعل

كبير او صغير

مباشر او غير مباشر

بنفسه او بتحريض منه

ودول كتير أوي دلوقت

تأذيني ليه؟ انا عملت لك ايه؟ ما انا عايشة في حالي وساكته

عشان كدة باتمنى اقتل ناس كتير جدااااااااااا

----------------------------------------

ما هو:اسم أجمل كتاب كتبه بشر قرأته ومحتفظ به حتى الان؟

سلسلة ما وراء الطبيعة "ما حدش يبصلي، فيها معلومات لا بأس بها ود. رفعت اسماعيل بيضحكني"

--------------------------------

اسم كتاب -كتبه بشر برضة- انت متعلق بيه وبتقرأه كل فترة؟

كما سبق

----------------------------------------

اهم جهاز منزلى انت متعلق بيه او بتستخدمه كتير؟

المكواه و الكمبيوتر بعد ما دخلت ال دي اس ال

-----------------------------------------

مكان تحس بالراحة عندما تدخله؟

بيتي

-----------------------------------------------------

شىء تحس بالراحة النفسية عندما تنظر اليه؟

ارنوب فرو أبيض في بمبي عندي من ايام الجامعة

----------------------------------------------

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

البحر وأي مكان طبيعي واسع وممتد وفاضي

-----------------------------------------

اجمل مدينة زرتها داخل مصر ؟

6 اكتوبر

في الاحياء اللي مش زحمة

---------------------------------------------

أجمل مكان طبيعي رأيته داخل مصر ؟

اللسان في راس البر: التقاء النيل بالبحر وهمي

-------------------------------------------

شخصية كارتونية بتحبها؟

------------------------------------------

نوع هاتفك المحمول؟

نوكيا ليه؟

---------------------------------------------

سرعة بروسيسور جهازك؟

برضه ليه؟

----------------------------------------------

حجم ذاكرة –هارد- جهازك؟

التلات اسئلة دول ما لهمش علاقة باللي قبلهم ولا اللي بعدهم

------------------------------------------------

المساحة التى تشغلها المواد الاسلامية على جهازك؟

لما بالاقي حاجة كويسة بانزلها وما باحسبش المساحة

---------------------------------------------

نفس المساحة السالف ذكرها فى قلبك -الاجابة لنفسك عشان الرياء يا اخواننا -؟

طب هارد ازاي؟

---------------------------------------------

أهم هدف انت واضعه لحياتك الآن؟

اني اؤدي مسؤوليتي تجاه الناس اللي انا مسؤولة عنهم وما اقصرش في حقهم

اني اتعلم باستمرار حاجات جديدة وما اتوقفش عن التعلم طول ما في نفس

اني اقدر اشتغل باستمرار واعتمد على الله ثم على نفسي

------------------------------------------------

مواصفات فتاة/ فتى الأحلام بالنسبة لك؟

الموضوع ده عندي ما بيخضعش لمواصفات

ده احساس مع شوية عقل وصلاة استخارة

-----------------------------------------

صف ما يأتى:شعورك لما بتسمع كلمة مصر ؟

بالحسرة

شعورك لما بتسمع كلام عن اليهود؟

بالقرف

شعورك لما بتشوف ظابط شرطة؟

ولا حاجة

شعورك لما بتشوف الكناس العجوز فى الطريق؟

بالالم

-----------------------------------------

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

انا اسفة: باتضايق لانه الدين فرض على المرأة الحجاب وما فرضش على الراجل المظهر ده ، ما فيش زي اسلامي معين لا للرجل ولا للمراة والرسول علية الصلاة والسلام كان يرتدي الرداء والازار والثوب وكان عنده بردة وكان بيجيله ملابس هدايا من بلدان اخرى زي البردة التي اهديت له من اليمن يعني الملابس المتاحة والمتعارف عليها في العصر اللي هم عايشين فيه واهم شيء هو ستر الجسم و انه ما يكونش حرير (بالنسبة للرجال) والملابس المناسبة في المكان المناسب يعني كان وقت الحرب له زي وفي البيت وسط الاهل زي ومع الناس زي ووقت الحج زي، ومعروف ان الجلابية والعمامه هو لبس تقليدي في بعض البلدان و بيدي انطباع مش مجال مناقشته هنا، ايه المشكله لمانلبس ملابس عادية و محترمة وساترة ومريحة طالما مش محزق ولا مقطع ولا واقع ولا ديرتي ولا عليها كلمات ولا رسومات سيئة وتخالف الدين والادب؟ زي ما ده منتقد ده كمان منتقد .وصحيح الرجل يطلق لحيته بس ما فيش مانع انه يهذبها اما موضوع المصحف والسواك فكل انسان حر يشيل مصحف او حتى كتاب عادي والسواك اهه في جيبه وله وقته ومكانه سنة مع الوضوء وقبل الصلاه وقبل قراءة القرآن يعني مش لازم يطلع في المواصلات العامة او في الشغل او وسط الناس، اللي بيلبس كده عايز يقتدي بالجيل الاول من الصحابة وعايز ينشر فكرة الالتزام والتدين بين الناس لكن الاوقع انه يقتدي بسلوكياتهم واعمالهم ويظهرها للناس عشان هم كمان يقتدو بيها وده مش هيكون بالجلابية والعمامة

-------------------------------------------

احساس يراودك فى اشارة مرور مغلقة بسبب مسئول كبير؟

باتنرفز جدا بس ايه يعني ما اتفلق

ايه يعني طالب رايح امتحان والا واحد هيتاخر على شغله او واحد هتفوته طيارته والا ست سايبة ولادها لوحدهم في البيت والاواحد تعبان عايز يروح مستشفى

كلنا نروح فداء عشان المسئول يعدي بسرعة وسلامة

---------------------------------------

وانا بامرره للعزيزة علا
وطعمةالمتميزة

هي

2007-05-22T14:01:00.000+03:00

قابلتها من كام شهر .. انسانه عادية جدا لو قابلتها في الشارع مش هتلفت نظرك .. اتعرفت عليها .. كانت ساكنة في نفس العمارة اللي كنت بازور فيها ناس قرايبنا.. كان مجرد سلام من على السلم مصحوبا بعبارات المجاملة المألوفة مع الحاح منها اني ادخل عندها وابقى ازورها

مرة مسكت في واصرت ادخل عندها واقعد معاها شوية .. دخلت .. لقيت شقتها بسيطة وانيقة في نفس الوقت وعملت معايا واجب الضيافة باصرار شديد وبعدين قعدت تحكي.. زي ماتكون كانت مستنيه حد تحكيله

عرفت انها كانت متجوزة من ضابط من حوالي 15 سنة .. فضلوا مع بعض 7 سنين ربنا مارزقهمش اولاد .. وبعدين ربنا كرمهم ببنت زي العسل .. وبعد 4 شهور.. مات جوزها

وعاشت في شقتها لوحدها مع بنتها اللي بقى عندها دلوقت 7 سنين .. مدخلاها مدرسة لغات عريقة وعايشة عشان تربيها وتذاكرلها وتخاف عليها .. ما هو ماعندهاش غيرها .. لا بتشتغل ولا بتروح ولا بتيجي .. ابوها واخوها بيسالو دايما عليها وبيراعوها .. طبعا ادبا مني لاني ما اعرفش ظروف اهلها ايه وتفهما لطبيعة انه اللي بيتعود يستقل ويعيش في بيته ممكن ما يقدرش يرجع يسكن مع اهله تاني خلوني ما اسألهاش هي ما عاشتش مع ابوها ليه؟

لحد هنا والموضوع عادي

لكن اللي مش عادي ان الست الطيبة قوي دي الراضية بنصيبها جالها من حوالي سنه فيروس سي والمرارة والدكتور قالها وش كدة انت ترجعي بيتك تستني كرم ربنا

تخيلوا حالتها .. وهي بتحكيلي قالت لي ياعالم هاعيش مع بنتي دي قد ايه؟ هي طبعا سابت الدكتور ده ربنا يسامحه وراحت لدكتور تاني واهي بتتعالج بالشكل المتاح .. خلصت الزيارة وهي بترجوني ابقى افوت عليها من وقت للتاني.. سبتها وانا قلبي موجوع

لحد هنا برضه الحمد لله على كل شئ .. قابلتها تاني من يومين لقيت وشها فيه حاجة مش طبيعية .. ولما قلتلها سلامتك مالك.. قالت لي انه جالها شلل في وشها والدكتور بيقول انه العصب السابع والا السادس مش عارفة .. هنا ما قدرتش امسك نفسي .. انا ماعرفش ايه هو العصب السابع ده بس كلمة شلل لوحدها تعبتني اوي.. قلتها الف سلامة وانشاء الله خير واستاذنت منها وطلعت اجري على قرايبي وانا معيطة.. ولما قالولي مالك وحكيتلهم قالولي انشاء الله حاجة بسيطة وشوية علاج طبيعي وهتخف ده بيبقى من الزعل او برد

في اللحظة دي فكرت .. يا رب انت خلقتنا وعارف احنا اد ايه ضعفاء.. شوية انفلونزا يرقدونا.. ووقعة في الشارع ممكن تكسر رجلنا وتحبسنا في الجبس شهور.. و.. و.. و

الابتلاء من عندك يارب لحكمه لا ندركها .. وان امرنا بالصبر عليه.. وعرفنا انك سبحانك تكفر به ذنوبنا .. وتجازينا خير الجزاء اذا صبرنا.. وفكرت .. انا ارفل الان في نعمة من الله وعافية اشكره عليها فهل اقوى على الاحتمال والصبر اذا ابتلاني الله

وخفت وارتعبت.. هل اقوى على الاحتمال.. ولم اجد الا ان ادعو الله بالدعاء الذي اسمعه كثيرا " اللهم لا تجعل مصيبتنا في ديننا" وتذكرت قوله تعالى في سورة البقرة:" ولنبلونكم بشئ من الخوف و الجوع ونقص من الاموال والانفس والثمرات وبشر الصابرين* الذين اذا اصابتهم مصيبة قالوا انا لله وانا اليه راجعون * اولئك عليهم صلوات من ربهم ورحمة واولئك هم المهتدون " ( الايات من 155 الى 157 ) وسالت نفسي هل اكون من الصابرين؟ هل قوة ايماني ويقيني تبلغني هذه المنزلة؟

يا رب

التصالح مع النفس

2007-05-22T14:00:00.000+03:00

التصالح مع النفس

مصطلح باسمعه كتير اليومين دول

ان الواحد يعمل اي حاجة هو عايزها وما تبقاش فارقة معاه طول ما هو مرتاح ومتصالح مع نفسه

حسب ما فهمت يعني طول ما ضميره مش مضايقه

وده مش معناه ان اللي بيعمله صح ولا غبار عليه من وجهة نظره طبعا

وعشان ما حدش من بتوع الحرية والانفتاحية يقول لي صح وغلط باي مقياس؟ ومقياسهم الاول ان الضمير بيقى مرتاح لان مافيش منهج معين ماشيين عليه

وده اللي تساءلت عنه احاديث زجاجية لما اتكلمت عن قصة على بابا والاربعين حرامي .. مين الوحش ؟ على بابا اللي سرق من مغارة الحرامية والا قاسم اللي اتفق مع الحرامية عليه؟

وهي مشكورة فكرتنا بفيلم محاكمة علي بابا.. وعلق عليها وجع دماغ بان قاسم متصالح مع نفسه وعارف انه بيسرق ومش فارقة معاه .. وعلى بابا شايف انه ما بيعملش حاجة غلط !! وانا علقت علي التدوينه دي و قلت اكتب التعليق هنا

بقول احنا بشر وربنا خلقنا نخطئ ونتوب ويغفر لنا وده مش معناه اننا نسوق فيها ونروح نعمل الغلط واحنا عارفين انه غلط وعارفين اننا رايحين نعمله وهو غلط وعارفين اننا عارفين اننا هنعمله بالرغم من انه غلط .. ده ما يبقاش تصالح مع النفس ده يبقى استهبال.. وفيه ناس بتعمل الحاجة وهي من وجهة نظرها صح الصح.. الحرامي بيفضل يسرق وهو مش زعلان من نفسه.. واللي بيشتم على الملا باقذع الالفاظ مش مكسوف من نفسه.. واللي بياذي الناس ومش هامه بياذيهم وهو مبسوط قوي من نفسه.. والبنت والولد اللي بيمشوا يصاحبو طوب الارض ويغيروا في اصحابهم زي ما بنغير المناديل الورق عايشين قوى ومدلعين نفسهم عالاخر ... و..و ..كل ده اسمه تصالح مع النفس؟ ده اسمه استعباط مع النفس.. وبيتساءلو : احنا مين؟ احنا لازم نكون بني ادمين بجد زي ما ربنا خلقهم وعايزهم يكونوا

ربنا قال لسيدنا ادم لما غلط وكل من الشجرة واخرجه من الجنه: " قلنا اهبطوا منها جميعا فاما ياتينكم مني هدى فمن تبع هداي فلا خوف عليهم ولا هم يحزنون"

لما نتبع هدى الله هنبقى متصالحين مع نفسنا.. وهدى الله لازم نتعلمه صح ونفهمه كويس وندور عليه ونتعب عشان نطبقه

ساعتها بس هنرتاح و نتصالح مع نفسنا

العروسة للعريس

2007-05-22T13:59:00.000+03:00

كنت وانا صغيرة اقرأ سلسلة قصص اسمها المكتبة الخضراء كانت دايما مليانه ملوك وامرا وساحرات وحاجات كدة ؛ وحتى في قصص الف ليلة وليله كانت فيها ملوك وامرا وبرضه ساحرات وحاجات كده ومن كتر ما قرات فضلت لوقت طويل متخيله ان فيه ساحرة هتيجي ذات يوم وبعصايتها السحرية هتعمل كل اللي انا عاوزاه ..
لكن فيه مشهد معين بيلح على ذاكرتي مش فاكرة قراته في اي قصة؟ بس كان بيتكرر كتير : ان لما الملك كان بيجوز الأمير ابنه ولي العهد كان بيقيم الافراح 7 ليالي والا 40 ليله مش فاكرة بالضبط... وكان ينحر الذبائح ويمد الموائد ليأكل الشعب ويفرح.. وكان يقف على سور القصر ويبذر (يرش يعني) الدنانير على رؤس الشعب الذي ينتظر المنحة تحت اسوار القصر فرحا بجواز ابنه؟
وبعدين كبرت .. والقصص اللي كانت عندي ضاعت او اترمت - ماما ادرى مني بالموضوع ده - وعرفت ان زي مافيش في الحياه الحقيقية ساحرة تقدر تحقق لنا حاجة .. برضة ما فيش ملك بيرش على شعبه دنانير.

بس كده.

اسطورة صينيه

2007-05-22T13:47:00.000+03:00

هذه رسالة وصلتني في الميل من جروب اسمه نور اسلامنا : و
***هناك أسطورة صينية تحكي أن***
سـيدة عاشت مع ابنها الوحيد في سعادة ورضا حتى جاء الموت واخذ روح الابن. حزنت السيدة جدا لموت ولدها ولكنها لم تيأس بل ذهبت إلى حكيم القرية
طلبت منه أن يخبرها الوصفة الضرورية لاستعادة ابنها إلي الحياة مهما كانت أو صعبت تلك الوصفة. أخذ الشيخ الحكيم نفسا عميقا وشرد بذهنه ثم قال:أنت تطلبي وصفة..حسنا احضري لي حبة خردل واحدة بشرط أن تكون من بيت لم يعرف الحزن مطلقا
وبكل همة أخذت السيـدة تدور على بيوت القرية كلها و تبحث عن هدفـها حبة خردل من بيت لم يعرف الحزن مطلقا
طرقت السيدة بابا ففتحت لها امرأة شابة فسألتها السيدة هل عرف هذا البيت حزنا من قبل؟ ابتسمت المرأة في مرارة وأجابت: وهل عرف بيتي هذا إلا كل حزن؟ و أخذت تحكي لها أن زوجها توفى منذ سنة و ترك لها أربعة من البنات والبنين ولا مصدر لإعالتهم سوى بيع أثاث الدار الذي لم يتبقى منه إلا القليل. تأثرت السيدة جدا و حاولت أن تخفف عنها أحزانها و بنهاية الزيارة صارتا صديقتين ولم ترد أن تدعها تذهب إلا بعد أن وعدتها بزيارة أخرى ، فقد فاتت مدة طويلة منذ أن فتحت قلبها لأحد تشتكي له همومها
و قبل الغروب دخلت السيدة بيت آخر ولها نفس المطلب ولكن الإحباط سرعان ما أصابها عندما علمت من سيدة الدار أن زوجها مريض جدا و ليس عندها طعام كاف لأطفالها منذ فترة وسرعان ما خطر ببالها أن تساعد هذه السيدة فذهبت إلي السوق واشترت بكل ما معها من نقود طعام و بقول ودقيق وزيت ورجعت إلي سيدة الدار وساعدتها في طبخ وجبة سريعة للأولاد واشتركت معها في إطعامها ثم ودعتها على أمل زيارتها في مساء اليوم التالي
و في الصباح أخذت السيدة تطوف من بيت إلي بيت تبحث عن حبة الخردل وطال بحثها لكنها للأسف لم تجد ذلك البيت الذي لم يعرف الحزن مطلقا لكي تأخذ من أهله حبة الخردل
و لأنها كانت طيبة القلب فقد كانت تحاول مساعدة كل بيت تدخله في مشاكله وأفراحه.. وبمرور الأيام أصبحت السيدة صديقة لكل بيت في القرية ، نسيت تماما إنها كانت تبحث في الأصل على حبة خردل من بيت لم يعرف الحزن .. ذابت في مشاكل ومشاعر الآخرين ولم تدرك قط إن حكيم القرية قد منحها أفضل وصفة للقضاء على الحزن حتى ولو لم تجد حبة الخردل التي كانت تبحث عنها فالوصفة السحرية قد أخذتها بالفعل يوم دخلت أول بيت من بيوت القرية
هذه ليست مجرد وصفة اجتماعية هذه هي دعوة لكي يخرج كل واحد من أنانيته وعالمه الخاص ليحاول أن يهب من حوله بعض المشاركة التي تزيد من بهجته في وقت الفرح وتعزيه وتخفف عنه في وقت الحزن إلي جانب أن هذه المشاركة لها فائدة مباشرة عليك ليس لأنها ستخرجك خارج أنانيتك ولأنها ستجعل منك شخصية محبوبة
إنما لأنها ستجعلك إنسانا سعيدا أكثر مما أنت الآن